କେନ୍ଦୁଝର/ଘଟଗାଁ, ୨୮/୯: ଲଗାଣ ବର୍ଷାରେ ଭୁଶୁଡ଼ି ପଡ଼ିଛି ଘରର ଦୁଇ ପାର୍ଶ୍ୱର କାନ୍ଥ। ଅବଶିଷ୍ଟ କାନ୍ଥରେ ମଧ୍ୟ ବଡ଼ ବଡ଼ ଫାଟ ଦେଖାଦେଇଛି। ଘର ଭିତରେ ରହିବାକୁ ଭୟ, ହେଲେ ଯିବେ କୁଆଡ଼େ? ଏଭଳି ସ୍ଥିତିରେ ଭଙ୍ଗା ଘରର ପିଣ୍ଡା ହିଁ ପରିବାର ପାଇଁ ରାତି କାଟିବାର ଠିକଣା ପାଲଟିଛି।
କେନ୍ଦୁଝର ଜିଲ୍ଲା ଘଟଗାଁ ବ୍ଲକ କାଶିବେଡ଼ା ଗ୍ରାମର ରାୟା ପାତ୍ରଙ୍କ ପରିବାର ଏବେ ଏଭଳି ଦୟନୀୟ ସ୍ଥିତିରେ ଦିନ କାଟୁଛନ୍ତି। ରାୟା ପାତ୍ର, ତାଙ୍କ ସ୍ତ୍ରୀ କୁନ୍ତଳା ପାତ୍ର, ବିଧବା ଝିଅ ଓ ଦୁଇ ପୁଅଙ୍କୁ ନେଇ ତାଙ୍କ ପରିବାର। ଦିନମଜୁରି କରି ପରିବାର ଚଳାଉଥିବା ରାୟାଙ୍କ ଉପରେ ଏବେ ଲଗାଣ ବର୍ଷା ଦୁଃଖର ବୋଝ ବଢ଼ାଇ ଦେଇଛି।
ବର୍ଷାରେ ଭୁଶୁଡ଼ିଲା ଘରର କାନ୍ଥ
ଲଗାଣ ବର୍ଷା ଯୋଗୁଁ ରାୟା ପାତ୍ରଙ୍କ ଘରର ଦୁଇ ପାର୍ଶ୍ୱର କାନ୍ଥ ଭାଙ୍ଗି ପଡ଼ିଛି। ଅବଶିଷ୍ଟ କାନ୍ଥରେ ମଧ୍ୟ ବଡ଼ ବଡ଼ ଫାଟ ସୃଷ୍ଟି ହୋଇଛି। ଘରର ଅବସ୍ଥା ବିପଦସଙ୍କୁଳ ହୋଇପଡ଼ିଥିବାରୁ ପରିବାର ଲୋକେ ଭିତରେ ରହିବାକୁ ଭୟ କରୁଛନ୍ତି।
ଘରର ଗୋଟିଏ ପାର୍ଶ୍ୱରେ ଶାଢ଼ୀ ଟାଙ୍ଗି ଆଡ଼ କରାଯାଇଥିବା ବେଳେ ଅନ୍ୟ ପାର୍ଶ୍ୱରେ ପଲିଥିନ ଛେକାଯାଇଛି। ବର୍ଷା ଓ ପବନରୁ ରକ୍ଷା ପାଇଁ ଏହି ଅସ୍ଥାୟୀ ବ୍ୟବସ୍ଥା ହିଁ ପରିବାରର ଏକମାତ୍ର ଭରସା ପାଲଟିଛି।
ଭଙ୍ଗା ଘର ପିଣ୍ଡାରେ କଟୁଛି ରାତି
ଘରର ଅବଶିଷ୍ଟ କାନ୍ଥ ମଧ୍ୟ ଫାଟି ରହିଥିବାରୁ ଯେକୌଣସି ସମୟରେ ଅଘଟଣ ଘଟିବାର ଆଶଙ୍କା ରହିଛି। ବର୍ଷା ହେଲେ ପରିବାରର ଚିନ୍ତା ଆହୁରି ବଢ଼ିଯାଉଛି। ଘର ଭିତରେ ରହିବାକୁ ଭୟ ଲାଗୁଥିବାରୁ ରାତିରେ ଭଙ୍ଗା ଘରର ପିଣ୍ଡାରେ ହିଁ ଆଶ୍ରୟ ନେଉଛନ୍ତି ପରିବାର ଲୋକେ।ଏକପଟେ ଭଙ୍ଗା ଘର, ଅନ୍ୟପଟେ ଆର୍ଥିକ ଅସ୍ୱଚ୍ଛଳତା। ଏହି ଦୁଇ ସଙ୍କଟ ମଧ୍ୟରେ ପରିବାରର ଦିନ କଟୁଛି। ଦିନମଜୁରି କରି ପରିବାର ଚଳାଉଥିବା ରାୟାଙ୍କ ପାଇଁ ଘର ମରାମତି କିମ୍ବା ନୂଆ ଘର ନିର୍ମାଣ କରିବା ସହଜ ହୋଇପାରୁନାହିଁ।
ସରକାରୀ ସହାୟତାକୁ ଅପେକ୍ଷା
ଦୈନନ୍ଦିନ ପରିବାର ଖର୍ଚ୍ଚ ତୁଲାଇବା ପରେ ଘର ମରାମତି ପାଇଁ ଅର୍ଥ ଯୋଗାଡ଼ କରିବା ରାୟାଙ୍କ ପାଇଁ ସମ୍ଭବ ହେଉନାହିଁ। ଫଳରେ ଅସହାୟ ପରିବାରଟି ଏବେ ସରକାରୀ ସହାୟତାକୁ ଅପେକ୍ଷା କରିଛି।ବିପଦସଙ୍କୁଳ ଘରେ ରହୁଥିବା ପରିବାରର ସୁରକ୍ଷା ଏବେ ପ୍ରମୁଖ ପ୍ରଶ୍ନ ପାଲଟିଛି। ପ୍ରଶାସନ ପକ୍ଷରୁ ଘଟଣାର ଅନୁଧ୍ୟାନ କରି ପରିବାରକୁ ତୁରନ୍ତ ଆବଶ୍ୟକ ସହାୟତା, ସୁରକ୍ଷିତ ଆଶ୍ରୟ ଏବଂ ଘର ନିର୍ମାଣ ପାଇଁ ସରକାରୀ ସହାୟତା ଯୋଗାଇ ଦେବାକୁ ଦାବି ହେଉଛି।
