କେନ୍ଦୁଝର/ପାଟଣା:୨୫/୯,ପାଟଣା ବ୍ଲକ ଅନ୍ତର୍ଗତ ଚିନାମାଳିପଶି ପଞ୍ଚାୟତର ନୂଆପଡ଼ା-କେତାଙ୍ଗ ମଧ୍ୟବର୍ତ୍ତୀ ସୀତାସେତୁ ଉପରେ ଏକ ବଡ଼ ବରଗଛ ଲଘୁଚାପଜନିତ ବର୍ଷା ଓ ପବନରେ ଉପୁଡ଼ି ପଡ଼ିଥିଲା। ଫଳରେ ଆଜି ସକାଳୁ କପାସପଡ଼ା-ଭୀମକୁଣ୍ଡ ରାସ୍ତାରେ ଯାତ୍ରୀବାହୀ ବସ ସମେତ ଅନ୍ୟାନ୍ୟ ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା।ଏନେଇ ସୂଚନା ପାଇବା ପରେ ଆଜି ସନ୍ଧ୍ୟାରେ ଘଟଗାଁ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲା। ଅଗ୍ନିଶମ କର୍ମଚାରୀମାନେ ଗଛଟିକୁ କାଟି ରାସ୍ତାରୁ ହଟାଇବା ପରେ ଯାତାୟାତ ସ୍ୱାଭାବିକ ହୋଇଥିବା ଜଣାପଡ଼ିଛି।ଅନ୍ୟପକ୍ଷରେ, ଗତ ୩ ଦିନ ଧରି ଲଘୁଚାପଜନିତ ଲଗାଣ ବର୍ଷା ଯୋଗୁଁ ପାଟଣା ବ୍ଲକ ଅଞ୍ଚଳରେ ମୋଟ ୯ଟି ଘର ଭାଙ୍ଗିଥିବା ସୂଚନା ମିଳିଛି। ଡୁମୁରିଆ, କେନ୍ଦେଇପଶି ଏବଂ ବଡ଼ପାଟଣା ପଞ୍ଚାୟତ ଅଞ୍ଚଳରେ ଏହି ଘରଗୁଡ଼ିକ ଭାଙ୍ଗିଥିବା ଜଣାପଡ଼ିଛି।ଘର ଭାଙ୍ଗିବା ଘଟଣା ସମ୍ପର୍କରେ ଆରଆଇମାନେ ତଦନ୍ତ କରିଥିବା ବେଳେ ତଦନ୍ତ ପରେ ପାଟଣା ତହସିଲଦାର ଅଶ୍ୱିନୀ କୁମାର ନାଏକ ଗଣମାଧ୍ୟମକୁ ଏହି ସୂଚନା ଦେଇଛନ୍ତି।
