କେନ୍ଦୁଝର/ଢେଙ୍କିକୋଟ,୧୨।୯: କେନ୍ଦୁଝର ଜିଲ୍ଲା ଢେଙ୍କିକୋଟ ପଞ୍ଚାୟତ ଅନ୍ତର୍ଗତ ଲଙ୍ଗଳକଣ୍ଟି ଗ୍ରାମରେ ଥିବା ବେଦ ବିଦ୍ୟାଳୟ ପରିଦର୍ଶନ କରିଛନ୍ତି ବିଶିଷ୍ଟ ସାଧୁସନ୍ଥ। ଏହି ଅବସରରେ ସାଧୁସନ୍ଥମାନେ କେନ୍ଦୁଝର ସାଂସଦ ଅନନ୍ତ ନାୟକଙ୍କୁ ମଧ୍ୟ ସାକ୍ଷାତ କରି ଧର୍ମ ଆଲୋଚନା କରିଥିଲେ।ମା’ କାମାକ୍ଷାଙ୍କ ପବିତ୍ର ଧାମ ଆସାମରୁ ବରିଷ୍ଠ ମହନ୍ତ ସ୍ୱାମୀ ବ୍ରହ୍ମାନନ୍ଦ ସରସ୍ୱତୀ, ଜୁନା ଆଖଡ଼ାର ସ୍ୱାମୀ ବିଷ୍ଣୁ ଗିରି ମହାରାଜ, ଡିଭାଇନ ଲାଇଫର ସ୍ୱାମୀ ସତ୍ୟ ଧର୍ମାନନ୍ଦ ସରସ୍ୱତୀ ଏବଂ ଶ୍ରୀକ୍ଷେତ୍ରରୁ ସ୍ୱାମୀ ଦର୍ଶନ ପ୍ରମୁଖ ପୂର୍ବାହ୍ନରେ ସାଂସଦ ଅନନ୍ତ ନାୟକଙ୍କ ବାସଭବନକୁ ଆସି ତାଙ୍କୁ ଭେଟିଥିଲେ। ସେଠାରେ ସାଂସଦଙ୍କ ସହ ଧର୍ମ ଓ ଆଧ୍ୟାତ୍ମିକତା ସମ୍ପର୍କରେ ଆଲୋଚନା ହୋଇଥିଲା।
ପରେ ବିଶିଷ୍ଟ ସାଧୁସନ୍ଥମାନେ ଲଙ୍ଗଳକଣ୍ଟି ବେଦ ବିଦ୍ୟାଳୟ ପରିଦର୍ଶନ କରି ବେଦ ବିଦ୍ୟାର୍ଥୀଙ୍କ ସହ ବେଦ ପାଠ କରିଥିଲେ। ବେଦ ବିଦ୍ୟାଳୟର ଗୁରୁଜୀ ସୁବାସ ଚନ୍ଦ୍ର ମିଶ୍ର ଏବଂ ସାଂସଦଙ୍କ ପତ୍ନୀ ଲବଙ୍ଗ ଲତା ନାୟକ ପ୍ରମୁଖ ସାଧୁସନ୍ଥମାନଙ୍କୁ ସ୍ୱାଗତ କରିବା ସହ ଭବ୍ୟ ଅଭ୍ୟର୍ଥନା ଜଣାଇଥିଲେ।
