କେନ୍ଦୁଝର/ପାଟଣା, ୩୦/୯: କେନ୍ଦୁଝର ଜିଲ୍ଲା ପାଟଣା ବନାଞ୍ଚଳ ଅନ୍ତର୍ଗତ କେନ୍ଦେଇପଶି ନିକଟରେ ୨୫ଟିକିଆ ହାତୀପଲ ଡେରା ପକାଇଛନ୍ତି। ବୁଧବାର ସକାଳେ ହାତୀପଲକୁ ଚିଡ଼ାଇବାକୁ ଯାଇ ଜଣେ ବ୍ୟକ୍ତି ହାତୀ ଆକ୍ରମଣର ଶିକାର ହୋଇଥିଲେ।
ସୂଚନା ଅନୁଯାୟୀ, ହାତୀପଲ ନିକଟକୁ ଯାଇ ବ୍ୟକ୍ତିଜଣକ ହାତୀମାନଙ୍କୁ ଚିଡ଼ାଇଥିଲେ। ଏଥିରେ ଗୋଟିଏ ହାତୀ ତାଙ୍କୁ ଶୁଣ୍ଢରେ ଟେକି ଏକ ବିଲ ଭିତରକୁ ଫିଙ୍ଗି ଦେଇଥିଲା। ତେବେ ସୌଭାଗ୍ୟବଶତଃ ବ୍ୟକ୍ତିଜଣକ ସୁରକ୍ଷିତ ଥିବାରୁ ଘଟଣାସ୍ଥଳରୁ ଉଠି ପଳାଇ ଯାଇଥିଲେ।ଘଟଣା ପରେ ପାଟଣା ବନବିଭାଗ ପକ୍ଷରୁ ସଂପୃକ୍ତ ବ୍ୟକ୍ତିଙ୍କୁ ଠାବ କରିବା ପାଇଁ ଡ୍ରୋନ୍ ସହାୟତାରେ ଖୋଜାଖୋଜି କରାଯାଇଥିଲା। ତେବେ ତାଙ୍କର କୌଣସି ପତ୍ତା ମିଳିନଥିବା ଜଣାପଡ଼ିଛି।ଅନ୍ୟପକ୍ଷରେ, ଗତରାତି ଏହି ହାତୀପଲ ସିଲିଦା, ଖୁଣ୍ଟାପଡ଼ା, କାଶୀପୁର, କେନ୍ଦେଇପଶି ଓ ଚାକୁଣ୍ଡାପାଳ ଅଞ୍ଚଳରେ ବ୍ୟାପକ ଧାନ ଫସଲ ନଷ୍ଟ କରିଥିବା ଜଣାପଡ଼ିଛି।ପାଟଣା ବନାଞ୍ଚଳ ଅଧିକାରୀ ଆର୍ତ୍ତତ୍ରାଣ ମିର୍ଦ୍ଧା ଓ ବନପାଳ ନିରଞ୍ଜନ ସେଠୀଙ୍କ ସମେତ ବନବିଭାଗର କର୍ମଚାରୀମାନେ ହାତୀପଲର ଗତିବିଧି ଉପରେ ନଜର ରଖିଛନ୍ତି।
