ପିପିଳିଆ ଉଚ୍ଚ ମାଧ୍ୟମିକ ବିଦ୍ୟାଳୟରେ ବରିଷ୍ଠ କିରାଣୀ ନନ୍ଦଲାଲ ମହାନ୍ତଙ୍କୁ ଅବସରକାଳୀନ ସମ୍ବର୍ଦ୍ଧନା

କେନ୍ଦୁଝର/ଘଟଗାଁ, ୩୧/୧୦: ଘଟଗାଁ ବ୍ଲକ ଅନ୍ତର୍ଗତ ପିପିଳିଆସ୍ଥିତ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟର ବରିଷ୍ଠ କିରାଣୀ ନନ୍ଦଲାଲ ମହାନ୍ତଙ୍କ ଅବସରକାଳୀନ ସମ୍ବର୍ଦ୍ଧନା ସଭା ବିଦ୍ୟାଳୟ ସଭାଗୃହରେ ଅଧ୍ୟକ୍ଷ ନିରାକାର ସ୍ୱାଇଁଙ୍କ ସଭାପତିତ୍ୱରେ ଆୟୋଜିତ ହୋଇଯାଇଛି।ଏହି ଅବସରରେ ବିଦ୍ୟାଳୟ ପରିଚାଳନା କମିଟିର ପୂର୍ବତନ ସମ୍ପାଦକ ଜଗବନ୍ଧୁ ମହାନ୍ତ, ସଦସ୍ୟ ହୃଷିକେଶ ମହାନ୍ତ ଓ ଉଗ୍ରସେନ ନାଏକ ଉପସ୍ଥିତ ରହି ଶ୍ରୀ ମହାନ୍ତଙ୍କ କାର୍ଯ୍ୟଦକ୍ଷତା ଓ ଅବଦାନ ସମ୍ପର୍କରେ ମତବ୍ୟକ୍ତ କରିଥିଲେ। ବିଦ୍ୟାଳୟର ଅଧ୍ୟକ୍ଷ ନିରାକାର ସ୍ୱାଇଁ ତାଙ୍କର ଉତ୍ତମ କାର୍ଯ୍ୟଶୈଳୀ, ସମୟାନୁବର୍ତ୍ତିତା ଓ କର୍ତ୍ତବ୍ୟନିଷ୍ଠାର ଉଚ୍ଚ ପ୍ରଶଂସା କରିଥିଲେ।ଦୀର୍ଘ ୩୪ ବର୍ଷ ଧରି ବିଦ୍ୟାଳୟରେ କାର୍ଯ୍ୟ କରି ଶ୍ରୀ ମହାନ୍ତ ଛାତ୍ରଛାତ୍ରୀ, ଅଧ୍ୟାପକ ଓ ଅଧ୍ୟାପିକାଙ୍କ ମଧ୍ୟରେ ଜଣେ ପରିଚିତ ଓ ଲୋକପ୍ରିୟ କର୍ମଚାରୀ ଭାବେ ସୁନାମ ଅର୍ଜନ କରିଥିଲେ।ଏହି ସମ୍ବର୍ଦ୍ଧନା ସଭାରେ ପ୍ରାଧ୍ୟାପକ ସତ୍ୟାନନ୍ଦ ପଣ୍ଡା, ଘନଶ୍ୟାମ ମହାନ୍ତ, ଅଲେଖ ପ୍ରସାଦ ସାହୁ, ଯତୀନ୍ଦ୍ର ସାହୁ, ଚନ୍ଦ୍ରଶେଖର ଭୁଁୟା, ରତ୍ନାକର ମହାନ୍ତ, ହେମନ୍ତ ମିଶ୍ର, ସମୀର ସାହୁ, ତନ୍ମୟ ବଳ, ପ୍ରାଧ୍ୟାପିକା ଅନୁସ୍ମିତା ପାଣିଗ୍ରାହୀ, ରଶ୍ମୀତା ପୃଷ୍ଟି, କାଞ୍ଚନଲତା ସାହୁଙ୍କ ସମେତ ଅଣଶିକ୍ଷକ କର୍ମଚାରୀ ଓ ଛାତ୍ରଛାତ୍ରୀ ଯୋଗଦେଇଥିଲେ।ସଭା ଶେଷରେ ଉପସ୍ଥିତ ଶିକ୍ଷକ, କର୍ମଚାରୀ ଓ ଛାତ୍ରଛାତ୍ରୀ ଏକ ଶୋଭାଯାତ୍ରାରେ ଶ୍ରୀ ମହାନ୍ତଙ୍କୁ ତାଙ୍କ ବାସଭବନ ପର୍ଯ୍ୟନ୍ତ ପାଛୋଟି ନେଇ ଭାବପୂର୍ଣ୍ଣ ବିଦାୟ ଜଣାଇଥିଲେ।

ଶ୍ରଦ୍ଧାଞ୍ଜଳି ସଭାରେ ‘ମାଆ ପାଇଁ ଗଛଟିଏ’ର ନିଆରା ପ୍ରୟାସ, ଚାରାରୋପଣ ମାଧ୍ୟମରେ ମାଆଙ୍କୁ ସ୍ମରଣ

କେନ୍ଦୁଝର/ଢେଙ୍କିକୋଟ, ୩୧/୧୦: ମାଆଙ୍କ ସ୍ମୃତିକୁ ସବୁଜିମା ମାଧ୍ୟମରେ ଅମର କରି ରଖିବା ପାଇଁ ଏକ ନିଆରା ପ୍ରୟାସ ଦେଖିବାକୁ ମିଳିଛି ଢେଙ୍କିକୋଟଠାରେ। ଧର୍ମପରାୟଣା ମହିଳା ସ୍ୱର୍ଗତା କେଶରୀ ସାହୁଙ୍କ ଏକାଦଶାହ ଅବସରରେ ଆୟୋଜିତ ସ୍ମୃତିସଭାରେ ‘ମାଆ ପାଇଁ ଗଛଟିଏ’ କାର୍ଯ୍ୟକ୍ରମ ମାଧ୍ୟମରେ ଏକ ଅଭିନବ ପରିବେଶ ସଚେତନତାର ବାର୍ତ୍ତା ଦିଆଯାଇଥିଲା।ଏହି ଅବସରରେ ସ୍ୱର୍ଗତ କେଶରୀ ସାହୁଙ୍କ ଫଟୋଚିତ୍ରରେ ପୁଷ୍ପମାଲ୍ୟ ଅର୍ପଣ କରାଯାଇଥିବା ବେଳେ ଉପସ୍ଥିତ ବିଶିଷ୍ଟ ବ୍ୟକ୍ତି ଓ ଆତ୍ମୀୟସ୍ୱଜନ ତାଙ୍କ ସ୍ମୃତିଚାରଣ କରି ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଜଣାଇଥିଲେ। ସ୍ୱାମୀ ମୁରଲୀଧର ସାହୁ, ତିନି ପୁତ୍ର ଲକ୍ଷ୍ମୀଧର ସାହୁ, ବେଣୁଧର ସାହୁ ଓ ମହେଶ୍ୱର ସାହୁଙ୍କ ସମେତ ଝିଅ, ଜ୍ୱାଇଁ ରେଣୁ-ଉଜ୍ଜ୍ୱଳ, ମିନା-ଝୁନା, କନକ-ଇନ୍ଦ୍ରମଣି ଓ ରାଧାରାଣୀ-ରାଜୀବ ଏବଂ ଅନ୍ୟ ଆତ୍ମୀୟସ୍ୱଜନ ଉପସ୍ଥିତ ଥିଲେ।ସ୍ମୃତିସଭାର ମୁଖ୍ୟ ଆକର୍ଷଣ ଥିଲା ‘ମାଆ ପାଇଁ ଗଛଟିଏ’ କାର୍ଯ୍ୟକ୍ରମ। ଏଥିରେ ବିଭିନ୍ନ କିସମର ଛୋଟ ଛୋଟ ଚାରା ରଖାଯାଇଥିଲା। ଉପସ୍ଥିତ ଲୋକମାନଙ୍କୁ ଏହି ଚାରାଗୁଡ଼ିକ ନିଜ ନିଜ ଘରେ ରୋପଣ କରିବା ପାଇଁ ପ୍ରଦାନ କରାଯାଇଥିଲା। ମାଆଙ୍କ ସ୍ମୃତିରେ ଗଛଟିଏ ଲଗାଇ ପରିବେଶ ସୁରକ୍ଷାର ବାର୍ତ୍ତା ପ୍ରସାର କରିବାର ଏହି ଉଦ୍ୟମ ସମସ୍ତଙ୍କ ମନକୁ ଛୁଇଁଥିଲା।ଏକାଦଶାହ ଅବସରରେ କଳ୍ପନା ତ୍ରିପାଠୀଙ୍କ ଦ୍ୱାରା ପ୍ରବଚନ ସହ ଭଜନ ସମାରୋହ ପରିବେଷଣ କରାଯାଇଥିଲା। ଶେଷରେ ଉପସ୍ଥିତ ସମସ୍ତେ ସ୍ୱର୍ଗତ କେଶରୀ ସାହୁଙ୍କ ଅମର ଆତ୍ମାର ସଦ୍‌ଗତି କାମନା କରିବା ସହ ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ଘଟଗାଁ ମୁକୁନ୍ଦପୁର ପାଟଣାରେ ସାଂସ୍କୃତିକ କାର୍ଯ୍ୟକ୍ରମ, ପାଲା ମାଧ୍ୟମରେ ଓଡ଼ିଆ ସଂସ୍କୃତିର ପ୍ରଚାର

କେନ୍ଦୁଝର/ଘଟଗାଁ, ୨୫/୧୦: କେନ୍ଦୁଝର ଜିଲ୍ଲା ଘଟଗାଁସ୍ଥିତ ମୁକୁନ୍ଦପୁର ପାଟଣା ଗ୍ରାମରେ ବାର୍ଡ଼ ସ୍ୱେଚ୍ଛାସେବୀ ସଂଗଠନ ଆନୁକୂଲ୍ୟରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ, ଓଡ଼ିଶା ସରକାରଙ୍କ ସହାୟତାରେ ଏକ ସାଂସ୍କୃତିକ ବିକାଶ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏହି ଅବସରରେ ଗାୟିକା ସନ୍ଧ୍ୟାରାଣୀ ନାୟକଙ୍କ ଦ୍ୱାରା ପାଲା ପରିବେଷଣ କରାଯାଇଥିଲା।ବାର୍ଡ଼ ସ୍ୱେଚ୍ଛାସେବୀ ସଂଗଠନର ଅଧ୍ୟକ୍ଷ ଅଜୟ କୁମାର ବେଜଙ୍କ ପୌରୋହିତ୍ୟରେ ଆୟୋଜିତ ସଭାରେ ସାର୍ପର ସମ୍ପାଦକ ମହେଶ୍ୱର ସାହୁ କାର୍ଯ୍ୟକ୍ରମର ଉଦ୍ଦେଶ୍ୟ ସମ୍ପର୍କରେ ସୂଚନା ଦେଇଥିଲେ। ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିର ସଂରକ୍ଷଣ ତଥା ବିକାଶ ପାଇଁ ସଂସ୍କୃତି ବିଭାଗ ପକ୍ଷରୁ ନିଆଯାଉଥିବା ପଦକ୍ଷେପକୁ ସେ ଉଚ୍ଚ ପ୍ରଶଂସା କରିଥିଲେ।ସେହିପରି ଫେକାର ସମ୍ପାଦକ ସୁଶୀଲ କୁମାର ପରିଡ଼ା ଯୋଗଦେଇ “ଭାଷା ବଞ୍ଚିଲେ ସଂସ୍କୃତି ବଞ୍ଚିବ” ବୋଲି ମତ ପ୍ରକାଶ କରିଥିଲେ। ମୁକୁନ୍ଦପୁର ପାଟଣା ମଧ୍ୟ ଇଂରାଜୀ ବିଦ୍ୟାଳୟର ପ୍ରଧାନଶିକ୍ଷକ ଆର୍ତ୍ତତ୍ରାଣ ସେଠୀ ଏବଂ ସମାଜସେବୀ ବିଶ୍ୱନାଥ ବେଜ ପ୍ରମୁଖ ଯୋଗଦେଇ ଓଡ଼ିଆ ସଂସ୍କୃତିର ପ୍ରଚାର ଓ ପ୍ରସାରରେ ପାଲାର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ।ପାରମ୍ପରିକ ପାଲା ପରିବେଷଣ ମାଧ୍ୟମରେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିର ମହତ୍ତ୍ୱକୁ ଲୋକଙ୍କ ନିକଟରେ ପହଞ୍ଚାଇବା ସହ ସାଂସ୍କୃତିକ ଐତିହ୍ୟର ସଂରକ୍ଷଣ ଉପରେ ଏହି କାର୍ଯ୍ୟକ୍ରମରେ ଗୁରୁତ୍ୱ ଦିଆଯାଇଥିଲା।

ଗୋବରାବେଡ଼ା ଉଚ୍ଚ ବିଦ୍ୟାଳୟରେ ସରାସପଶି କ୍ଲଷ୍ଟରସ୍ତରୀୟ ସୁରଭି ଉଦଯାପିତ

କେନ୍ଦୁଝର/ଘଟଗାଁ, ୧୩/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ସରାସପଶି କ୍ଲଷ୍ଟରସ୍ତରୀୟ ଶିଶୁ ମହୋତ୍ସବ ‘ସୁରଭି’ ଗୋବରାବେଡ଼ା ଉଚ୍ଚ ବିଦ୍ୟାଳୟ ପରିସରରେ ଉଦଯାପିତ ହୋଇଯାଇଛି। ଏହି ଶିଶୁ ମହୋତ୍ସବରେ ୧୬ଟି ବିଦ୍ୟାଳୟରୁ ୧୪୦ରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଅଂଶଗ୍ରହଣ କରି ନିଜର ପ୍ରତିଭା ପ୍ରଦର୍ଶନ କରିଥିଲେ।ଗୋବରାବେଡ଼ା ଉଚ୍ଚ ବିଦ୍ୟାଳୟର ପ୍ରଧାନଶିକ୍ଷକ ହଳଧର ମହାନ୍ତଙ୍କ ସଭାପତିତ୍ୱରେ ଆୟୋଜିତ ଉଦଯାପନୀ ସମାରୋହରେ ଘଟଗାଁ ବ୍ଲକ ଅଧ୍ୟକ୍ଷା ଗୀତାଞ୍ଜଳି ନାୟକ ମୁଖ୍ୟ ଅତିଥି ଏବଂ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ରାଜୀବ ଲୋଚନ ମହାନ୍ତ ସମ୍ମାନିତ ଅତିଥି ଭାବେ ଯୋଗଦେଇଥିଲେ। ବିଭିନ୍ନ ପ୍ରତିଯୋଗିତାରେ ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନ ହାସଲ କରିଥିବା କୃତୀ ପ୍ରତିଯୋଗୀଙ୍କୁ ଅତିଥିମାନେ ପୁରସ୍କାର ଓ ପ୍ରମାଣପତ୍ର ପ୍ରଦାନ କରିଥିଲେ।ଏହି ସୁରଭି କାର୍ଯ୍ୟକ୍ରମରେ ଚିତ୍ରାଙ୍କନ, ଗଳ୍ପ କଥନ, ଗଣିତ, କୁଇଜ୍‌, ବକ୍ତୃତା, ତର୍କ, ପ୍ରବନ୍ଧ ଲିଖନ, ଦେଶାତ୍ମବୋଧକ ସଙ୍ଗୀତ ଗାନ ଓ ନୃତ୍ୟ-ସଙ୍ଗୀତ ଭଳି ବିଭିନ୍ନ ପ୍ରତିଯୋଗିତା ଆୟୋଜିତ ହୋଇଥିଲା। ଛାତ୍ରଛାତ୍ରୀମାନେ ଉତ୍ସାହର ସହ ଏଥିରେ ଭାଗ ନେଇ ନିଜର ଲୁକ୍କାୟିତ ପ୍ରତିଭା ଓ ସୃଜନଶୀଳତାର ପରିଚୟ ଦେଇଥିଲେ।କାର୍ଯ୍ୟକ୍ରମଗୁଡ଼ିକୁ କିଶୋରୀ ମୋହନ ଜେନା, ଡମ୍ବରୁଧର ମହାନ୍ତ, ସତ୍ୟବ୍ରତ ନାୟକ, ଚିତ୍ରସେନ ମହାନ୍ତ, ମୁରଲୀଧର ମହାନ୍ତ, ଖଗେଶ୍ୱର ନାୟକ, ଗଦାଧର ଜେନା, କଞ୍ଚନବାଳା ଜେନା, ସିନେପ୍ରିୟ ଦେହୁରୀ, ସୁଚିସ୍ମିତା ଦାସ, ରଞ୍ଜନ କୁମାର ବେହେରା, ଆଲୋକ ସେଠୀ ଓ ଅରୁଣ କୁମାର ମହାନ୍ତଙ୍କ ସମେତ ଅନ୍ୟମାନେ ପରିଚାଳନା କରିଥିଲେ।ଏହି ଶିଶୁ ମହୋତ୍ସବ ଛାତ୍ରଛାତ୍ରୀଙ୍କ ମଧ୍ୟରେ ଥିବା ପ୍ରତିଭାର ବିକାଶ ଓ ସେମାନଙ୍କୁ ନିଜର ଦକ୍ଷତା ପ୍ରଦର୍ଶନ ପାଇଁ ଏକ ଉତ୍ତମ ମଞ୍ଚ ପ୍ରଦାନ କରିଥିଲା।

ଅବସରପ୍ରାପ୍ତ ପଞ୍ଚାୟତ ସମ୍ପାଦକଙ୍କ ଦାବିକୁ ନେଇ ରାଜ୍ୟସ୍ତରୀୟ ବୈଠକ, ମୁଖ୍ୟମନ୍ତ୍ରୀଙ୍କୁ ଦାବିପତ୍ର

କେନ୍ଦୁଝର/ଘଟଗାଁ, ୧୨/୧୦: ଓଡ଼ିଶା ଅବସରପ୍ରାପ୍ତ ଗ୍ରାମ ପଞ୍ଚାୟତ ସମ୍ପାଦକ ସଂଘର ଏକ ରାଜ୍ୟସ୍ତରୀୟ ବୈଠକ ଭୁବନେଶ୍ୱରସ୍ଥିତ ଡାଲମିଆ ଧର୍ମଶାଳାରେ ଅନୁଷ୍ଠିତ ହୋଇଛି। ବରିଷ୍ଠ ସଦସ୍ୟ ଗଦାଧର ପଟ୍ଟନାୟକଙ୍କ ସଭାପତିତ୍ୱରେ ଆୟୋଜିତ ଏହି ବୈଠକରେ ଅବସରପ୍ରାପ୍ତ ପଞ୍ଚାୟତ ସମ୍ପାଦକଙ୍କ ବିଭିନ୍ନ ସମସ୍ୟା ଓ ସଂଘର ସାଂଗଠନିକ କାର୍ଯ୍ୟକ୍ରମ ଉପରେ ଆଲୋଚନା ହୋଇଥିଲା।ଅବସର ପରେ ପଞ୍ଚାୟତ ସମ୍ପାଦକମାନଙ୍କୁ ସରକାରୀ ପ୍ରୋତ୍ସାହନ ମିଳୁନଥିବାରୁ ସେମାନେ ଆର୍ଥିକ ଅସୁବିଧାରେ ଜୀବନ ବିତାଉଥିବା ବୈଠକରେ ଉଦ୍‌ବେଗ ପ୍ରକାଶ ପାଇଥିଲା। ଏହି ସମସ୍ୟାର ସମାଧାନ ଓ ଅବସରପ୍ରାପ୍ତ କର୍ମଚାରୀଙ୍କ ସ୍ୱାର୍ଥରକ୍ଷା ପାଇଁ ରାଜ୍ୟ ସରକାର ପଦକ୍ଷେପ ନେବାକୁ ଦାବି କରାଯାଇଥିଲା। ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସଂଘ ପକ୍ଷରୁ ଏକ ଦାବିପତ୍ର ପ୍ରଦାନ କରାଯାଇଛି।ସଂଘର କାର୍ଯ୍ୟକଳାପକୁ ଅଧିକ ସକ୍ରିୟ ଓ ସୁସଂଗଠିତ କରିବା ପାଇଁ ଏକ ନୂତନ ରାଜ୍ୟସ୍ତରୀୟ କମିଟି ଗଠନ କରାଯାଇ ବିଭିନ୍ନ ପଦପଦବିରେ ଦାୟିତ୍ୱ ବଣ୍ଟନ କରାଯାଇଛି।ନୂତନ କମିଟିରେ ପ୍ରଫୁଲ୍ଲ କୁମାର ରାୟ ସଭାପତି, ବବ୍ରୁବାହନ ନାଏକ ଉପସଭାପତି, ବିରଞ୍ଚି ନାରାୟଣ ବେହେରା ସାଧାରଣ ସମ୍ପାଦକ, ଭାସ୍କର ମହାପାତ୍ର ସହସମ୍ପାଦକ ଏବଂ ଘସ୍ର ମହାନ୍ତ କୋଷାଧ୍ୟକ୍ଷ ଭାବେ ସର୍ବସମ୍ମତିକ୍ରମେ ମନୋନୀତ ହୋଇଛନ୍ତି।ସେହିପରି କେନ୍ଦୁଝର ଜିଲ୍ଲା ଅବସରପ୍ରାପ୍ତ ପିଇଓ ସଂଘର ସଭାପତି ମାୟାଧର ବାରିକ ଓ ସନ୍ତୋଷ କୁମାର ସେଠଙ୍କୁ ମୁଖ୍ୟ ଉପଦେଷ୍ଟା ଭାବେ ମନୋନୀତ କରାଯାଇଛି। ସଂଘର ପୂର୍ବତନ ସାଧାରଣ ସମ୍ପାଦକ ସ୍ୱର୍ଗତ ଭଗବାନ ମହାପାତ୍ରଙ୍କ ଝିଅ ଶୁଭଲକ୍ଷ୍ମୀ ମହାପାତ୍ରଙ୍କୁ ରାଜ୍ୟ ସଂଯୋଜକ ଦାୟିତ୍ୱ ଦିଆଯାଇଛି।ବୈଠକରେ ଯଦୁମଣି ମାଝୀ, ଦୀନବନ୍ଧୁ ବାରିକ, ରଘୁନାଥ ମହାନ୍ତ, ଗୋକୁଳାନନ୍ଦ କର, ପୂର୍ଣ୍ଣଚନ୍ଦ୍ର ମହାନ୍ତି, ପରମାନନ୍ଦ ପରିଡ଼ା, ଦୁର୍ଯ୍ୟୋଧନ ବେହେରା, ଚକ୍ରଧର ପ୍ରଧାନ, ଯୋଗିନାଥ ସାହୁ, ନରହରି ଗୌଡ଼, ଗତିକୃଷ୍ଣ ମହାନ୍ତ, ପ୍ରତାପ ଚନ୍ଦ୍ର କର, ଦେବେନ୍ଦ୍ର ବଳ, ବୃନ୍ଦାବନ ନାୟକ, ଜଗନ୍ନାଥ ମହାନ୍ତ ଓ ଶିବନାଥ ନାଗଙ୍କ ସମେତ ବିଭିନ୍ନ ଜିଲ୍ଲାର ସଦସ୍ୟମାନେ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ।ଏହି ଅବସରରେ ସଂଘ ପ୍ରତି ଉଲ୍ଲେଖନୀୟ ଅବଦାନ ପାଇଁ ମାୟାଧର ବାରିକ ଓ ଶିବ ପ୍ରସାଦ ନାଗଙ୍କୁ ସଂଘ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା।

କେନ୍ଦୁଆପଡ଼ାରେ ଭୟଙ୍କର ବାଇକ୍ ଦୁର୍ଘଟଣା: ଜଣେ ମୃତ, ଅନ୍ୟ ଜଣେ ଗୁରୁତର

କେନ୍ଦୁଝର/ଘଟଗାଁ,୧୨/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ କେନ୍ଦୁଆପଡ଼ା ଗ୍ରାମ ନିକଟରେ ଏକ ମର୍ମନ୍ତୁଦ ବାଇକ୍ ଦୁର୍ଘଟଣାରେ ଜଣେ ଯୁବକଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି। ମୃତକ ହେଲେ ଆନନ୍ଦପୁର ଥାନା ଅନ୍ତର୍ଗତ କାଠକଟା ଗ୍ରାମର ତପନ ନାଏକ। ଗୁରୁତର ଆହତ ଯୁବକ ହେଉଛନ୍ତି ସେହି ଗ୍ରାମର ଅରବିନ୍ଦ ନାଏକ।

ଗଛରେ ପିଟି ହୋଇ ଖାଲକୁ ଖସିଲା ବାଇକ୍

ସୂଚନା ଅନୁଯାୟୀ, କେନ୍ଦୁଆପଡ଼ା ଗ୍ରାମ ନିକଟରେ ଦ୍ରୁତଗତିରେ ଯାଉଥିବା ବାଇକ୍‌ଟି ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଗଛରେ ପିଟି ହୋଇଥିଲା। ପରେ ବାଇକ୍‌ଟି ପ୍ରାୟ ୨୦ ଫୁଟ୍ ଗଭୀର ଖାଲକୁ ଖସିପଡ଼ିଥିଲା। ଏଥିରେ ଦୁଇ ଯୁବକ ଗୁରୁତର ଆହତ ହୋଇଥିଲେ।

ଜଣେ ମୃତ, ଅନ୍ୟ ଜଣେ କେନ୍ଦୁଝର ସ୍ଥାନାନ୍ତର

ଦୁର୍ଘଟଣା ସମ୍ପର୍କରେ ସୂଚନା ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଭୟ ଯୁବକଙ୍କୁ ଉଦ୍ଧାର କରି ଘଟଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲା। ସେଠାରେ ଡାକ୍ତର ତପନ ନାଏକଙ୍କୁ ମୃତ ଘୋଷଣା କରିଥିଲେ। ଅନ୍ୟପକ୍ଷରେ, ଅରବିନ୍ଦ ନାଏକଙ୍କ ଅବସ୍ଥା ସଙ୍କଟାପନ୍ନ ଥିବାରୁ ପ୍ରାଥମିକ ଚିକିତ୍ସା ପରେ ତାଙ୍କୁ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି।

ଦୁର୍ଘଟଣାର ତଦନ୍ତ ଆରମ୍ଭ

ଘଟଣା ପରେ ଘଟଗାଁ ପୁଲିସ ଦୁର୍ଘଟଣାସ୍ଥଳରେ ପହଞ୍ଚି ବାଇକ୍‌ଟିକୁ ଜବତ କରିବା ସହ ତଦନ୍ତ ଆରମ୍ଭ କରିଛି। ଏହି ଦୁଃଖଦ ଘଟଣାକୁ ନେଇ କାଠକଟା ଗ୍ରାମ ସମେତ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।

ମନୋହରପୁରରେ ସେବା ସେତୁ ଅଭିଯାନ-୨୦୨୬, ୧୪୫ ଜଣଙ୍କ ସ୍ୱାସ୍ଥ୍ୟ ପରୀକ୍ଷା

କେନ୍ଦୁଝର/ଘଟଗାଁ, ୯/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ମନୋହରପୁର ଗ୍ରାମପଞ୍ଚାୟତର ସୀତାବିଞ୍ଜ କଲ୍ୟାଣ ମଣ୍ଡପଠାରେ ଶୁକ୍ରବାର ପୂର୍ବାହ୍ନରେ ସେବା ସେତୁ ଅଭିଯାନ-୨୦୨୬ ଅନୁଷ୍ଠିତ ହୋଇଯାଇଛି। ରାଜ୍ୟ ସରକାର ଓ କେନ୍ଦୁଝର ଜିଲ୍ଲା ପ୍ରଶାସନଙ୍କ ନିର୍ଦ୍ଦେଶକ୍ରମେ ଆୟୋଜିତ ଏହି କାର୍ଯ୍ୟକ୍ରମରେ ଲୋକଙ୍କୁ ବିଭିନ୍ନ ସରକାରୀ ଯୋଜନାର ସୁବିଧା ଓ ତ୍ୱରିତ ସେବା ପ୍ରଦାନ କରାଯାଇଥିଲା।ରାଜ୍ୟ ଓ କେନ୍ଦ୍ର ସରକାରଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ସମ୍ପର୍କରେ ଜନସାଧାରଣଙ୍କୁ ସଚେତନ କରିବା, ହିତାଧିକାରୀଙ୍କ ସମସ୍ୟାର ତ୍ୱରିତ ସମାଧାନ କରିବା ଏବଂ ବିଭିନ୍ନ ବିଭାଗର ସେବାକୁ ଗୋଟିଏ ସ୍ଥାନରେ ଉପଲବ୍ଧ କରାଇବା ଏହି ଅଭିଯାନର ମୁଖ୍ୟ ଉଦ୍ଦେଶ୍ୟ।ଏହି କାର୍ଯ୍ୟକ୍ରମରେ ମନୋହରପୁର ଗ୍ରାମପଞ୍ଚାୟତ ସହିତ ରୁଟିଶିଳା ଓ ପିପିଳିଆ ଗ୍ରାମପଞ୍ଚାୟତର ହିତାଧିକାରୀମାନେ ମଧ୍ୟ ସେବା ପାଇଥିଲେ। ଘଟଗାଁ ତହସିଲ, ବ୍ଲକ କୃଷି ବିଭାଗ, ଜଙ୍ଗଲ ଓ ପରିବେଶ ବିଭାଗ, ସମନ୍ୱିତ ଶିଶୁ ବିକାଶ ବିଭାଗ, ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର, ପ୍ରାଣୀଧନ ବିଭାଗ, ମତ୍ସ୍ୟ ବିଭାଗ ଓ ମଣ୍ଡଳ ଶିକ୍ଷାଧିକାରୀଙ୍କ କାର୍ଯ୍ୟାଳୟ ସମେତ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀ ଯୋଗଦେଇଥିଲେ।

ହିତାଧିକାରୀଙ୍କୁ ବିଭିନ୍ନ ସରକାରୀ ସୁବିଧା ବଣ୍ଟନ

ସେବା ସେତୁ ଅଭିଯାନରେ ୧୫ ଜଣଙ୍କୁ ବାର୍ଦ୍ଧକ୍ୟ ଭତ୍ତା, ୨ ଜଣଙ୍କୁ ଭିନ୍ନକ୍ଷମ ଭତ୍ତା, ୨୪ ଜଣଙ୍କୁ ଖାଉଟି କାର୍ଡ ଓ ୮ ଜଣଙ୍କୁ ଆୟୁଷ୍ମାନ କାର୍ଡ ପ୍ରଦାନ କରାଯାଇଥିଲା। ଏଥିସହ ୧୨ଟି ଶ୍ରମ କାର୍ଡ ବଣ୍ଟନ କରାଯିବା ସହ ୮ ଜଣ ହିତାଧିକାରୀଙ୍କୁ ସହିଦ ମାଧୋ ସିଂ ହାତପାଣ୍ଠି ଯୋଜନାରେ ସହାୟତା ଦିଆଯାଇଥିଲା।

ଅଙ୍ଗନବାଡ଼ି କ୍ଷେତ୍ରରେ ଉତ୍କୃଷ୍ଟ କାର୍ଯ୍ୟ ପାଇଁ ଜଣେ ଅଙ୍ଗନବାଡ଼ି କର୍ମୀ ଓ ଜଣେ ଅଙ୍ଗନବାଡ଼ି ସହାୟିକାଙ୍କୁ ଶ୍ରେଷ୍ଠ ପୁରସ୍କାର ପ୍ରଦାନ କରାଯାଇଥିଲା। ଜଙ୍ଗଲ ବିଭାଗ ପକ୍ଷରୁ ୫୦ରୁ ଊର୍ଦ୍ଧ୍ୱ ଜନସାଧାରଣ ଓ ପଞ୍ଚାୟତିରାଜ ପ୍ରତିନିଧିଙ୍କୁ ଚାରା ବଣ୍ଟନ କରାଯାଇଥିଲା।

୧୪୫ ଜଣଙ୍କ ସ୍ୱାସ୍ଥ୍ୟ ପରୀକ୍ଷା

ଘଟଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପକ୍ଷରୁ ଶିବିରରେ ୧୪୫ ଜଣଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା। ହିତାଧିକାରୀଙ୍କ ରକ୍ତଚାପ, ରକ୍ତ ଶର୍କରା ଓ ହିମୋଗ୍ଲୋବିନ ସ୍ତର ଆଦି ବିଭିନ୍ନ ପରୀକ୍ଷା କିଟ୍‌ ମାଧ୍ୟମରେ ଯାଞ୍ଚ କରାଯାଇଥିଲା।

ଅଧିକାରୀ ଓ ଜନପ୍ରତିନିଧିଙ୍କ ଯୋଗଦାନ

କାର୍ଯ୍ୟକ୍ରମରେ ଘଟଗାଁ ବିଡିଓ ଖଗେଶ୍ୱର ବରାଳ, ଡାକ୍ତର ମୁକ୍ତିକାନ୍ତ ନାୟକ, ସହକାରୀ ଶ୍ରମ ଅଧିକାରୀ ଘନଶ୍ୟାମ ମହାନ୍ତ, ଏବିଡିଓ ଚିତ୍ତରଞ୍ଜନ ନାୟକ, ମଙ୍ଗଳ ସମ୍ପ୍ରସାରଣ ଅଧିକାରୀ କାଳିଦାସ ମୁର୍ମୁ, ସାମାଜିକ ସୁରକ୍ଷା ବିଭାଗର କନିଷ୍ଠ ସହାୟକ ସବିତା ପଣ୍ଡିତ, ବ୍ଲକ ଗ୍ରାମୀଣ ଆବାସ ସେଲ୍‌ର କ୍ଷଣପ୍ରଭା ନାୟକ ଓ ଗୋଷ୍ଠୀ ସ୍ୱାସ୍ଥ୍ୟ ଅଧିକାରୀ ସ୍ୱାତୀ ସୁଚରିତା ବିଶ୍ୱାଳ ପ୍ରମୁଖ ଯୋଗଦେଇଥିଲେ।ସେହିପରି ବରିଷ୍ଠ ନିର୍ବାହୀ ଅଧିକାରୀ ସାରଙ୍ଗଧର ରଣା, ଚିତ୍ରସେନ ମହାନ୍ତ, ଯତୀନ୍ଦ୍ର ପାତ୍ର ଓ ହରପ୍ରିୟା ଦେଓଗାନଙ୍କ ସମେତ ଅନ୍ୟ ଅଧିକାରୀ ଓ କର୍ମଚାରୀ ସକ୍ରିୟ ଭାବେ ଯୋଗଦେଇଥିଲେ। ମନୋହରପୁର ସରପଞ୍ଚ ଦୁଃଶାସନ ନାୟକ, ଏଡିଇଓ ଭରତ ମହାନ୍ତ, ନରସିଂହ ମାଝୀଙ୍କ ସମେତ ପଞ୍ଚାୟତିରାଜ ପ୍ରତିନିଧି ଓ ସ୍ଥାନୀୟ ଜନସାଧାରଣ କାର୍ଯ୍ୟକ୍ରମରେ ସହଯୋଗ କରିଥିଲେ।

କାର୍‌-ବାଇକ୍‌ ମୁହାଁମୁହିଁ ଧକ୍କା: ଜଣେ ସଙ୍କଟାପନ୍ନ, ୩ ଆହତ; କାର୍‌ ଚାଳକ ଫେରାର

କେନ୍ଦୁଝର/ଘଟଗାଁ:୯/୧୦,କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ୨୦ ନମ୍ବର ଜାତୀୟ ରାଜପଥର ବାଙ୍କପାଟୁଳି ନିକଟରେ ଏକ ଭୟାବହ ସଡ଼କ ଦୁର୍ଘଟଣା ଘଟିଛି। ଏକ କାର୍‌ ଓ ବାଇକ୍‌ ମଧ୍ୟରେ ମୁହାଁମୁହିଁ ଧକ୍କା ହେବାରୁ ଜଣେ ବୃଦ୍ଧଙ୍କ ସମେତ ତିନି ଜଣ ବାଇକ୍‌ ଆରୋହୀ ଗୁରୁତର ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ବୃଦ୍ଧଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି। ଏଥିସହ କାର୍‌ରେ ଥିବା ଦୁଇ ଜଣ ମହିଳା ମଧ୍ୟ ଆହତ ହୋଇଛନ୍ତି।ସୂଚନା ଅନୁଯାୟୀ, ବାଙ୍କପାଟୁଳି ହାଟରୁ ବାଇକ୍‌ ଆରୋହୀମାନେ ଭୁଲ୍‌ ରାସ୍ତାରେ ଆସୁଥିବା ବେଳେ ଏକ ଧଳା ରଙ୍ଗର କାର୍‌ ସହ ସେମାନଙ୍କର ମୁହାଁମୁହିଁ ଧକ୍କା ହୋଇଥିଲା। ଧକ୍କା ଏତେ ଜୋର୍‌ଦାର ଥିଲା ଯେ ବାଇକ୍‌ଟି ସମ୍ପୂର୍ଣ୍ଣ ଭାଙ୍ଗି ଚୂରମାର ହୋଇଯାଇଥିଲା। ବାଇକ୍‌ରେ ଥିବା ତିନି ଜଣ ରାସ୍ତା ଉପରକୁ ଛିଟିକି ପଡ଼ି ଗୁରୁତର ଆହତ ହୋଇଥିଲେ। ଦୁର୍ଘଟଣାରେ କାର୍‌ର ସମ୍ମୁଖ ଭାଗ ମଧ୍ୟ ବ୍ୟାପକ ଭାବେ କ୍ଷତିଗ୍ରସ୍ତ ହୋଇଛି।ଘଟଣାସ୍ଥଳରେ ଆହତଙ୍କ ଜିନିଷପତ୍ର ଓ ପନିପରିବା ବିଞ୍ଚି ହୋଇ ପଡ଼ିଥିବା ଦେଖାଯାଇଥିଲା। ଦୁର୍ଘଟଣା ପରେ ସ୍ଥାନୀୟ ଲୋକେ ତୁରନ୍ତ ପହଞ୍ଚି ଆହତମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ନିକଟସ୍ଥ ଡାକ୍ତରଖାନାକୁ ପଠାଇଥିଲେ।ଅନ୍ୟପକ୍ଷରେ, ଦୁର୍ଘଟଣା ପରେ କାର୍‌ ଚାଳକ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି। ଖବର ପାଇ ଘଟଗାଁ ପୁଲିସ ଘଟଣାସ୍ଥଳରେ ପହଞ୍ଚି ଉଭୟ ଗାଡ଼ିକୁ ଜବତ କରିବା ସହ ଦୁର୍ଘଟଣାର କାରଣ ଓ ଫେରାର କାର୍‌ ଚାଳକଙ୍କ ସମ୍ପର୍କରେ ଅଧିକ ତଦନ୍ତ ଜାରି ରଖିଛି।

ଗୋରୁ ବୋଝେଇ ବୋଲେରୋ ଜବତ, ୨ ଗୋରୁ ମୃତ; ଡ୍ରାଇଭର ଅଟକ

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ପିପିଳିଆ-ସରାସପଶି ରାସ୍ତାରେ ବେଆଇନ ଗୋରୁ ଚାଲାଣ ଅଭିଯୋଗରେ ଏକ ଗୋରୁ ବୋଝେଇ ବୋଲେରୋ ପିକ୍‌ଅପ୍‌ ଭ୍ୟାନ୍‌କୁ ଜବତ କରାଯାଇଛି। ଗାଡ଼ିଟି ଦୁର୍ଘଟଣାଗ୍ରସ୍ତ ହୋଇ ରାସ୍ତାକଡ଼ ଆକାଶିଆ ଜଙ୍ଗଲ ଭିତରକୁ ପଶିଯିବାରୁ ୨ଟି ଗୋରୁଙ୍କର ମୃତ୍ୟୁ ଘଟିଛି। ଘଟଣାରେ ଗାଡ଼ି ଚାଳକଙ୍କୁ ପୁଲିସ ହେପାଜତକୁ ନେଇଛି।ମିଳିଥିବା ସୂଚନା ଅନୁଯାୟୀ, ମଙ୍ଗଳବାର ସକାଳେ ଏକ ବୋଲେରୋ ପିକ୍‌ଅପ୍‌ ଭ୍ୟାନ୍‌ରେ ଅମାନୁଷିକ ଭାବେ ଗୋରୁ ଚାଲାଣ ହେଉଥିବା ଦେଖି ସ୍ଥାନୀୟ ଲୋକଙ୍କ ସନ୍ଦେହ ହୋଇଥିଲା। ଗ୍ରାମବାସୀ ଗାଡ଼ିଟିକୁ ପିଛା କରିବାରୁ ଡ୍ରାଇଭର ଦ୍ରୁତଗତିରେ ଖସି ପଳାଇବାକୁ ଚେଷ୍ଟା କରିଥିଲେ। ଏହି ସମୟରେ ଗାଡ଼ିଟି ଭାରସାମ୍ୟ ହରାଇ ରାସ୍ତାକଡ଼ ଆକାଶିଆ ବଣ ଭିତରକୁ ପଶିଯାଇଥିଲା।ସ୍ଥାନୀୟ ଲୋକେ ଘଟଣାସ୍ଥଳରେ ପହଞ୍ଚି ଡ୍ରାଇଭରଙ୍କୁ କାବୁ କରିଥିଲେ। ଗାଡ଼ି ଭିତରେ ଚାପି ହୋଇ ରହିଥିବା ୨ଟି ଗୋରୁଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା।ଖବର ପାଇ ଢେଙ୍କିକୋଟ ପୁଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ବୋଲେରୋ ପିକ୍‌ଅପ୍‌ ଭ୍ୟାନ୍‌କୁ ଜବତ କରିବା ସହ ଡ୍ରାଇଭରଙ୍କୁ ହେପାଜତକୁ ନେଇଥିଲେ। ମୃତ ଗୋରୁଙ୍କ ଶବ ବ୍ୟବଚ୍ଛେଦ କରାଯାଇଛି।ଗାଡ଼ିରେ ମୋଟ ୪ଟି ଗୋରୁ ଥିବା ଜଣାପଡ଼ିଛି। ଉଦ୍ଧାର ସମୟରେ ଗୋଟିଏ ଗୋରୁ ଜଙ୍ଗଲ ଭିତରକୁ ଦୌଡ଼ି ପଳାଇଥିବା ବେଳେ ଅନ୍ୟ ୩ଟି ଗୋରୁଙ୍କୁ ଉଦ୍ଧାର କରି ଗୋଶାଳାକୁ ପଠାଯାଇଛି।ପୁଲିସର ନାକାବନ୍ଦି ସତ୍ତ୍ୱେ ଗାଁ ଗହଳିର ବିଭିନ୍ନ ଗଳାବାଟ ଦେଇ ଗୋରୁ ଚାଲାଣ ହେଉଥିବା ଘଟଣା ପୁଣିଥରେ ସାମ୍ନାକୁ ଆସିଛି। ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିବା ବେଳେ ପୁଲିସ ଘଟଣାର ତଦନ୍ତ ଜାରି ରଖିଛି।

ବିପଦସଙ୍କୁଳ ଅଙ୍ଗନବାଡ଼ି ଗୃହ: ୩ ବର୍ଷ ହେଲା ଦିଦିଙ୍କ ବାରଣ୍ଡାରେ ପାଠ ପଢ଼ୁଛନ୍ତି କୁନିକୁନି ପିଲା

କେନ୍ଦୁଝର/ଘଟଗାଁ, ୬/୧୦: ଶିଶୁମାନଙ୍କ ପ୍ରାରମ୍ଭିକ ଶିକ୍ଷା ଓ ପୁଷ୍ଟିକର ଖାଦ୍ୟ ଯୋଗାଣ ପାଇଁ ସରକାର ବିଭିନ୍ନ ଯୋଜନାରେ କୋଟି କୋଟି ଟଙ୍କା ବ୍ୟୟ କରୁଛନ୍ତି। ହେଲେ କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ଗୋବରାବେଡ଼ା ଗ୍ରାମରେ ଅଙ୍ଗନବାଡ଼ି କେନ୍ଦ୍ରର ଦୁରବସ୍ଥା ସରକାରୀ ବ୍ୟବସ୍ଥାର ବାସ୍ତବ ଚିତ୍ରକୁ ପଦାରେ ପକାଇଛି। ନିଜସ୍ୱ ଅଙ୍ଗନବାଡ଼ି ଗୃହ ବିପଦସଙ୍କୁଳ ହୋଇପଡ଼ିଥିବାରୁ ଦୀର୍ଘ ୩ ବର୍ଷରୁ ଊର୍ଦ୍ଧ୍ୱ ସମୟ ଧରି ଅଙ୍ଗନବାଡ଼ି ଦିଦିଙ୍କ ଘର ବାରଣ୍ଡାରେ ଚାଲିଛି କୁନିକୁନି ପିଲାଙ୍କ ପାଠପଢ଼ା।

୧୯୮୬ରେ ସ୍ଥାପିତ ହୋଇଥିଲା କେନ୍ଦ୍ର

ମିଳିଥିବା ସୂଚନା ଅନୁଯାୟୀ, ଗୋବରାବେଡ଼ା ଗ୍ରାମରେ ଥିବା ଏହି ଅଙ୍ଗନବାଡ଼ି କେନ୍ଦ୍ରଟି ୧୯୮୬ ମସିହା ନଭେମ୍ବର ୨୬ ତାରିଖରେ ସ୍ଥାପିତ ହୋଇଥିଲା। ଦୀର୍ଘ ବର୍ଷ ଧରି ରକ୍ଷଣାବେକ୍ଷଣ ଅଭାବରୁ ଗୃହଟି ଜରାଜୀର୍ଣ୍ଣ ହୋଇପଡ଼ିଛି। ଛାତରୁ ଟାଇଲ୍ ଖସୁଥିବାରୁ ଏଠାରେ ଛୋଟ ଛୋଟ ପିଲାଙ୍କୁ ବସାଇ ପାଠ ପଢ଼ାଇବା ବିପଦପୂର୍ଣ୍ଣ ହୋଇପଡ଼ିଛି।

ବାରଣ୍ଡାରେ ପାଠପଢ଼ା ସହ ରୋଷେଇ

ଶିଶୁମାନଙ୍କ ଜୀବନ ପ୍ରତି ବିପଦ ଥିବାରୁ ଅଙ୍ଗନବାଡ଼ି କର୍ମୀ ବାଧ୍ୟ ହୋଇ ନିଜ ଘର ବାରଣ୍ଡାରେ ପିଲାମାନଙ୍କୁ ବସାଇ ଶିକ୍ଷାଦାନ କରୁଛନ୍ତି। କେବଳ ପାଠପଢ଼ା ନୁହେଁ, ବାରଣ୍ଡାର ଗୋଟିଏ କୋଣରେ ରୋଷେଇ କରାଯାଇ ପିଲାମାନଙ୍କୁ ଖାଦ୍ୟ ମଧ୍ୟ ପରିବେଷଣ କରାଯାଉଛି।ଫଳରେ ଖରା, ବର୍ଷା ଓ ଶୀତ କାକରରେ କୋମଳମତି ଶିଶୁମାନଙ୍କୁ ବିଭିନ୍ନ ଅସୁବିଧାର ସାମ୍ନା କରିବାକୁ ପଡ଼ୁଛି। ଉପଯୁକ୍ତ ଶିକ୍ଷାଦାନ ପରିବେଶ ସହିତ ପିଲାଙ୍କ ସୁରକ୍ଷା ଓ ସ୍ୱାସ୍ଥ୍ୟକୁ ନେଇ ମଧ୍ୟ ଚିନ୍ତା ବଢ଼ିଛି।

ନୂତନ ଅଙ୍ଗନବାଡ଼ି ଗୃହ ନିର୍ମାଣ ପାଇଁ ଦାବି

ଏହି ସମସ୍ୟା ସମ୍ପର୍କରେ ପ୍ରଶାସନର ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ ଏଯାଏଁ କୌଣସି ସୁଫଳ ମିଳିନଥିବା ଅଭିଯୋଗ ହୋଇଛି। ଦୀର୍ଘ ତିନି ବର୍ଷ ଧରି ଏଭଳି ପରିସ୍ଥିତିରେ ପିଲାମାନଙ୍କ ପାଠପଢ଼ା ଚାଲିଥିବାରୁ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।ତେଣୁ ଶିଶୁମାନଙ୍କ ସୁରକ୍ଷା, ଶିକ୍ଷା ଓ ଉଜ୍ଜ୍ୱଳ ଭବିଷ୍ୟତକୁ ଗୁରୁତ୍ୱ ଦେଇ ଗୋବରାବେଡ଼ା ଗ୍ରାମରେ ତୁରନ୍ତ ଏକ ନୂତନ ଅଙ୍ଗନବାଡ଼ି ଗୃହ ନିର୍ମାଣ କରିବାକୁ ଗ୍ରାମବାସୀ ଦୃଢ଼ ଦାବି କରିଛନ୍ତି। ଏବେ ପ୍ରଶାସନ କେବେ ଏହି ସମସ୍ୟାର ସମାଧାନ କରୁଛି, ତାହାକୁ ଅପେକ୍ଷା କରିଛନ୍ତି ଗ୍ରାମବାସୀ।

ତୋରାଣିପୋଖରୀ-ଜାମୁପଶି ରାସ୍ତା ଶୋଚନୀୟ: ଖାଲଖମାରେ ଯାତାୟାତ ଦୁର୍ବିସହ, ମରାମତି ଦାବି

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ତୋରାଣିପୋଖରୀ ଛକଠାରୁ ଜାମୁପଶି ଭାୟା ବାରିଗାଁ ଆର୍‌ଡି ରୋଡ୍‌ର ଅବସ୍ଥା ଏବେ ଶୋଚନୀୟ ହୋଇପଡ଼ିଛି। ରାସ୍ତାରେ ବଡ଼ ବଡ଼ ଖାଲଖମା ସୃଷ୍ଟି ହୋଇଥିବାରୁ ଯାତାୟାତରେ ସମସ୍ୟା ଉପୁଜିବା ସହ ଛୋଟମୋଟ ଦୁର୍ଘଟଣା ଘଟୁଥିବା ଗ୍ରାମବାସୀ ଅଭିଯୋଗ କରିଛନ୍ତି।ସୂଚନା ଅନୁଯାୟୀ, ୨୦୨୧-୨୨ ମସିହାରେ ତୋରାଣିପୋଖରୀ ଛକଠାରୁ ଜାମୁପଶି ଭାୟା ବାରିଗାଁ ପର୍ଯ୍ୟନ୍ତ ପ୍ରାୟ ୩ କିଲୋମିଟର ରାସ୍ତା ପିଚୁ କରାଯାଇଥିଲା। ତେବେ ନିର୍ମାଣର କିଛି ବର୍ଷ ମଧ୍ୟରେ ରାସ୍ତାର ବିଭିନ୍ନ ସ୍ଥାନରେ ପିଚୁ ଉଠିଯିବା ସହ ଖାଲଖମା ହୋଇଯାଇଛି।ଏହି ରାସ୍ତାର ନିର୍ମାଣ କାର୍ଯ୍ୟ କରିଥିବା ଠିକାଦାର ତ୍ରିପୁରା ଦେହୁରୀଙ୍କ ଉପରେ କାର୍ଯ୍ୟ ସମାପ୍ତି ପରେ ୫ ବର୍ଷ ପର୍ଯ୍ୟନ୍ତ ରକ୍ଷାଣବେକ୍ଷଣ ଦାୟିତ୍ୱ ଥିବା କୁହାଯାଉଛି। ଏହି ରକ୍ଷାଣବେକ୍ଷଣ ଅବଧି ୪ ଜାନୁଆରୀ ୨୦୨୭ ପର୍ଯ୍ୟନ୍ତ ଥିବା ସତ୍ତ୍ୱେ ରାସ୍ତାର ମରାମତି କରାଯାଉନଥିବା ନେଇ ଗ୍ରାମବାସୀ ଅଭିଯୋଗ କରିଛନ୍ତି।ରାସ୍ତାର ଶୋଚନୀୟ ଅବସ୍ଥା ଯୋଗୁଁ ଦୈନନ୍ଦିନ ଯାତାୟାତ କରୁଥିବା ଲୋକେ ହଇରାଣ ହେଉଥିବା ବେଳେ ଦୁର୍ଘଟଣାର ଆଶଙ୍କା ମଧ୍ୟ ବଢ଼ିଛି। ତେଣୁ ତୋରାଣିପୋଖରୀ-ଜାମୁପଶି ରାସ୍ତାର ତୁରନ୍ତ ମରାମତି କରି ଯାତାୟାତ ଉପଯୋଗୀ କରିବାକୁ ଗ୍ରାମବାସୀ ପ୍ରଶାସନ ନିକଟରେ ଦାବି କରିଛନ୍ତି।

ଭୀମକୁଣ୍ଡରେ ନାକାବନ୍ଦୀ ବେଳେ ୨ ଦେଶୀ ବନ୍ଧୁକ ସହ ମାରଣାସ୍ତ୍ର ଜବତ, ୩ ଗିରଫ

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅଞ୍ଚଳର ଭୀମକୁଣ୍ଡ ନିକଟରେ ନାକାବନ୍ଦୀ ସମୟରେ ପୁଲିସ ବିପୁଳ ମାରଣାସ୍ତ୍ର ଜବତ କରିବା ସହ ୩ ଜଣ ଯୁବକଙ୍କୁ ଗିରଫ କରିଛି। ଜବତ ସାମଗ୍ରୀ ମଧ୍ୟରେ ୨ଟି ଦେଶୀ ବନ୍ଧୁକ, ୨ଟି ଲୁହା ନଳ, ୫ଟି ମୁନିଆ ତୀର, ଗୋଟିଏ ଧନୁ ଏବଂ ଗୋଟିଏ ଲୁହା ରଡ୍‌ ରହିଛି। ଏଥିସହ ଅଭିଯୁକ୍ତମାନେ ବ୍ୟବହାର କରୁଥିବା ଏକ ହିରୋ ଏଚ୍‌ଏଫ୍‌ ଡିଲକ୍ସ ବାଇକ୍‌କୁ ମଧ୍ୟ ପୁଲିସ ଜବତ କରିଛି।ସୂଚନା ଅନୁଯାୟୀ, ପାଟଣା ବ୍ଲକ ତଥା ଘଟଗାଁ ଥାନା ଅଧୀନ ଡୁମୁରିଆ ପଞ୍ଚାୟତର ଘାଟବାଲିଯୋଡ଼ି ଗ୍ରାମ ଭୀମକୁଣ୍ଡ ନିକଟରେ ଘଟଗାଁ ପୁଲିସ ପକ୍ଷରୁ ନାକାବନ୍ଦୀ କରାଯାଇଥିଲା। ପ୍ରାୟ ସାଢ଼େ ୮ଟା ସମୟରେ କରଞ୍ଜିଆ ଉପଖଣ୍ଡ ଅଞ୍ଚଳରୁ ଏକ ବାଇକ୍‌ରେ ୩ ଜଣ ଯୁବକ ଆସୁଥିବା ପୁଲିସ ଦେଖିଥିଲା।ଯୁବକମାନଙ୍କ ଗତିବିଧି ଉପରେ ସନ୍ଦେହ ହେବାରୁ ପୁଲିସ ବାଇକ୍‌ଟିକୁ ଅଟକାଇ ଯାଞ୍ଚ କରିଥିଲା। ଯାଞ୍ଚ ସମୟରେ ବାଇକ୍‌ରେ ଥିବା ଏକ ଅଖା ବ୍ୟାଗ୍‌ରୁ ୨ଟି ଦେଶୀ ବନ୍ଧୁକ, ୨ଟି ଲୁହା ନଳ, ୫ଟି ମୁନିଆ ତୀର, ଗୋଟିଏ ଧନୁ ଓ ଗୋଟିଏ ଲୁହା ରଡ୍‌ ମିଳିଥିଲା। ପୁଲିସ ସମସ୍ତ ମାରଣାସ୍ତ୍ର ଜବତ କରିବା ସହ ୩ ଅଭିଯୁକ୍ତଙ୍କୁ ଗିରଫ କରିଛି।ଗିରଫ ଅଭିଯୁକ୍ତମାନେ ହେଲେ କରଞ୍ଜିଆ ଥାନା କୋଳିପଶି ଗ୍ରାମର ଲକ୍ଷ୍ମଣ ହାସଦାଙ୍କ ପୁଅ ରାମ ହାସଦା (୨୩), ସୁନାରାମ ମାରାଣ୍ଡିଙ୍କ ପୁଅ ଭାଦା ମାରାଣ୍ଡି (୨୫) ଏବଂ ଜିତୁରାମ ହାସଦାଙ୍କ ପୁଅ ମୋହନ ହାସଦା (୨୪)।ପୁଲିସର ପଚରାଉଚରା ସତ୍ତ୍ୱେ ଅଭିଯୁକ୍ତମାନେ ଜବତ ଅସ୍ତ୍ରଶସ୍ତ୍ର ସମ୍ପର୍କରେ ସନ୍ତୋଷଜନକ ସୂଚନା ଦେଇପାରିନଥିବା ଜଣାପଡ଼ିଛି। ସେମାନଙ୍କ ପାଖରେ ବନ୍ଧୁକର କୌଣସି ଲାଇସେନ୍ସ ମଧ୍ୟ ନଥିବା ପୁଲିସ କହିଛି। ସେମାନେ କେବଳ ଘଟଗାଁ ଯାଉଥିବା ପୁଲିସକୁ କହିଥିବା ସୂଚନା ମିଳିଛି।ଏନେଇ ଘଟଗାଁ ପୁଲିସ ପକ୍ଷରୁ ଅଭିଯୁକ୍ତମାନଙ୍କ ବିରୋଧରେ ଆର୍ମସ୍‌ ଆକ୍ଟର ଧାରା ୨୫ ଅନୁଯାୟୀ ମାମଲା ରୁଜୁ କରାଯାଇଛି। ଘଟଣାର ଅଧିକ ତଦନ୍ତ ଜାରି ରହିଥିବା ଘଟଗାଁ ଥାନାଧିକାରୀ ଶୁଭ୍ରାନ୍ତ କୁମାର ଜେନା ସୂଚନା ଦେଇଛନ୍ତି।

ଭୋଳବେଡ଼ାରେ ସେବା ସେତୁ କାର୍ଯ୍ୟକ୍ରମ: ୪୪ ଜଣଙ୍କୁ ଆୟୁଷ୍ମାନ କାର୍ଡ, ୩୯ ଜଣଙ୍କୁ ବାର୍ଦ୍ଧକ୍ୟ ଭତ୍ତା

କେନ୍ଦୁଝର/ଘଟଗାଁ, ୬/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ଭୋଳବେଡ଼ା ଗ୍ରାମ ପଞ୍ଚାୟତରେ ବ୍ଲକସ୍ତରୀୟ ସେବା ସେତୁ ଅଭିଯାନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅଭିଯାନ ମାଧ୍ୟମରେ ବିଭିନ୍ନ ସରକାରୀ ଯୋଜନାର ସୁବିଧା ହିତାଧିକାରୀଙ୍କ ନିକଟରେ ପହଞ୍ଚାଇବା ସହ ଲୋକଙ୍କୁ ବିଭିନ୍ନ ସେବା ପ୍ରଦାନ କରାଯାଇଥିଲା।କାର୍ଯ୍ୟକ୍ରମରେ ୩୯ ଜଣଙ୍କୁ ବାର୍ଦ୍ଧକ୍ୟ ଭତ୍ତା, ୨ ଜଣଙ୍କୁ ବିକଳାଙ୍ଗ ଭତ୍ତା, ୨୦ ଜଣଙ୍କୁ ଖାଉଟି କାର୍ଡ ଏବଂ ୪୪ ଜଣଙ୍କୁ ଆୟୁଷ୍ମାନ ଜନ ଆରୋଗ୍ୟ ଯୋଜନା କାର୍ଡ ପ୍ରଦାନ କରାଯାଇଥିଲା। ଏଥିସହ ସ୍ୱୟଂ ସହାୟକ ଗୋଷ୍ଠୀଙ୍କୁ ଋଣ ପ୍ରଦାନ ନିମନ୍ତେ ମଧ୍ୟ ପଦକ୍ଷେପ ନିଆଯାଇଥିଲା।ସ୍ୱାସ୍ଥ୍ୟ ବିଭାଗ ପକ୍ଷରୁ ୬୫ ଜଣଙ୍କ ସ୍ୱାସ୍ଥ୍ୟ ପରୀକ୍ଷା କରାଯାଇଥିଲା। ଆବଶ୍ୟକତା ଅନୁଯାୟୀ ହିତାଧିକାରୀଙ୍କୁ ଔଷଧ ବଣ୍ଟନ କରାଯାଇଥିଲା। ସେହିପରି ୮ ଜଣ ହିତାଧିକାରୀଙ୍କୁ ପଟ୍ଟା ଓ ଜାତିଗତ ପ୍ରମାଣପତ୍ର ପ୍ରଦାନ କରାଯାଇଥିଲା।ବନବିଭାଗ ପକ୍ଷରୁ ହାତୀ ଆକ୍ରମଣରେ ମୃତ୍ୟୁ ଘଟିଥିବା ଘଟଣାରେ ସହାୟତା ବାବଦରେ ୧୦ ଲକ୍ଷ ଟଙ୍କା ପ୍ରଦାନ କରାଯାଇଥିଲା। ଏଥିସହ ୧୦୦ରୁ ଊର୍ଦ୍ଧ୍ୱ ଲୋକଙ୍କୁ ଚାରା ବଣ୍ଟନ କରାଯାଇ ପରିବେଶ ସୁରକ୍ଷା ନେଇ ସଚେତନତା ସୃଷ୍ଟି କରାଯାଇଥିଲା।କାର୍ଯ୍ୟକ୍ରମରେ କେନ୍ଦୁଝରର ନାଟ୍ୟଦଳ ପକ୍ଷରୁ ପଥପ୍ରାନ୍ତ ନାଟକ ପରିବେଷଣ କରାଯାଇଥିଲା। ସେବା ସଂକଳ୍ପ ଅଭିଯାନ ମାଧ୍ୟମରେ ବିକଶିତ ଭାରତର ସ୍ୱପ୍ନ ସାକାର କରିବା ନେଇ ଲୋକଙ୍କୁ ସଚେତନ କରାଯାଇଥିଲା।ବିଡିଓ ଖଗେଶ୍ୱର ବରାଳଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଏବିଡିଓ ଚିତ୍ତରଞ୍ଜନ ନାୟକ, ସହକାରୀ ଶ୍ରମ ଅଧିକାରୀ ଘନଶ୍ୟାମ ମହାନ୍ତ, ସହକାରୀ କୃଷି ଅଧିକାରୀ ଅଜିତ କୁମାର ସାମଲ, ବ୍ଲକ ସାମାଜିକ ସୁରକ୍ଷା ଅଧିକାରୀ ଗୋପାଳକୃଷ୍ଣ ବାରିକ, ମଙ୍ଗଳ ସମ୍ପ୍ରସାରଣ ଅଧିକାରୀ କାଳିଦାସ ମୁର୍ମୁ, ଯୋଗାଣ ବିଭାଗର ସଞ୍ଜିତ ଘଣା, ଗ୍ରାମୀଣ ଆବାସ ସେଲର କ୍ଷଣପ୍ରଭା ନାୟକ, ଭିବିଜିରାମଜୀ ସେଲର ସୁବ୍ରତ ତ୍ରିପାଠୀଙ୍କ ସମେତ ପଞ୍ଚାୟତିରାଜ ପ୍ରତିନିଧି ଓ ଘଟଗାଁ ବନବିଭାଗର ଅଧିକାରୀମାନେ ଉପସ୍ଥିତ ରହି ସକ୍ରିୟ ସହଯୋଗ କରିଥିଲେ।

ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରେ ପ୍ରବେଶ ଉତ୍ସବ: ପ୍ରଥମ ବ୍ୟାଚର ୬୦ ଛାତ୍ରଛାତ୍ରୀଙ୍କୁ ସ୍ୱାଗତ

କେନ୍ଦୁଝର/ଘଟଗାଁ, ୫/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଖୁଣ୍ଟାପଡ଼ାସ୍ଥିତ ନବନିର୍ମିତ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟରେ ପ୍ରଥମ ବ୍ୟାଚ ଛାତ୍ରଛାତ୍ରୀଙ୍କୁ ନେଇ ପ୍ରବେଶ ଉତ୍ସବ ଅନୁଷ୍ଠିତ ହୋଇଛି। ବିଦ୍ୟାଳୟରେ ପ୍ରଥମ ଥର ପାଇଁ ନାମ ଲେଖାଇଥିବା ଷଷ୍ଠ ଶ୍ରେଣୀର ୬୦ ଜଣ ଛାତ୍ରଛାତ୍ରୀ ଏହି ପ୍ରବେଶ ଉତ୍ସବରେ ସାମିଲ ହୋଇଥିଲେ।ବିଦ୍ୟାଳୟର ଅଧ୍ୟକ୍ଷ ମୁକେଶ କୁମାର ଶର୍ମାଙ୍କ ଅଧ୍ୟକ୍ଷତାରେ ଆୟୋଜିତ ଉତ୍ସବରେ କେନ୍ଦୁଝର ସାଂସଦ ଅନନ୍ତ ନାୟକ ମୁଖ୍ୟ ଅତିଥି ଭାବେ ଯୋଗଦେଇଥିଲେ। ସେହିପରି ସାଂସଦ ପ୍ରତିନିଧି ଅଖିଳ ପାତ୍ର ଓ ବ୍ଲକ ମଙ୍ଗଳ ସମ୍ପ୍ରସାରଣ ଅଧିକାରୀ କାଳିଦାଶ ମୁର୍ମୁ ସମ୍ମାନିତ ଅତିଥି ଭାବେ ଯୋଗଦେଇଥିଲେ।ଏହି ଅବସରରେ ସାଂସଦ ଅନନ୍ତ ନାୟକ ନବାଗତ ଷଷ୍ଠ ଶ୍ରେଣୀର ଛାତ୍ରଛାତ୍ରୀଙ୍କୁ ଶିକ୍ଷା ପ୍ରତି ମନୋଯୋଗୀ ହୋଇ ଭଲ ପାଠ ପଢ଼ିବା ସହ ଭବିଷ୍ୟତରେ ଜଣେ ଭଲ ମଣିଷ ହେବାକୁ ପରାମର୍ଶ ଦେଇଥିଲେ। ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟ ଛାତ୍ରଛାତ୍ରୀଙ୍କ ଶିକ୍ଷା ସହ ସେମାନଙ୍କ ସର୍ବାଙ୍ଗୀଣ ବିକାଶରେ ସହାୟକ ହେବ ବୋଲି ଅତିଥିମାନେ ଆଶାବ୍ୟକ୍ତ କରିଥିଲେ।କାର୍ଯ୍ୟକ୍ରମରେ ପଇଦାପାଟଣା ସରପଞ୍ଚ ମୁକୁନ୍ଦ ମୁଣ୍ଡାଙ୍କ ସମେତ ବିଦ୍ୟାଳୟର ଶିକ୍ଷକ-ଶିକ୍ଷୟିତ୍ରୀ, ଅଭିଭାବକ ଓ ଅନ୍ୟମାନେ ଉପସ୍ଥିତ ଥିଲେ। ପ୍ରଥମ ବ୍ୟାଚର ଛାତ୍ରଛାତ୍ରୀଙ୍କ ପ୍ରବେଶକୁ ନେଇ ବିଦ୍ୟାଳୟ ପରିସରରେ ଉତ୍ସାହର ପରିବେଶ ସୃଷ୍ଟି ହୋଇଥିଲା।

ଦକ୍ଷତା ବିକାଶ କେନ୍ଦ୍ର ପରିଦର୍ଶନ କଲେ ରାଜ୍ୟ ହସ୍ତଶିଳ୍ପ ବିଭାଗ ନିର୍ଦ୍ଦେଶିକା ଡ଼ଃ ନିବେଦିତା ପୃଷ୍ଟି

କେନ୍ଦୁଝର/ଘଟଗାଁ, ୪/୧୦: କେନ୍ଦୁଝର ଜିଲ୍ଲା ଗସ୍ତରେ ଆସିଥିବା ରାଜ୍ୟ ହସ୍ତଶିଳ୍ପ ବିଭାଗର ନିର୍ଦ୍ଦେଶିକା ଡ଼ଃ ନିବେଦିତା ପୃଷ୍ଟି ଘଟଗାଁ ମା’ ତାରିଣୀଙ୍କ ଦର୍ଶନ ପରେ ବିଭିନ୍ନ ହସ୍ତଶିଳ୍ପ କାର୍ଯ୍ୟକ୍ରମ ଓ ଦକ୍ଷତା ବିକାଶ କେନ୍ଦ୍ର ପରିଦର୍ଶନ କରିଛନ୍ତି।

ଜିଲ୍ଲା ହସ୍ତତନ୍ତ, ବୟନ ଓ ହସ୍ତଶିଳ୍ପ ବିଭାଗର ସହକାରୀ ନିର୍ଦ୍ଦେଶକ ଲଲାଟେନ୍ଦୁ ସର୍ଦ୍ଦାରଙ୍କ ସହଯୋଗରେ ସେ ଘଟଗାଁ ବ୍ଲକ ଅନ୍ତର୍ଗତ ବାଟହରିଚନ୍ଦନପୁରର ୨୩ ଜଣ ମୃତ୍ତିକା କାରିଗରଙ୍କ ଦ୍ୱାରା ପରିଚାଳିତ ଉତ୍ପାଦିକା ଦଳ ସହ ଆଲୋଚନା କରିଥିଲେ। କାରିଗରମାନଙ୍କ ଦ୍ୱାରା ପ୍ରସ୍ତୁତ କଳାବସ୍ତୁ, ଉତ୍ପାଦନ ଓ ଏହାର ବିକାଶ ସମ୍ପର୍କରେ ସେ ବିଷଦ ଆଲୋଚନା କରିଥିଲେ।ଏହାପରେ ଡ଼ଃ ପୃଷ୍ଟି ଘଟଗାଁ ବ୍ଲକ ଅନ୍ତର୍ଗତ ପୁରୁମୁଣ୍ଡାଠାରେ ଚାଲିଥିବା ଦକ୍ଷତା ବିକାଶ କାର୍ଯ୍ୟକ୍ରମ ପରିଦର୍ଶନ କରିଥିଲେ। ସେଠାରେ ୧୫ ଜଣ ପ୍ରଶିକ୍ଷାର୍ଥୀଙ୍କ ସହ ଆଲୋଚନା କରିବା ସହ ସେମାନଙ୍କ ଦ୍ୱାରା ପ୍ରସ୍ତୁତ ସଉରା ଚିତ୍ରକଳା ଦେଖି ଭୂୟସୀ ପ୍ରଶଂସା କରିଥିଲେ।

ପ୍ରଶିକ୍ଷକ ତଥା ନିପୁଣ ହସ୍ତଶିଳ୍ପୀ ଗୋରେଖ ଚନ୍ଦ୍ର ନାୟକଙ୍କୁ ଶୁଭେଚ୍ଛା ଜଣାଇବା ସହ ନୂତନ ଡିଜାଇନ୍ ପ୍ରସ୍ତୁତି ଓ ହସ୍ତଶିଳ୍ପରେ ନୂତନତ୍ୱ ଆଣିବା ସମ୍ପର୍କରେ ଆଲୋଚନା କରିଥିଲେ।ଏଥିସହ କାରିଗରଙ୍କ ସଂଖ୍ୟା ବୃଦ୍ଧି ଓ କ୍ଲଷ୍ଟରଗୁଡ଼ିକର ବିକାଶ ଦିଗରେ ଆଲୋଚନା କରିଥିଲେ। ପ୍ରଶିକ୍ଷଣ ଶେଷ ହେବା ପରେ କାରିଗରମାନଙ୍କୁ ଯଥାଶୀଘ୍ର ପରିଚୟପତ୍ର ପ୍ରଦାନ କରିବାକୁ ବିଭାଗୀୟ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଥିଲେ।ଏହି କାର୍ଯ୍ୟକ୍ରମରେ ଏଚ୍‌ପିଓ ଅଶୋକ କୁମାର ହାଁସଦା, ଦିନେଶ କୁମାର ଦାସ ପ୍ରମୁଖ ଉପସ୍ଥିତ ଥିଲେ।

ସରସ ସୁନ୍ଦର ଘଟଗାଁ ଗଠନ ନେଇ ଆଲୋଚନା ଚକ୍ର

କେନ୍ଦୁଝର/ଘଟଗାଁ, ୪/୧୦: ଘଟଗାଁକୁ ଏକ ସ୍ୱଚ୍ଛ, ସୁନ୍ଦର, ନିଶାମୁକ୍ତ ଓ ଆଧ୍ୟାତ୍ମିକ ପରିବେଶ ସମ୍ପନ୍ନ ସହର ଭାବେ ଗଢ଼ି ତୋଳିବା ନେଇ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଛି। ପବିତ୍ର ଗାନ୍ଧୀ ଜୟନ୍ତୀ ଓ ଶାସ୍ତ୍ରୀ ଜୟନ୍ତୀ ଅବସରରେ ଘଟଗାଁ ସରସ୍ୱତୀ ଶିଶୁ ବିଦ୍ୟା ମନ୍ଦିର ପରିସରରେ ଅଞ୍ଚଳର ସଚେତନ ନାଗରିକଙ୍କ ଆବାହକତ୍ୱରେ ଏହି କାର୍ଯ୍ୟକ୍ରମ ହୋଇଥିଲା।

ଅବସରପ୍ରାପ୍ତ ବିଶିଷ୍ଟ ଶିକ୍ଷାବିତ ବଟକୃଷ୍ଣ ନାଥଙ୍କ ଅଧ୍ୟକ୍ଷତାରେ ଆୟୋଜିତ ଆଲୋଚନା ଚକ୍ରରେ ଘଟଗାଁ ବ୍ଲକର ଶତାଧିକ ବୁଦ୍ଧିଜୀବୀ ଯୋଗଦେଇ ‘ଘଟଗାଁରେ ସାମାଜିକ ସଂସ୍କାରର ଆବଶ୍ୟକତା’ ଶୀର୍ଷକରେ ମତବିନିମୟ କରିଥିଲେ।

କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଘଟଗାଁ ବିଡିଓ ଖଗେଶ୍ୱର ବରାଳ ଯୋଗଦେଇଥିବା ବେଳେ ସମ୍ମାନିତ ଅତିଥି ଭାବେ ଜିଲ୍ଲା ପରିଷଦ ସଦସ୍ୟ ସୁରେନ୍ଦ୍ର କୁମାର ଜେନା ଓ ଭାଗିରଥି ପୃଷ୍ଟି ଯୋଗ ଦେଇଥିଲେ। ଅବସରପ୍ରାପ୍ତ ବ୍ୟାଙ୍କ ଅଧିକାରୀ କୁଳମଣି ମଣ୍ଡଳ ସମ୍ମାନିତ ବକ୍ତା ଭାବେ ଯୋଗଦେଇ ଘଟଗାଁର ସାମାଜିକ ବିକାଶ ନେଇ ମତ ରଖିଥିଲେ।ଆଲୋଚନାରେ ପ୍ରସିଦ୍ଧ ମା’ ତାରିଣୀ ପୀଠ, ଘଟଗାଁର ଆଧ୍ୟାତ୍ମିକ ଓ ଧାର୍ମିକ ମହତ୍ତ୍ୱକୁ ଅକ୍ଷୁଣ୍ଣ ରଖି ଏହାର ପାରିପାର୍ଶ୍ୱିକ ପରିବେଶକୁ ଅଧିକ ସରସ ଓ ସୁନ୍ଦର କରିବା ଉପରେ ଗୁରୁତ୍ୱ ଦିଆଯାଇଥିଲା।ପୀଠର ସ୍ୱଚ୍ଛତା ରକ୍ଷା, ଶିକ୍ଷାରେ ନୈତିକତା ଓ ବୌଦ୍ଧିକ ବିକାଶ, ତୀର୍ଥଯାତ୍ରୀଙ୍କୁ ଶୋଷଣରୁ ସୁରକ୍ଷା, ସ୍ଥାନୀୟ ସଂସ୍କୃତିର ପ୍ରଚାର-ପ୍ରସାର, ମା’ ତାରିଣୀ ପାଠାଗାର ଓ ଗବେଷଣା କେନ୍ଦ୍ରର ପୁନର୍ଗଠନ ନେଇ ଆଲୋଚନା ହୋଇଥିଲା।ସେହିପରି ଘଟଗାଁର ଟ୍ରାଫିକ ସମସ୍ୟାର ସମାଧାନ, ବାଇପାସ୍‌ରୁ କଲେଜ ଛକ ପର୍ଯ୍ୟନ୍ତ ବିଦ୍ୟୁତୀକରଣ, ମନ୍ଦିର ସମ୍ମୁଖରେ ପିଢ଼ି ପରେ ପିଢ଼ି ଭିକ୍ଷାବୃତ୍ତି କରୁଥିବା ମହ୍ଲାର ସମ୍ପ୍ରଦାୟର ଲୋକଙ୍କ ଥଇଥାନ ଏବଂ ପବିତ୍ର କ୍ଷେତ୍ରକୁ ନିଶାମୁକ୍ତ କରିବା ନେଇ ମଧ୍ୟ ମତ ପ୍ରକାଶ ପାଇଥିଲା।

ମନ୍ଦିରର ନିର୍ଦ୍ଦିଷ୍ଟ ଦୂରତା ମଧ୍ୟରେ ମାଛ ଓ ମାଂସ ଦୋକାନ ଉଚ୍ଛେଦ, ଘଟଗାଁକୁ ଶୀଘ୍ର ଏନ୍‌ଏସି (NAC) ମାନ୍ୟତା ପ୍ରଦାନ ଏବଂ ଘଟଗାଁର ପାରମ୍ପରିକ ‘ନଡ଼ିଆ କୋରା’କୁ ଉନ୍ନତମାନର କରି ଜିଆଇ (GI) ଟ୍ୟାଗ୍‌ ହାସଲ ପାଇଁ ପଦକ୍ଷେପ ନେବା ଉପରେ ମଧ୍ୟ ଅଧିକାଂଶ ବୁଦ୍ଧିଜୀବୀ ଗୁରୁତ୍ୱାରୋପ କରିଥିଲେ।କାର୍ଯ୍ୟକ୍ରମକୁ ଅବସରପ୍ରାପ୍ତ ଶିକ୍ଷାବିତ ପରମେଶ୍ୱର ବେହେରା ସଂଚାଳନ କରିଥିଲେ। ସଦାଶିବ ସାହୁ, ଦୟାନିଧି ମହାନ୍ତ, ରଶ୍ମି ରଞ୍ଜନ ରାଉତ, ଯତୀନ୍ଦ୍ର ବେଜ, ସଂଜୀବ ସାହୁ, ପୂର୍ଣ୍ଣଚନ୍ଦ୍ର ରାଉତ, ସନାତନ ସାହୁଙ୍କ ସମେତ ଅନ୍ୟ ସଦସ୍ୟମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।

ଗଣ୍ଡଶିଳାରେ ଆନ୍ତର୍ଜାତୀୟ ବରିଷ୍ଠ ନାଗରିକ ଦିବସ ପାଳିତ

କେନ୍ଦୁଝର/ଘଟଗାଁ, ୩/୧୦: ଘଟଗାଁ ବ୍ଲକ ଅନ୍ତର୍ଗତ ଗଣ୍ଡଶିଳା ଗ୍ରାମରେ ଗଣପତି ୟୁଥ କ୍ଲବ ପକ୍ଷରୁ ଶୁକ୍ରବାର ଆନ୍ତର୍ଜାତୀୟ ବରିଷ୍ଠ ନାଗରିକ ଦିବସ ପାଳିତ ହୋଇଛି। ଏହି ଅବସରରେ ବରିଷ୍ଠ ନାଗରିକଙ୍କ ଅଧିକାର, ସ୍ୱାସ୍ଥ୍ୟ ସୁରକ୍ଷା ଓ ଆଇନଗତ ଅଧିକାର ସମ୍ପର୍କରେ ସଚେତନତା କରାଯାଇଥିଲାକାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଆୟୁଷ ଡାକ୍ତର ଛନ୍ଦାମୟୀ ମାନସିଂ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଅଙ୍ଗନବାଡ଼ି କର୍ମୀ ମେନକା ନାୟକ, ୱାର୍ଡ ସଦସ୍ୟା ଜମ୍ବୁବତୀ ନାୟକ ଓ ସୁଦାମ ଚରଣ ମହାନ୍ତ ପ୍ରମୁଖ ଉପସ୍ଥିତ ଥିଲେ। ଅତିଥିମାନେ ବରିଷ୍ଠ ନାଗରିକଙ୍କ ଯତ୍ନ, ସ୍ୱାସ୍ଥ୍ୟ ଓ ସେମାନଙ୍କ ଆଇନଗତ ଅଧିକାର ସମ୍ପର୍କରେ ଆବଶ୍ୟକ ସୂଚନା ପ୍ରଦାନ କରିଥିଲେ।ଗଣପତି ୟୁଥ କ୍ଲବର ସଭାପତି ସୁବାସ ଚନ୍ଦ୍ର ନାୟକ ଓ ସମ୍ପାଦକ ରମେଶ ଚନ୍ଦ୍ର ନାୟକଙ୍କ ଉପସ୍ଥିତିରେ ବରିଷ୍ଠ ନାଗରିକମାନଙ୍କର ରକ୍ତଚାପ ଓ ମଧୁମେହ ପରୀକ୍ଷା କରାଯାଇଥିଲା। କାର୍ଯ୍ୟକ୍ରମରେ ଗ୍ରାମର ବହୁ ବରିଷ୍ଠ ନାଗରିକ ଯୋଗ ଦେଇଥିଲେ।

ପିପିଳିଆ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟରେ ସଡ଼କ ସୁରକ୍ଷା ସଚେତନତା ଶିବିର

କେନ୍ଦୁଝର/ଘଟଗାଁ,୧/୧୦: ଘଟଗାଁ ବ୍ଲକ ଅନ୍ତର୍ଗତ ପିପିଳିଆ ଲକ୍ଷ୍ମୀ ନାରାୟଣ ଉଚ୍ଚ ମାଧ୍ୟମିକ ବିଦ୍ୟାଳୟରେ ଏକ ଦିବସୀୟ ସଡ଼କ ସୁରକ୍ଷା ସଚେତନତା ଶିବିର ଅନୁଷ୍ଠିତ ହୋଇଯାଇଛି। ବିଦ୍ୟାଳୟ ଅଧ୍ୟକ୍ଷ ନିରାକାର ସ୍ୱାଇଁଙ୍କ ସଭାପତିତ୍ୱରେ ଆୟୋଜିତ ଏହି ଶିବିରରେ ଛାତ୍ରଛାତ୍ରୀଙ୍କୁ ସଡ଼କ ସୁରକ୍ଷା ନିୟମ ଓ ଦୁର୍ଘଟଣା ରୋକିବା ସମ୍ପର୍କରେ ସଚେତନ କରାଯାଇଥିଲା।କାର୍ଯ୍ୟକ୍ରମରେ କେନ୍ଦୁଝର ଜିଲ୍ଲା ପରିବହନ ଅଧିକାରୀ ତାନା ମୁର୍ମୁ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ଟ୍ରାଫିକ୍ ସବ୍-ଇନ୍ସପେକ୍ଟର ସସ୍ମିତା ପଣ୍ଡା ଓ କନେଷ୍ଟବଳ ସୁଷମା ବେହେରା ସମ୍ମାନିତ ଅତିଥି ଭାବେ ଯୋଗଦେଇଥିଲେ।ଏହି ଅବସରରେ ଅତିଥିମାନେ ଭିଡିଓ ଚିତ୍ର ମାଧ୍ୟମରେ ବିଭିନ୍ନ ସଡ଼କ ଦୁର୍ଘଟଣାର ଦୃଶ୍ୟ ପ୍ରଦର୍ଶନ କରି ଛାତ୍ରଛାତ୍ରୀଙ୍କୁ ସଡ଼କ ସୁରକ୍ଷା ନିୟମ ପାଳନର ଗୁରୁତ୍ୱ ବୁଝାଇଥିଲେ। ହେଲମେଟ୍ ବ୍ୟବହାର, ଟ୍ରାଫିକ୍ ନିୟମ ପାଳନ ଓ ସତର୍କତାର ସହ ଯାତାୟାତ କରିବା ନେଇ ମଧ୍ୟ ସଚେତନ କରାଯାଇଥିଲା।ଏନ୍‌ଏସ୍‌ଏସ୍‌ କାର୍ଯ୍ୟକ୍ରମ ଅଧିକାରୀ ଅଲେଖ ପ୍ରସାଦ ସାହୁ ଶିବିର ପରିଚାଳନା କରିଥିଲେ। ଅତିଥିମାନେ ସଡ଼କ ସୁରକ୍ଷା ସମ୍ପର୍କିତ ବିଭିନ୍ନ ପ୍ରଶ୍ନ ଛାତ୍ରଛାତ୍ରୀଙ୍କୁ ପଚାରିଥିଲେ ଏବଂ ସଠିକ୍ ଉତ୍ତର ଦେଇଥିବା ଛାତ୍ରଛାତ୍ରୀଙ୍କୁ ପୁରସ୍କୃତ କରାଯାଇଥିଲା।ଶେଷରେ ବିଦ୍ୟାଳୟ ଅଧ୍ୟକ୍ଷ ନିରାକାର ସ୍ୱାଇଁ ସମସ୍ତ ଅତିଥି, ଶିକ୍ଷକ-ଶିକ୍ଷୟିତ୍ରୀ ଓ ଛାତ୍ରଛାତ୍ରୀଙ୍କୁ ବିଦ୍ୟାଳୟ ପକ୍ଷରୁ ଧନ୍ୟବାଦ ଅର୍ପଣ କରିଥିଲେ।

ଢେଙ୍କିକୋଟରେ କ୍ଲଷ୍ଟରସ୍ତରୀୟ ଶିଶୁ ମହୋତ୍ସବ ‘ସୁରଭି’: ବିଭିନ୍ନ ପ୍ରତିଯୋଗିତାରେ ଭାଗନେଲେ ଛାତ୍ରଛାତ୍ରୀ

କେନ୍ଦୁଝର/ଘଟଗାଁ, ୩୦/୯: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ଢେଙ୍କିକୋଟ କ୍ଲଷ୍ଟରସ୍ତରୀୟ ଶିଶୁ ମହୋତ୍ସବ ‘ସୁରଭି’ ସତ୍ୟନାରାୟଣ ବିଦ୍ୟାପୀଠ, ଢେଙ୍କିକୋଟ ପରିସରରେ ଅନୁଷ୍ଠିତ ହୋଇଯାଇଛି। ଆଞ୍ଚଳିକ ସାଧନା କେନ୍ଦ୍ର ସଂଯୋଜକ ଜିତେନ୍ଦ୍ର କୁମାର ଗିରିଙ୍କ ସଭାପତିତ୍ୱରେ ଆୟୋଜିତ ଏହି ଶିଶୁ ମହୋତ୍ସବକୁ ସାଂସଦ ପ୍ରତିନିଧି ଅଖିଳ କୁମାର ପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ଉଦ୍‌ଘାଟନ କରିଥିଲେ।ପ୍ରଥମ, ଦ୍ୱିତୀୟ ଓ ତୃତୀୟ ଶ୍ରେଣୀର ଛାତ୍ରଛାତ୍ରୀଙ୍କ ପାଇଁ ଚିତ୍ରାଙ୍କନ, ଗଳ୍ପ କଥନ, ଗଣିତ କୁଇଜ୍‌ ଓ ଗଣିତ ଦୌଡ଼ ଭଳି ପ୍ରତିଯୋଗିତା ଆୟୋଜିତ ହୋଇଥିଲା।ସେହିପରି ୪ର୍ଥରୁ ୭ମ ଶ୍ରେଣୀ କନିଷ୍ଠ ବର୍ଗ, ୮ମରୁ ୧୦ମ ଶ୍ରେଣୀ ବରିଷ୍ଠ ବିଭାଗ ଏବଂ ୧୧ଶ ଓ ୧୨ଶ ଶ୍ରେଣୀ ଉଚ୍ଚ ମାଧ୍ୟମିକ ବିଭାଗର ଛାତ୍ରଛାତ୍ରୀଙ୍କ ପାଇଁ ଚିତ୍ରାଙ୍କନ, ପ୍ରବନ୍ଧ, ବକ୍ତୃତା, ତର୍କ, ଦେଶାତ୍ମବୋଧକ ସଙ୍ଗୀତ ଓ ଅନ୍ୟାନ୍ୟ ପ୍ରତିଯୋଗିତା ହୋଇଥିଲା। ଦିବ୍ୟାଙ୍ଗ ଛାତ୍ରଛାତ୍ରୀଙ୍କ ପାଇଁ ମଧ୍ୟ ଚିତ୍ର ଓ ସଙ୍ଗୀତ ପ୍ରତିଯୋଗିତା ରହିଥିଲା। ଏଥିସହ ସାଂସ୍କୃତିକ କାର୍ଯ୍ୟକ୍ରମରେ ନୃତ୍ୟ ପରିବେଷଣ କରାଯାଇଥିଲା।ଏହି କ୍ଲଷ୍ଟରସ୍ତରୀୟ ସୁରଭି କାର୍ଯ୍ୟକ୍ରମରେ ୧୩ଟି ପ୍ରାଥମିକ ବିଦ୍ୟାଳୟ, ୭ଟି ଉଚ୍ଚ ପ୍ରାଥମିକ ବିଦ୍ୟାଳୟ, ଉଚ୍ଚ ବିଦ୍ୟାଳୟ ଓ ଆଦର୍ଶ ବିଦ୍ୟାଳୟର ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ।କାର୍ଯ୍ୟକ୍ରମ ପରିଚାଳନାରେ ଶିକ୍ଷକ ରାଜକିଶୋର ମିଶ୍ର, ଭଗବତୀ କର, ମୀନତି ମହାରଣା, କମଳ କୁମାର ନାୟକ, ହରେକୃଷ୍ଣ ପାତ୍ର, ବିଷ୍ଣୁ ପ୍ରସାଦ ସାହୁ, ଚନ୍ଦ୍ରକାନ୍ତ ବେହେରା, ଶୁଭଶ୍ରୀ ପହୀ, କଳାବତୀ ବିନିଶିୟା, ଭାଗ୍ୟଶ୍ରୀ ପଲେଇ, ଦୀପ୍ତିମୟୀ ଚାନ୍ଦ, ଅମୂଲ୍ୟ ଦତ୍ତ, ଜଗବନ୍ଧୁ ମହାନ୍ତ, ହରପ୍ରିୟା ବେହେରା, ବୃନ୍ଦାବନ ମାଝି ଓ ଶାନ୍ତିଲତା ସା ପ୍ରମୁଖ ସହଯୋଗ କରିଥିଲେ।ମଧ୍ୟାହ୍ନ ପୂର୍ବରୁ ଘଟଗାଁ ବିଇଓ ହରେକୃଷ୍ଣ ନାୟକ, ସାମ୍ବାଦିକ ନୀଳମଣି ମଣ୍ଡଳ, ସଞ୍ଜୟ କୁମାର ସାହୁ, ପ୍ରଧାନ ଶିକ୍ଷୟିତ୍ରୀ ସସ୍ମିତାରାଣୀ ପଣ୍ଡା ଓ ସାମାଜିକ କର୍ମୀ କୃଷ୍ଣଚନ୍ଦ୍ର ବାରିକ ପ୍ରମୁଖ ଯୋଗଦେଇ ଛାତ୍ରଛାତ୍ରୀଙ୍କୁ ଉତ୍ସାହିତ କରିଥିଲେ।କାର୍ଯ୍ୟକ୍ରମର ଅନ୍ତିମ ପର୍ଯ୍ୟାୟରେ ଘଟଗାଁ ବ୍ଲକ ଏଲିମେଣ୍ଟାରି ଶିକ୍ଷକ ସଂଘ ସଭାପତି କୃତ୍ତି ପ୍ରତିଯୋଗୀମାନଙ୍କୁ ପ୍ରମାଣପତ୍ର ଓ ପୁରସ୍କାର ପ୍ରଦାନ କରିଥିଲେ।

ଖୁଦପୁଟୁଳି ଗୁଳିକାଣ୍ଡ ମାମଲାରେ ୪ ଅଭିଯୁକ୍ତ ଗିରଫ

କେନ୍ଦୁଝର/ଘଟଗାଁ, ୨୮/୯: କେନ୍ଦୁଝର ଜିଲ୍ଲା ଘଟଗାଁ ଥାନା ଅନ୍ତର୍ଗତ ଖୁଦପୁଟୁଳି ଗାଁରେ ଘରେ ପଶି ଡକାୟତି ଉଦ୍ୟମ ସମୟରେ ଘଟିଥିବା ଗୁଳିକାଣ୍ଡ ମାମଲାରେ ପୁଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏନେଇ ପୁଲିସ ପକ୍ଷରୁ ସୂଚନା ମିଳିଛି।ପୁଲିସର ସୂଚନା ଅନୁସାରେ, ୨ ଅଗଷ୍ଟ ୨୦୨୬ ରାତିରେ ଖୁଦପୁଟୁଳି ଗାଁର ଏକ ଘରେ କିଛି ଦୁର୍ବୃତ୍ତ ଡକାୟତି ଉଦ୍ଦେଶ୍ୟରେ ପ୍ରବେଶ କରିଥିଲେ। ଘର ମାଲିକ ଜତୀନ୍ଦ୍ର ମହାନ୍ତ ଦୁର୍ବୃତ୍ତମାନଙ୍କ ଉପସ୍ଥିତି ଜାଣି ପ୍ରତିରୋଧ କରିବାରୁ ଜଣେ ଦୁର୍ବୃତ୍ତ ତାଙ୍କ ଉପରକୁ ଗୁଳି ଚଳାଇଥିଲା।ଗୁଳିମାଡ଼ରେ ଜତୀନ୍ଦ୍ର ମହାନ୍ତ ଗୁରୁତର ଆହତ ହୋଇଥିଲେ। ତାଙ୍କୁ ପ୍ରଥମେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ପରେ ଅଧିକ ଚିକିତ୍ସା ପାଇଁ କଟକସ୍ଥିତ ଏସ୍‌ସିବି ମେଡିକାଲ କଲେଜ ଓ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଚିକିତ୍ସାଧୀନ ଅବସ୍ଥାରେ ୫ ଅଗଷ୍ଟ ୨୦୨୬ରେ ଜତୀନ୍ଦ୍ରଙ୍କ ମୃତ୍ୟୁ ଘଟିଥିଲା।ଏହି ଘଟଣାକୁ ନେଇ ଘଟଗାଁ ଥାନାରେ କେସ୍‌ ନମ୍ବର ୪୦୮/୨୦୨୬, ତାରିଖ ୦୩.୦୮.୨୦୨୬ରେ ବିଏନ୍ଏସ୍‌ ଧାରା ୩୩୧(୮)/୩୧୦(୩) ସହ ୨୫/୨୭ ଆର୍ମ୍ସ ଆକ୍ଟରେ ମାମଲା ରୁଜୁ ହୋଇଥିଲା।

୯ଟି ଟିମ୍‌ ଗଠନ କରି ତଦନ୍ତ

କେନ୍ଦୁଝର ଏସ୍‌ପିଙ୍କ ନିର୍ଦ୍ଦେଶରେ ମାମଲାର ତଦନ୍ତ ପାଇଁ ୯ଟି ତଦନ୍ତକାରୀ ଟିମ୍‌ ଗଠନ କରାଯାଇଥିଲା। ପୁଲିସ ଟିମ୍‌ ଚାଇବାସା, ରାଞ୍ଚି, ଜାମସେଦପୁର ଏବଂ ଝାଡ଼ଖଣ୍ଡର ମଝଗାଁ ଅଞ୍ଚଳରେ ତଦନ୍ତ କରି ଅଭିଯୁକ୍ତମାନଙ୍କ ପୂର୍ବ ଅପରାଧିକ ରେକର୍ଡ ଓ ଗତିବିଧି ସମ୍ପର୍କରେ ତଥ୍ୟ ସଂଗ୍ରହ କରିଥିଲା।

ତଦନ୍ତରେ ଅଗ୍ରଗତି ହେବା ପରେ ପୁଲିସ ଏପର୍ଯ୍ୟନ୍ତ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି। ଏହି ଘଟଣାରେ ଆହୁରି କିଛି ବ୍ୟକ୍ତିଙ୍କ ସମ୍ପୃକ୍ତି ଥିବା ତଦନ୍ତରୁ ଜଣାପଡ଼ିଥିବା ପୁଲିସ କହିଛି। ଅନ୍ୟ ସମ୍ପୃକ୍ତ ଅଭିଯୁକ୍ତମାନଙ୍କୁ ଗିରଫ ପାଇଁ ତଦନ୍ତ ଜାରି ରହିଛି।