କେନ୍ଦୁଝର/ପାଟଣା, ୨୪/୯: ପାଟଣାର ଯୁବ କଣ୍ଠଶିଳ୍ପୀ ତଥା ସଙ୍ଗୀତ ନିର୍ଦ୍ଦେଶକ ଚିନ୍ମୟ ଦାଶଙ୍କ ନିର୍ଦ୍ଦେଶନାରେ ଦେଶର ଅନ୍ୟତମ ପ୍ରସିଦ୍ଧ କଣ୍ଠଶିଳ୍ପୀ ଉଦିତ ନାରାୟଣ ୩ଟି ଗୀତ ଗାଇଥିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି।
ବିଭୁନ ସାହୁ ଏହି ଗୀତଗୁଡ଼ିକର ରଚନା କରିଥିବା ବେଳେ ଆଶୁତୋଷ ମହାପାତ୍ର ଏବଂ ନିରାକାର ପଣ୍ଡାଙ୍କ ଦ୍ୱାରା ଶୁଭମ ଏଣ୍ଟରଟେନମେଣ୍ଟ ଏବଂ ଜେଜେ ୟୁଟ୍ୟୁବ୍ ଚ୍ୟାନେଲରେ ଗୀତଗୁଡ଼ିକ ଖୁବଶୀଘ୍ର ମୁକ୍ତିଲାଭ କରିବ ବୋଲି ଜଣାପଡ଼ିଛି।
ଉଦିତ ନାରାୟଣ ଗାଇଥିବା ଗୀତଗୁଡ଼ିକ ହେଲା ‘ତତେ ଆଣିଦେବି ଖଣ୍ଡୁଆ ପାଟ’, ‘କଣ୍ଢେଇ ରାଣୀ’ ଏବଂ ‘ତତେ ପିନ୍ଧେଇବି ନିର୍ବନ୍ଧ ମୁଦି’।ଯୁବ ସଙ୍ଗୀତ ନିର୍ଦ୍ଦେଶକ ଚିନ୍ମୟ ଦାଶଙ୍କ ନିର୍ଦ୍ଦେଶନାରେ ପୂର୍ବରୁ ଅଭିଜିତ ଭଟ୍ଟାଚାର୍ଯ୍ୟ, ଉଦିତ ନାରାୟଣ, ଶାନ, ବିନୋଦ ରାଠୋର, ଜୀ ସାରେଗାମାପାର ବିଜେତା ଆଲବର୍ଟ ଲେପଚା ଏବଂ ସଦ୍ୟ ସୋନି ଟିଭିର ଇଣ୍ଡିଆନ ଆଇଡଲ ବିଜେତା ଜ୍ୟୋତିର୍ମୟୀ ନାୟକ ନିଜର କଣ୍ଠଦାନ କରିଛନ୍ତି।ଏହାଛଡ଼ା ଓଲିଉଡ୍ ଜଗତର ଜଣାଶୁଣା କଣ୍ଠଶିଳ୍ପୀ ସ୍ୱର୍ଗତ ହ୍ୟୁମାନ ସାଗର, ମଣ୍ଟୁ ଛୁରିଆ, ଅସୀମା ପଣ୍ଡା, ଦିପ୍ତିରେଖା ପାଢ଼ୀ, ଇରା ମହାନ୍ତି, ଦେବେଶ ପତି, ଅନ୍ତରା ଚକ୍ରବର୍ତ୍ତୀ, ସ୍ୱୟମ ପାଢ଼ୀ, ସତ୍ୟଜିତ ପ୍ରଧାନ, ପପୁ ପମପମ୍, ଅର୍ପିତା ଚୌଧୁରୀ, ଏସ୍. ଜିତୁ ଏବଂ ସୁଚିସ୍ମିତା ପ୍ରମୁଖ କଣ୍ଠଶିଳ୍ପୀ ମଧ୍ୟ ଚିନ୍ମୟଙ୍କ ନିର୍ଦ୍ଦେଶନାରେ କଣ୍ଠଦାନ କରିଛନ୍ତି।
