କେନ୍ଦୁଝର/ପାଟଣା, ୪/୧୦: ପାଟଣା ଥାନାରେ କାର୍ଯ୍ୟରତ ଜଣେ ମହିଳା କନେଷ୍ଟବଳଙ୍କ ସ୍ୱାମୀଙ୍କୁ ଗତ ୨୯ ତାରିଖ ରାତିରେ ଦୁର୍ବୃତ୍ତମାନେ ଗୁଳି କରି ହତ୍ୟା କରିବା ଘଟଣା ପରେ ପୁଲିସ ପ୍ରଶାସନ ଆକ୍ସନ ମୋଡ୍କୁ ଆସିଛି। ହତ୍ୟାକାଣ୍ଡ ପରେ ଅଭିଯୁକ୍ତଙ୍କୁ ଧରିବା ସହ ଅପରାଧୀଙ୍କ ଗତିବିଧି ଉପରେ ରୋକ୍ ଲଗାଇବା ପାଇଁ ପାଟଣା ଅଞ୍ଚଳର ବିଭିନ୍ନ ସମ୍ବେଦନଶୀଳ ସ୍ଥାନରେ କଡ଼ା ନାକାବନ୍ଦୀ ଓ ଯାନବାହନ ଯାଞ୍ଚ ଆରମ୍ଭ ହୋଇଛି।୨୨୦ ନମ୍ବର ଜାତୀୟ ରାଜପଥର ବିଭିନ୍ନ ସ୍ଥାନ ସମେତ ମୟୂରଭଞ୍ଜ ଜିଲ୍ଲା ସୀମା ଦେଓନଦୀ ପୋଲ ନିକଟରେ ପୁଲିସ ପକ୍ଷରୁ ବ୍ୟାରିକେଡ୍ ଲଗାଇ ଯାନବାହନ ଯାଞ୍ଚ କରାଯାଉଛି। ଅଞ୍ଚଳରେ ଶାନ୍ତିଶୃଙ୍ଖଳା ବଜାୟ ରଖିବା ସହ ସନ୍ଦିଗ୍ଧ ବ୍ୟକ୍ତି ଓ ଅପରାଧୀଙ୍କ ଗତିବିଧି ଉପରେ ନଜର ରଖାଯାଇଛି।ପାଟଣା ଥାନା ଅଧିକାରୀ କିରଣ ପ୍ରସାଦ ସାହୁଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୨୨୦ ନମ୍ବର ଜାତୀୟ ରାଜପଥର ଖଜୁରୀଡିହା ଛକ ନିକଟରେ ପୁଲିସର ଏକ ସ୍ୱତନ୍ତ୍ର ଟିମ୍ ମୁତୟନ କରାଯାଇଛି। ଏଠାରେ ଯାତାୟାତ କରୁଥିବା ସନ୍ଦିଗ୍ଧ ବାଇକ୍, କାର୍ ଓ ଭାରୀ ଯାନଗୁଡ଼ିକୁ ଅଟକାଇ ଯାଞ୍ଚ କରାଯାଉଛି।ଯାଞ୍ଚ ସମୟରେ ଚାଳକଙ୍କ ପରିଚୟପତ୍ର, ଡ୍ରାଇଭିଂ ଲାଇସେନ୍ସ ସହ ଗାଡ଼ିର ଆବଶ୍ୟକୀୟ କାଗଜପତ୍ର ଯାଞ୍ଚ କରାଯାଉଛି। ଏଥିସହ ଗାଡ଼ିଗୁଡ଼ିକରେ କୌଣସି ସନ୍ଦିଗ୍ଧ ସାମଗ୍ରୀ ରହିଛି କି ନାହିଁ, ସେନେଇ ମଧ୍ୟ ତଲାସି କରାଯାଉଛି।
ଅନ୍ୟପଟେ ସାହାରପଡ଼ା ଫାଣ୍ଡି ପୁଲିସ ପକ୍ଷରୁ ମୟୂରଭଞ୍ଜ ଜିଲ୍ଲାକୁ ସଂଯୋଗ କରୁଥିବା ଦେଓନଦୀ ପୋଲ ନିକଟରେ ବ୍ୟାରିକେଡ୍ ଲଗାଇ ନାକାବନ୍ଦୀ କରାଯାଇଛି। ହତ୍ୟାକାଣ୍ଡ ପରେ ଅଭିଯୁକ୍ତ ବା ସନ୍ଦିଗ୍ଧ ବ୍ୟକ୍ତିମାନେ ଅନ୍ୟ ଅଞ୍ଚଳକୁ ଖସି ନଯାଇପାରିବେ, ସେଥିପାଇଁ ସୀମାନ୍ତ ଅଞ୍ଚଳ ଓ ମୁଖ୍ୟ ସଂଯୋଗକାରୀ ରାସ୍ତାଗୁଡ଼ିକରେ ପୁଲିସ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଛି।ଘଟଣା ପରେ ପୁଲିସର ଏହି ତତ୍ପରତା ଅଞ୍ଚଳରେ ଅପରାଧୀଙ୍କ ଗତିବିଧି ଉପରେ ରୋକ୍ ଲଗାଇବା ସହ ହତ୍ୟାକାଣ୍ଡର ତଦନ୍ତକୁ ଆହୁରି ଜୋରଦାର କରିବ ବୋଲି ଜଣାପଡ଼ିଛି।
