ଢେଙ୍କିକୋଟ ୫/୯ କେନ୍ଦୁଝର ଜିଲ୍ଲା ଢେଙ୍କିକୋଟରେ ଦିନଦ୍ୱିପ୍ରହରେ ଜଣେ ମୋବାଇଲ୍ ଦୋକାନୀଙ୍କୁ ଠକେଇ କରି ୭,୫୦୦ ଟଙ୍କା ନେଇ ଦୁଇ ଯୁବକ ଫେରାର ହୋଇଯାଇଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ଢେଙ୍କିକୋଟ ଅଞ୍ଚଳରେ ଚର୍ଚ୍ଚା ଜୋର ଧରିଛି।ସୂଚନା ଅନୁଯାୟୀ, ଢେଙ୍କିକୋଟ ରିଜିଓନାଲ୍ ଏସ୍ଏନ୍ ମାଧ୍ୟମିକ ବିଦ୍ୟାଳୟ ସମ୍ମୁଖରେ ଥିବା ୨୨୦ ନମ୍ବର ଜାତୀୟ ରାଜପଥ କଡ଼ର ଆର୍ଏମ୍ସି ମାର୍କେଟ୍ କମ୍ପ୍ଲେକ୍ସରେ ନିକଟସ୍ଥ କପାସପଡ଼ା ଗ୍ରାମର ସିପୁନ ମାଝୀ ମୋବାଇଲ୍ ଦୋକାନ କରିଛନ୍ତି।ଶନିବାର ପୂର୍ବାହ୍ନ ପ୍ରାୟ ୧୧ଟା ସମୟରେ ସାପ୍ତାହିକ ହାଟର ସୁଯୋଗ ନେଇ ଦୁଇ ଜଣ ଯୁବକ ପଲସର୍ ମୋଟରସାଇକେଲ୍ରେ ଆସି ସିପୁନଙ୍କ ଦୋକାନରେ ପହଞ୍ଚିଥିଲେ। ସେମାନେ ଏକ ଫୋନ୍ପେ କ୍ୟୁଆର୍ କୋଡ୍ ଦେଖାଇ ସେଥିରେ ୭,୫୦୦ ଟଙ୍କା ପଠାଇବାକୁ କହିଥିଲେ। ଟଙ୍କା ପଠାଇଦେଲେ ସେମାନେ ନଗଦ ଟଙ୍କା ଦେଇଦେବେ ବୋଲି ସିପୁନଙ୍କୁ ବିଶ୍ୱାସ ଦେଇଥିଲେ।ସିପୁନ ଉକ୍ତ କ୍ୟୁଆର୍ କୋଡ୍ରେ ୭,୫୦୦ ଟଙ୍କା ପଠାଇବା ସମୟରେ ଦୁଇ ଜଣଙ୍କ ମଧ୍ୟରୁ ଜଣେ ଦୋକାନରେ ବସି ରହିଥିଲା। ଏହି ସମୟରେ ଅନ୍ୟ ଜଣେ ଗ୍ରାହକ ଦୋକାନକୁ ଆସି ସିପୁନଙ୍କ ସହ କଥାବାର୍ତ୍ତା ହେବାର ସୁଯୋଗ ନେଇ ଅଭିଯୁକ୍ତ ଦୁଇ ଜଣ ସିପୁନଙ୍କୁ ଟଙ୍କା ନଦେଇ ପଲସର୍ ମୋଟରସାଇକେଲ୍ରେ ଘଟଣାସ୍ଥଳରୁ ଚମ୍ପଟ ମାରିଥିଲେ।ଘଟଣା ପରେ ଦୋକାନରେ ଲାଗିଥିବା ସିସିଟିଭି କ୍ୟାମେରାରେ ଦୁଇ ଅଭିଯୁକ୍ତଙ୍କ ଚେହେରା କଏଦ ହୋଇଥିବା ଜଣାପଡ଼ିଛି। ଏନେଇ ସିପୁନ ମାଝୀ ଘଟଗାଁ ଥାନାରେ ଲିଖିତ ଅଭିଯୋଗ କରି ଘଟଣାର ତଦନ୍ତ ଓ ଠକଙ୍କୁ ଧରିବାକୁ ଦାବି କରିଛନ୍ତି।ଘଟଣାକୁ ନେଇ ପୁଲିସ ପକ୍ଷରୁ ତଦନ୍ତ ଆରମ୍ଭ ହୋଇଥିବା ବେଳେ ସିସିଟିଭି ଫୁଟେଜ୍ ଆଧାରରେ ଅଭିଯୁକ୍ତଙ୍କ ସମ୍ପର୍କରେ ଖୋଳତାଡ଼ କରାଯାଉଥିବା ଜଣାପଡ଼ିଛି।
