କେନ୍ଦୁଝର, ୨୯/୧୦: କେନ୍ଦୁଝର ସହରର ପ୍ରସିଦ୍ଧ କମାରଗୋଡ଼ା ମହାଲକ୍ଷ୍ମୀ ପୂଜା ଚଳିତ ବର୍ଷ ୪୬ ବର୍ଷରେ ପଦାର୍ପଣ କରିଛି। ଗତ ରବିବାରଠାରୁ ଆରମ୍ଭ ହୋଇଥିବା ଏହି ପୂଜା ଆଜି ପଞ୍ଚମ ଦିନରେ ପହଞ୍ଚିଥିବା ବେଳେ ରଙ୍ଗବେରଙ୍ଗ ଆଲୋକମାଳା ଓ ଆକର୍ଷଣୀୟ ତୋରଣରେ ଝଲସୁଛି ସମଗ୍ର ଅଞ୍ଚଳ।କମାରଗୋଡ଼ା ମହାଲକ୍ଷ୍ମୀ କଲଚରାଲ କ୍ଲବ ପକ୍ଷରୁ ଆୟୋଜିତ ଏହି ପୂଜାରେ ମା’ ଗଜଲକ୍ଷ୍ମୀଙ୍କୁ ପ୍ରତିଦିନ ବିଭିନ୍ନ ରୀତିନୀତି ଅନୁଯାୟୀ ବିଧିବିଧାନ ସହ ପୂଜାର୍ଚ୍ଚନା କରାଯାଉଛି। ମା’ଙ୍କ ଦର୍ଶନ ପାଇଁ ପ୍ରତିଦିନ ଶହ ଶହ ଭକ୍ତ ଓ ଶ୍ରଦ୍ଧାଳୁଙ୍କ ସମାଗମ ହେଉଛି। ଶ୍ରଦ୍ଧାଳୁଙ୍କ ପାଇଁ କମିଟି ପକ୍ଷରୁ ପ୍ରତିଦିନ ପ୍ରସାଦ ସେବନର ବ୍ୟବସ୍ଥା ମଧ୍ୟ କରାଯାଇଛି।ପୂଜା ଅବସରରେ ପ୍ରତିଦିନ ସନ୍ଧ୍ୟାରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ହେଉଥିବାରୁ ଅଞ୍ଚଳରେ ଉତ୍ସବମୁଖର ପରିବେଶ ସୃଷ୍ଟି ହୋଇଛି। କମାରଗୋଡ଼ାଠାରୁ ଏକ କିଲୋମିଟରରୁ ଅଧିକ ରାସ୍ତାକୁ ରଙ୍ଗବେରଙ୍ଗ ଆଲୋକମାଳା ଓ ସୁନ୍ଦର ତୋରଣରେ ସଜ୍ଜିତ କରାଯାଇଛି। ଏହି ଆଲୋକସଜ୍ଜା ଓ ଆକର୍ଷଣୀୟ ପୂଜାମଣ୍ଡପ ଶ୍ରଦ୍ଧାଳୁଙ୍କ ମନ ମୋହୁଛି।ପୂଜାକୁ ସଫଳ ଓ ସୁବ୍ୟବସ୍ଥିତ କରିବା ପାଇଁ କ୍ଲବର ସଭାପତି ଜ୍ଞାନରଞ୍ଜନ ଦାସ, ସମ୍ପାଦକ କିଶୋର କୁମାର ଜେନା, କୋଷାଧ୍ୟକ୍ଷ ମନୋଜ କୁମାର ସାହୁଙ୍କ ସମେତ ଜିତେନ୍ଦ୍ର କୁମାର ଦାସ, ମନରଞ୍ଜନ ଜେନା, ବଂଶୀଧର ସାହୁ, ଶଶୀଭୂଷଣ ସାହୁ ଓ ଡା. ଚିନ୍ମୟ ସାହୁ ପ୍ରମୁଖ ଉଦ୍ୟମ ଜାରି ରଖିଛନ୍ତି।କମିଟି ପକ୍ଷରୁ ମିଳିଥିବା ସୂଚନା ଅନୁଯାୟୀ, ଏହି ମହାଲକ୍ଷ୍ମୀ ପୂଜା ଆସନ୍ତା ଶନିବାର ପର୍ଯ୍ୟନ୍ତ ଚାଲିବ। ରବିବାର ଦିନ ମା’ଙ୍କ ଭସାଣି ଉତ୍ସବ ଅନୁଷ୍ଠିତ ହେବ। ୪୬ ବର୍ଷର ଏହି ପାରମ୍ପରିକ ପୂଜା ମାଧ୍ୟମରେ କମାରଗୋଡ଼ା ଅଞ୍ଚଳରେ ଭକ୍ତି, ଶ୍ରଦ୍ଧା ଓ ସାଂସ୍କୃତିକ ଉତ୍ସାହର ମାହୋଲ ଦେଖିବାକୁ ମିଳୁଛି।
