ମୟୂରଭଞ୍ଜରେ ଜାତୀୟ ରାଜପଥରେ ଜଳିଗଲା କଣ୍ଟେନର, ରୋଷେଇ ବେଳେ ଲାଗିଲା ନିଆଁ

ମୟୂରଭଞ୍ଜ:୧୭/୯,ମୟୂରଭଞ୍ଜ ଜିଲ୍ଲାର ୧୮ ନମ୍ବର ଜାତୀୟ ରାଜପଥରେ ଏକ କଣ୍ଟେନରରେ ଭୟାବହ ଅଗ୍ନିକାଣ୍ଡ ଘଟିଛି। କୁଳିଅଣା ଥାନା ଅଧୀନ ଶୁଖୁଆପଡ଼ା ଟୋଲଗେଟ୍ ସମ୍ମୁଖରେ ଏହି ଘଟଣା ଘଟିଥିବା ଜଣାପଡ଼ିଛି।ସୂଚନା ଅନୁସାରେ, କଣ୍ଟେନରଟି ବାରିପଦା ଦେଇ ପାଟଣା ଅଭିମୁଖେ ଯାଉଥିଲା। ଶୁଖୁଆପଡ଼ା ଟୋଲଗେଟ୍ ନିକଟରେ ଗାଡ଼ିଟି ଅଟକିଥିବା ସମୟରେ ଚାଳକ କଣ୍ଟେନର ନିକଟରେ ରୋଷେଇ କରୁଥିଲେ। ଏହି ସମୟରେ ହଠାତ୍ କଣ୍ଟେନରରେ ନିଆଁ ଲାଗିଯାଇଥିଲା।

କିଛି ସମୟ ମଧ୍ୟରେ ନିଆଁ କଣ୍ଟେନରର ବିଭିନ୍ନ ଅଂଶକୁ ବ୍ୟାପିଯାଇଥିଲା। ନିଆଁ ଲାଗିଥିବା ଦେଖି ଚାଳକ ତୁରନ୍ତ ଗାଡ଼ିଠାରୁ ଦୂରେଇ ଯାଇଥିଲେ। ଫଳରେ ବଡ଼ ଅଘଟଣ ଟଳିଥିବା ବେଳେ ଚାଳକ ସୁରକ୍ଷିତ ଥିବା ଜଣାପଡ଼ିଛି।

ଅଗ୍ନିକାଣ୍ଡ ଯୋଗୁଁ ୧୮ ନମ୍ବର ଜାତୀୟ ରାଜପଥରେ କିଛି ସମୟ ପାଇଁ ଯାତାୟାତ ପ୍ରଭାବିତ ହୋଇଥିଲା। ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି କଣ୍ଟେନରରେ ଲାଗିଥିବା ନିଆଁକୁ ନିୟନ୍ତ୍ରଣ କରିଥିଲା।ତେବେ କଣ୍ଟେନରରେ ନିଆଁ ଲାଗିବାର ପ୍ରକୃତ କାରଣ ଏଯାଏଁ ସ୍ପଷ୍ଟ ହୋଇନାହିଁ। ରୋଷେଇ ସମୟରେ ନିଆଁ ଲାଗିଥିବା ଜଣାପଡ଼ିଥିଲେ ମଧ୍ୟ ଅଗ୍ନିକାଣ୍ଡର ପ୍ରକୃତ କାରଣ ନେଇ ତଦନ୍ତ ଜାରି ରହିଛି।

ଚଳନ୍ତା ଡଷ୍ଟର କାରରେ ହଠାତ୍ ନିଆଁ, ଅଳ୍ପକେ ବର୍ତ୍ତିଲେ ଯାତ୍ରୀ

ଘଟଗାଁ:୧୨/୯, କେନ୍ଦୁଝର ଜିଲ୍ଲା ଘଟଗାଁର ଭାରତ ପେଟ୍ରୋଲ ପମ୍ପ ନିକଟରେ ଆଜି ସନ୍ଧ୍ୟା ପ୍ରାୟ ୭ଟା ୩୦ରୁ ୮ଟା ମଧ୍ୟରେ ଏକ ଚଳନ୍ତା ଡଷ୍ଟର କାରରେ ହଠାତ୍ ନିଆଁ ଲାଗିଯାଇଥିଲା। ଭୁବନେଶ୍ୱରରୁ କେନ୍ଦୁଝର ଅଭିମୁଖେ ଯାଉଥିବା ସମୟରେ କାରର ଇଞ୍ଜିନ ଅଞ୍ଚଳରୁ ନିଆଁ ଲାଗିଥିବା ଜଣାପଡ଼ିଥିଲା ତେବେ କାରରେ ଥିବା ସମସ୍ତ ଯାତ୍ରୀ ନିଆଁ ଲାଗିଥିବା ଜାଣିବା ପରେ ତୁରନ୍ତ କାରରୁ ବାହାରକୁ ଓହ୍ଲାଇ ପଡ଼ିଥିଲେ। ଫଳରେ ଏକ ବଡ଼ ଅଘଟଣ ଅଳ୍ପକେ ଟଳିଯାଇଥିଲା।ଘଟଣା ସମ୍ପର୍କରେ ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି କାରରେ ଲାଗିଥିବା ନିଆଁକୁ ଆୟତ୍ତ କରିଥିଲା। ତେବେ ଡଷ୍ଟର କାରରେ ନିଆଁ ଲାଗିବାର ପ୍ରକୃତ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।