ଜର୍ମାନୀର ଆନ୍ତର୍ଜାତୀୟ ବୈଜ୍ଞାନିକ ସମ୍ମିଳନୀରେ ଡକ୍ଟର ଜ୍ୟୋତି ରଞ୍ଜନ ବାରିକ

କେନ୍ଦୁଝର/ଘଟଗାଁ,୧୮/୯: କେନ୍ଦୁଝର ଜିଲ୍ଲା ଘଟଗାଁ ବ୍ଲକ୍‌ର ଗଦାଧରପୁର ଗ୍ରାମର ଯୁବ ଇଞ୍ଜିନିୟର ଡକ୍ଟର  ଜ୍ୟୋତି ରଞ୍ଜନ ବାରିକ ଜର୍ମାନୀର ବର୍ଲିନ ସହରରେ ଆୟୋଜିତ ଆନ୍ତର୍ଜାତୀୟ ବୈଜ୍ଞାନିକ ସମ୍ମିଳନୀରେ ଯୋଗଦେଇ ଅଞ୍ଚଳ ପାଇଁ ଗୌରବ ଆଣିଛନ୍ତି।ଚଳିତ ସେପ୍ଟେମ୍ବର ୧୪ରୁ ୧୮ ତାରିଖ ପର୍ଯ୍ୟନ୍ତ ଜର୍ମାନୀର ବର୍ଲିନରେ ଆୟୋଜିତ ୧୮ତମ ଆନ୍ତର୍ଜାତୀୟ ୟୁରୋପିଆନ୍ ବୈଜ୍ଞାନିକ ସମ୍ମିଳନୀରେ ଡକ୍ଟର  ବାରିକ ଆମନ୍ତ୍ରିତ ହୋଇ ଗବେଷଣାଭିତ୍ତିକ ସନ୍ଦର୍ଭ ଉପସ୍ଥାପନ କରିଛନ୍ତି।  ଟୁବକୋ ପକ୍ଷରୁ ଆୟୋଜିତ ଏହି ସମ୍ମିଳନୀରେ ତାଙ୍କର ଯୋଗଦାନ ଅଞ୍ଚଳବାସୀଙ୍କ ପାଇଁ ଗୌରବର ବିଷୟ ପାଲଟିଛି।ଡକ୍ଟର  ବାରିକ ରାଉରକେଲାସ୍ଥିତ ଏନ୍‌ଆଇଟି ରାଉରକେଲାରୁ ଡକ୍ଟରେଟ୍ ଡିଗ୍ରୀ ହାସଲ କରିଛନ୍ତି। ଏହା ପୂର୍ବରୁ ସେ ନିଜର ଗବେଷଣା ସନ୍ଦର୍ଭ ଉପସ୍ଥାପନ ପାଇଁ ଲଣ୍ଡନସ୍ଥିତ ଇମ୍ପେରିଆଲ କଲେଜ୍ରେ ଅନୁଷ୍ଠିତ ଏକ ବିଶ୍ୱସ୍ତରୀୟ ଆନ୍ତର୍ଜାତୀୟ ସମ୍ମିଳନୀରେ ମଧ୍ୟ ଯୋଗଦେଇଥିଲେ। ଜର୍ମାନୀ ଗସ୍ତ ତାଙ୍କର ଦ୍ୱିତୀୟ ବିଦେଶ ଯାତ୍ରା ବୋଲି ଜଣାପଡ଼ିଛି।ସମ୍ପ୍ରତି ଡକ୍ଟର ବାରିକ୍ ଆଇଆଇଟି ମାଡ୍ରାସରେ ସାମୁଦ୍ରିକ ଇଞ୍ଜିନିୟରିଂରେ ପୋଷ୍ଟଡକ୍ଟରାଲ୍ ଫେଲୋ ଭାବେ କାର୍ଯ୍ୟରତ ଅଛନ୍ତି। ତାଙ୍କର ଏକାଧିକ ଗବେଷଣା ସନ୍ଦର୍ଭ ପୂର୍ବରୁ ଆନ୍ତର୍ଜାତୀୟ ଜର୍ଣ୍ଣାଲରେ ପ୍ରକାଶିତ ହୋଇଥିବା ଏବଂ ଏଥିପାଇଁ ସେ ପ୍ରଶଂସା ସାଉଁଟିଥିବା ଜଣାପଡ଼ିଛି।ତାଙ୍କର ଏହି ଗବେଷଣାମୂଳକ ଯାତ୍ରାରେ ପ୍ରୋଫେସର ଡକ୍ଟର ଦୀପକ କୁମାରଙ୍କ ଉଦ୍ୟମ ଓ ମାର୍ଗଦର୍ଶନ ଅତ୍ୟନ୍ତ ପ୍ରଶଂସନୀୟ ବୋଲି କୁହାଯାଇଛି।ଡକ୍ଟର  ବାରିକ ଲୋକପ୍ରିୟ ଡାକ୍ତର କମଳାକାନ୍ତ ବାରିକଙ୍କ କନିଷ୍ଠ ପୁତ୍ର। ଜର୍ମାନୀରେ ଆୟୋଜିତ ଆନ୍ତର୍ଜାତୀୟ ବୈଜ୍ଞାନିକ ସମ୍ମିଳନୀରେ ଜଣେ ଓଡ଼ିଆ ଯୁବ ଇଞ୍ଜିନିୟର ଭାବେ ଯୋଗଦେଇ ଗବେଷଣା ସନ୍ଦର୍ଭ ଉପସ୍ଥାପନ କରିଥିବାରୁ ଅଞ୍ଚଳବାସୀ ତାଙ୍କୁ ଅଭିନନ୍ଦନ ଜଣାଇବା ସହ ତାଙ୍କର ଉଜ୍ଜ୍ୱଳ ଭବିଷ୍ୟତ କାମନା କରିଛନ୍ତି।