କେନ୍ଦୁଝର/ପାଟଣା,୧୭/୯:ଦେବ ଶିଳ୍ପୀ ବାବା ବିଶ୍ୱକର୍ମାଙ୍କ ପୂଜା ପାଇଁ ପାଟଣା ଅଞ୍ଚଳ ଉତ୍ସବମୁଖର ହୋଇଉଠିଛି। ପାଟଣା ସମେତ ଆଖପାଖ ଅଞ୍ଚଳର ବିଭିନ୍ନ ଶିଳ୍ପାନୁଷ୍ଠାନ, ପେଟ୍ରୋଲ ପମ୍ପ, ଲୁହା ଦୋକାନ, ଗ୍ୟାରେଜ୍ ଓ ବ୍ୟବସାୟିକ ପ୍ରତିଷ୍ଠାନରେ ବିଶ୍ୱକର୍ମା ପୂଜା ଧୁମଧାମରେ ପାଳିତ ହୋଇଛି।ସକାଳୁ ସନ୍ଧ୍ୟା ପର୍ଯ୍ୟନ୍ତ ବିଭିନ୍ନ ପୂଜାମଣ୍ଡପ ଓ ମନ୍ଦିରରେ ଶ୍ରଦ୍ଧାଳୁଙ୍କ ଭିଡ଼ ଲାଗିରହିଥିଲା। ଅନେକ ଲୋକ ନିଜ ଗାଡ଼ି ଓ ମୋଟର ନେଇ ବିଶ୍ୱକର୍ମାଙ୍କ ପୂଜା କରିଥିବା ଦେଖିବାକୁ ମିଳିଥିଲା।ବିଶେଷ କରି ପାଟଣା ମୁଖ୍ୟାଳୟସ୍ଥିତ ବିଦ୍ୟୁତ ବିଭାଗର ଟାଟା ପାୱାର କାର୍ଯ୍ୟାଳୟରେ ବିଶ୍ୱକର୍ମା ପୂଜା ଧୁମଧାମରେ ଅନୁଷ୍ଠିତ ହୋଇଥିଲା। ସେହିପରି ବିଶ୍ୱକର୍ମା ଫିଲିଂ ଷ୍ଟେସନ, ବୈତରଣୀ ରାଇସ୍ ମିଲ୍, ନାରାୟଣ ରାଇସ୍ ମିଲ୍, ସାଇ ଆଗ୍ରୋ, ଶିବକୃପା ଫିଲିଂ ଷ୍ଟେସନ, ମହିନ୍ଦ୍ରା ସୋରୁମ୍, ସାଇ ଶକ୍ତି ଏଜେନ୍ସି, ଅଲେଖ କନଷ୍ଟ୍ରକ୍ସନ, ମହାଦେବ ଟ୍ରାଭେଲ୍ସ ଓ ତୁରୁମୁଙ୍ଗାସ୍ଥିତ ଟାଟା ପାୱାର କାର୍ଯ୍ୟାଳୟରେ ମଧ୍ୟ ଆକର୍ଷଣୀୟ ସାଜସଜ୍ଜାରେ ବିଶ୍ୱକର୍ମା ପୂଜା ମଣ୍ଡପ ଝଲସି ଉଠିଥିଲା।ଏହାଛଡ଼ା ନେଉଳପଶି ଆଇଟିଆଇ, ତୁରୁମୁଙ୍ଗା ଆଇଟିଆଇ, ଯମୁନାପଶି ଗ୍ରିଡ୍ ଏବଂ ଖିରେଇଟାଙ୍ଗିରୀସ୍ଥିତ ଦୀପକ କନଷ୍ଟ୍ରକ୍ସନ ଆଦି ସ୍ଥାନରେ ମଧ୍ୟ ଧୁମଧାମରେ ବିଶ୍ୱକର୍ମା ପୂଜା ପାଳନ କରାଯାଇଛି।ସନ୍ଧ୍ୟା ସମୟରେ ବିଭିନ୍ନ ପୂଜାମଣ୍ଡପରେ ବିଶ୍ୱକର୍ମାଙ୍କ ଦର୍ଶନ ପାଇଁ ଶ୍ରଦ୍ଧାଳୁଙ୍କ ଗହଳି ଲାଗିରହିଥିଲା। ପୂଜାସ୍ଥଳୀଗୁଡ଼ିକରେ ଭଜନ ସନ୍ଧ୍ୟା, ମେଲୋଡି ଓ ଅନ୍ୟାନ୍ୟ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି।
ପାଟଣାରେ ସାଇ ଆଗ୍ରୋ, ସାଇ ଶକ୍ତି ଏଜେନ୍ସି ଓ ଟାଟା ପାୱାର ପକ୍ଷରୁ ଶ୍ରଦ୍ଧାଳୁଙ୍କୁ ପ୍ରସାଦ ବିତରଣ କରାଯାଇଥିଲା। ବିଶ୍ୱକର୍ମା ପୂଜାକୁ ନେଇ ପାଟଣା ଅଞ୍ଚଳରେ ଦିନତମାମ ଉତ୍ସବର ମାହୋଲ ଦେଖିବାକୁ ମିଳିଥିଲା।
