ପାଟଣା, ୨୫।୮(ନଜର ଓଡ଼ିଶା) ପାଟଣା ବ୍ଲକ ତୁରୁମୁଙ୍ଗା ପଞ୍ଚାୟତ ଅନ୍ତର୍ଗତ ସଦାନନ୍ଦ ନୂଆସାହିରେ ଉପଯୁକ୍ତ ଡ୍ରେନେଜ୍ ବ୍ୟବସ୍ଥା ନ ଥିବାରୁ ଲଗାତାର ବର୍ଷାରେ ରାସ୍ତା ସାରା ପାଣି ଜମି ରହିବା ସହ ଲୋକଙ୍କ ଘରେ ବର୍ଷା ଜଳ ପ୍ରବେଶ କରୁଥିବା ଅଭିଯୋଗ ହୋଇଛି। ତୁରୁମୁଙ୍ଗା ଲକ୍ଷ୍ମୀ ମଣ୍ଡପଠାରୁ କ୍ଲବ ଘର ପର୍ଯ୍ୟନ୍ତ ଯାଇଥିବା ମୁଖ୍ୟ ରାସ୍ତାରେ ନାଳ ଅଭାବରୁ ଜଳ ନିଷ୍କାସନ ହୋଇପାରୁ ନାହିଁ। ବିଶେଷକରି ବିଜେପି ପଞ୍ଚାୟତ ପ୍ରମୁଖ ନାଗେଶ୍ଵର ମହାରାଣଙ୍କ ଘର ନିକଟରେ କୃତ୍ରିମ ଜଳାଭ୍ରବ ସୃଷ୍ଟି ହୋଇଥିବା ବେଳେ ବର୍ଷା ପାଣି ଜମି ରହି ଜଣେ ବ୍ୟକ୍ତିଙ୍କ ଘରର କାନ୍ଥ ଭୁଶୁଡ଼ି ପଡ଼ିଛି; ତେବେ ପରିବାର ଲୋକେ ଅଳ୍ପକେ ବର୍ତ୍ତିଯାଇଛନ୍ତି।ଶ୍ରୀ ମହାରାଣା ନିଜେ ବର୍ଷାରେ ଭିଜି ପାଣି ନିଷ୍କାସନ କରିବା ସହ ଅଭିଯୋଗ କରିଛନ୍ତି ଯେ, ପାଟଣା ବିଧାୟକ ଅଖିଳ ଚନ୍ଦ୍ର ନାଏକ ପ୍ରତିଦିନ ଏହି ରାସ୍ତା ଦେଇ ଯାତାୟାତ କରୁଥିଲେ ସୁଦ୍ଧା ଡ୍ରେନ୍ ଅଭାବ ଓ ଜଳବନ୍ଦୀ ସମସ୍ୟା ପ୍ରତି ଦୃଷ୍ଟି ଦେଉନାହାନ୍ତି। ଦୀର୍ଘଦିନର ଏହି
ଗୁରୁତର ସମସ୍ୟା ପ୍ରତି ପ୍ରଶାସନିକ ଅବହେଳା ଯୋଗୁଁ ଯାତାୟାତ ସହ ଆସବାବପତ୍ର ଓ ଘରଦ୍ଵାର ପ୍ରଭାବିତ ହେଉଛି। ଆଗାମୀ ଦିନରେ ଅଧିକ ବର୍ଷା ହେଲେ ପରିସ୍ଥିତି ଆହୁରି ଭୟାବହ ହେବାର ଆଶାଙ୍କା ଥିବାରୁ, ସାହିରେ ତୁରନ୍ତ ପକ୍କା ଡ୍ରେନ୍ ନିର୍ମାଣ କରି ଜଳ ନିଷ୍କାସନର ସ୍ଥାୟୀ ସମାଧାନ କରିବାକୁ ସାହିବାସିନ୍ଦା ଦାବି କରିଛନ୍ତି।
