କେନ୍ଦୁଝର/ଘଟଗାଁ: ୧୬/୦୯: କେନ୍ଦୁଝର ଜିଲ୍ଲାର ଘଟଗାଁ ବ୍ଲକରେ ପ୍ରଥମ ଥର ପାଇଁ ନର୍ସିଂ କଲେଜ ତଥା ତାଲିମ କେନ୍ଦ୍ରର ଶୁଭାରମ୍ଭ ହୋଇଛି। ଏହା ଫଳରେ ଅଞ୍ଚଳର ଶିକ୍ଷିତ ଯୁବତୀମାନେ ନର୍ସିଂ ଓ ସ୍ୱାସ୍ଥ୍ୟ କ୍ଷେତ୍ରରେ ତାଲିମ ନେବା ସହ ଭବିଷ୍ୟତରେ ନିଯୁକ୍ତି ସୁଯୋଗ ପାଇପାରିବେ।ଖବର ଅନୁଯାୟୀ, ଘଟଗାଁର ତାରିଣୀ ପୀଠ ନିକଟରେ ସ୍ଥାନୀୟ ଉଚ୍ଚଶିକ୍ଷିତ ଯୁବ ଉଦ୍ୟୋଗୀଙ୍କ ପକ୍ଷରୁ ନିଉଟନ କଲେଜ ଅଫ୍ ନର୍ସିଂ ସ୍ଥାପନ କରାଯାଇଛି। ଏହି ନର୍ସିଂ କଲେଜରେ ANM ଓ GNM ଦୁଇଟି ପାଠ୍ୟକ୍ରମ ରହିଛି। ଏପର୍ଯ୍ୟନ୍ତ ଶତାଧିକ ଛାତ୍ରୀ ନାମଲେଖା କରିଥିବା ଜଣାପଡ଼ିଛି।ଛାତ୍ରୀମାନଙ୍କୁ ଆବାସିକ ବ୍ୟବସ୍ଥା ସହ ଶିକ୍ଷା ଓ ନର୍ସିଂ ତାଲିମ ପ୍ରଦାନ କରାଯିବ। ଏହି ପଦକ୍ଷେପ ଘଟଗାଁ ଓ ଆଖପାଖ ଅଞ୍ଚଳର ଯୁବତୀମାନଙ୍କୁ ନର୍ସିଂ ଶିକ୍ଷା ପାଇଁ ନୂଆ ସୁଯୋଗ ଦେବ ବୋଲି କୁହାଯାଇଛି।ଶୁଭାରମ୍ଭ ଅବସରରେ ଘଟଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ଡାକ୍ତର ମୁକ୍ତିକାନ୍ତ ନାୟକ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ସେ ଅଞ୍ଚଳର ଶିକ୍ଷିତ ଯୁବତୀମାନଙ୍କ ପାଇଁ ସ୍ୱାସ୍ଥ୍ୟ କ୍ଷେତ୍ରରେ ନିଯୁକ୍ତି ସୁଯୋଗ ସୃଷ୍ଟି ସହ ଅଞ୍ଚଳବାସୀଙ୍କୁ ଉତ୍ତମ ସ୍ୱାସ୍ଥ୍ୟସେବା ମିଳିବାରେ ଏହି ପ୍ରତିଷ୍ଠାନ ସହାୟକ ହେବ ବୋଲି ମତ ଦେଇଥିଲେ।
ଅନ୍ୟମାନଙ୍କ ମଧ୍ୟରେ ବିଜେପି ଜିଲ୍ଲା କାର୍ଯ୍ୟକାରିଣୀ ସଦସ୍ୟା ଲବଙ୍ଗଲତା ନାୟକ, ସାମ୍ବାଦିକ ଆନନ୍ଦ ଚନ୍ଦ୍ର ସିଂହ, ଥାନା ଅଧିକାରୀ ଶୁଭ୍ରାନ୍ତ କୁମାର ଜେନା, ପଦ୍ମଲୋଚନ ମହାନ୍ତ ଓ ପୂର୍ବତନ ବ୍ଲକ ଉପାଧ୍ୟକ୍ଷା କୌଶଲ୍ୟା ମହାନ୍ତ ପ୍ରମୁଖ ଅତିଥି ଭାବେ ଯୋଗଦେଇଥିଲେ।ନିଉଟନ ନର୍ସିଂ କଲେଜର ପରିଚାଳନା ନିର୍ଦ୍ଦେଶକ ଦେବାଶିଷ ମହାନ୍ତଙ୍କ ତତ୍ତ୍ୱାବଧାନରେ ଆୟୋଜିତ କାର୍ଯ୍ୟକ୍ରମକୁ ଅଧ୍ୟକ୍ଷା ଦୀପ୍ତିମୟୀ ବେହେରା ପରିଚାଳନା କରିଥିଲେ। ମଧୁସ୍ମିତା ମହାନ୍ତ, ପ୍ରଦୀପ ମହାନ୍ତ, ଯୋସିକା ମହାନ୍ତ ଓ ଆଶିଷ କୁମାର ବାରିକ ପ୍ରମୁଖ କାର୍ଯ୍ୟକ୍ରମରେ ସହଯୋଗ କରିଥିଲେ।
