କେନ୍ଦୁଝର/ପାଟଣା, ୧୫/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ମୁରୁସୁଆଁ ପଞ୍ଚାୟତ କାର୍ଯ୍ୟାଳୟ ପରିସରରେ ସେବା ସଂକଳ୍ପ ଅଭିଯାନ-୨୦୨୬ ଅନୁଷ୍ଠିତ ହୋଇଯାଇଛି। ଏହି ମିଳିତ ଶିବିରରେ ମୁରୁସୁଆଁ, ଯମୁନାପଶି ଓ ରାଜନଗର ପଞ୍ଚାୟତର ଶତାଧିକ ହିତାଧିକାରୀ ବିଭିନ୍ନ ସରକାରୀ ସେବା ପାଇବା ସହ ନିଜ ଅଭିଯୋଗ ଓ ସମସ୍ୟା ଜଣାଇବାର ସୁଯୋଗ ପାଇଛନ୍ତି।
ଗୋଟିଏ ସ୍ଥାନରେ ମିଳିଲା ବିଭିନ୍ନ ସରକାରୀ ସେବା
ଗ୍ରାମାଞ୍ଚଳର ଲୋକଙ୍କ ନିକଟରେ ସରକାରୀ ସେବା ପହଞ୍ଚାଇବା ଉଦ୍ଦେଶ୍ୟରେ ଆୟୋଜିତ ଏହି ଶିବିରରେ କୃଷି, ସ୍ୱାସ୍ଥ୍ୟ, ରାଜସ୍ୱ, ଶ୍ରମ ଓ ପଞ୍ଚାୟତିରାଜ ବିଭାଗ ପକ୍ଷରୁ ସ୍ୱତନ୍ତ୍ର ଷ୍ଟଲ୍ ଖୋଲାଯାଇଥିଲା। ଏଠାରେ ସାମାଜିକ ସୁରକ୍ଷା ଭତ୍ତା, ନୂତନ ରାସନ କାର୍ଡ ପାଇଁ ଆବେଦନ ଓ ସଂଶୋଧନ, ଆଧାର କାର୍ଡ ପଞ୍ଜୀକରଣ ଓ ସଂଶୋଧନ, ପ୍ରଧାନମନ୍ତ୍ରୀ ଆବାସ ଯୋଜନା ସମ୍ପର୍କିତ ତଥ୍ୟ ଯାଞ୍ଚ, ମାଗଣା ସ୍ୱାସ୍ଥ୍ୟ ପରୀକ୍ଷା ଏବଂ ନିର୍ମାଣ ଶ୍ରମିକ କାର୍ଡ ପଞ୍ଜୀକରଣ ଭଳି ବିଭିନ୍ନ ସେବା ଯୋଗାଇ ଦିଆଯାଇଥିଲା।ଏଥିସହ ଶିବିରରେ ଥିବା ଆଧାର କେନ୍ଦ୍ର ମାଧ୍ୟମରେ ଆଧାର କାର୍ଡ ସଂଶୋଧନ ସୁବିଧା ମଧ୍ୟ ଉପଲବ୍ଧ ହୋଇଥିଲା। ବିଭିନ୍ନ ବିଭାଗର ଅଧିକାରୀମାନେ ଲୋକଙ୍କ ସମସ୍ୟା ଓ ଅଭିଯୋଗ ଶୁଣିବା ସହ ଆବଶ୍ୟକ ସେବା ସମ୍ପର୍କରେ ସୂଚନା ଦେଇଥିଲେ।
ଯୋଗଦେଲେ ବିଭିନ୍ନ ବିଭାଗର ଅଧିକାରୀ
କାର୍ଯ୍ୟକ୍ରମରେ ପାଟଣା ଗୋଷ୍ଠୀ ଉନ୍ନୟନ ଅଧିକାରୀ ମାନସ କୁମାର ଦଣ୍ଡପାଟ, ତହସିଲଦାର ଅଶ୍ୱିନୀ କୁମାର ନାଏକ, ଅତିରିକ୍ତ ତହସିଲଦାର ରବିଶଙ୍କର ହେମ୍ବ୍ରମ, ସହକାରୀ ଶ୍ରମ ଅଧିକାରୀ ଅମରେଶ କର, ଗ୍ରାମ୍ୟ ଆବାସ ଯୋଜନା ଅଧିକାରୀ ସୁରେନ୍ଦ୍ର ଖଣ୍ଡା, ଯୋଗାଣ ନିରୀକ୍ଷକ ଦିବ୍ୟରାଜ ଭୋଇ, ବ୍ଲକ ସାମାଜିକ ସୁରକ୍ଷା ଅଧିକାରୀ ଅଭୟ ଚରଣ ଦେହୁରୀ, ପରିମଳ ବିଭାଗର ଜମାଲୁଦିନ ଖାନ, ଖିରେଇଟାଙ୍ଗିରି ବନପାଳ ପୂର୍ଣ୍ଣଚନ୍ଦ୍ର ମହାନ୍ତ ଓ ସ୍ଥାନୀୟ ସରପଞ୍ଚ ହରି ଶଙ୍କର ଦେହୁରୀଙ୍କ ସମେତ ସ୍ୱାସ୍ଥ୍ୟକେନ୍ଦ୍ରର ଅଧିକାରୀ ଏବଂ ବିଭିନ୍ନ ବିଭାଗର କର୍ମଚାରୀ ଉପସ୍ଥିତ ଥିଲେ।ଏହାସହ ମୁରୁସୁଆଁ, ଯମୁନାପଶି ଓ ରାଜନଗର ପଞ୍ଚାୟତର କର୍ମଚାରୀ ଓ ଲୋକପ୍ରତିନିଧିମାନେ ମଧ୍ୟ ଶିବିରରେ ଯୋଗ ଦେଇଥିଲେ। ସମଗ୍ର କାର୍ଯ୍ୟକ୍ରମକୁ ପ୍ରଶାସନିକ ଅଧିକାରୀମାନେ ତଦାରଖ କରିଥିଲେ।
ଶତାଧିକ ହିତାଧିକାରୀ ଉପକୃତ
ଗୋଟିଏ ସ୍ଥାନରେ ବିଭିନ୍ନ ସରକାରୀ ସେବା ପାଇବା ସହ ନିଜ ସମସ୍ୟା ଓ ଅଭିଯୋଗ ଜଣାଇବାର ସୁଯୋଗ ମିଳିଥିବାରୁ ତିନି ପଞ୍ଚାୟତର ଶତାଧିକ ହିତାଧିକାରୀ ଉପକୃତ ହୋଇଛନ୍ତି।
ଗ୍ରାମାଞ୍ଚଳର ଲୋକଙ୍କ ପାଖରେ ପ୍ରଶାସନ ଓ ସରକାରୀ ସେବା ପହଞ୍ଚାଇବା ସହ ଯୋଗ୍ୟ ହିତାଧିକାରୀଙ୍କ ସମସ୍ୟାର ତ୍ୱରିତ ସମାଧାନ କରିବା ହେଉଛି ସେବା ସଂକଳ୍ପ ଅଭିଯାନର ମୁଖ୍ୟ ଉଦ୍ଦେଶ୍ୟ ବୋଲି ପ୍ରଶାସନ ପକ୍ଷରୁ କୁହାଯାଇଛି।
