କେନ୍ଦୁଝର/ପାଟଣା, ୫/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ କଣ୍ଟିଆପଡ଼ା ପଞ୍ଚାୟତ କାର୍ଯ୍ୟାଳୟ ପରିସରରେ ସେବା ସଂକଳ୍ପ ଅଭିଯାନ-୨୦୨୬ ଅନୁଷ୍ଠିତ ହୋଇଯାଇଛି। କଣ୍ଟିଆପଡ଼ା, କେନ୍ଦେଇପଶି ଓ ଚାକୁଣ୍ଡାପାଳ ପଞ୍ଚାୟତର ଲୋକଙ୍କୁ ନେଇ ଆୟୋଜିତ ଏହି ମିଳିତ ଶିବିରରେ ବିଭିନ୍ନ ସରକାରୀ ସେବା ଓ ଯୋଜନା ଲୋକଙ୍କ ନିକଟରେ ପହଞ୍ଚାଇ ଦିଆଯାଇଥିଲା।ଶିବିରରେ ଗ୍ରାମାଞ୍ଚଳବାସୀଙ୍କ ବିଭିନ୍ନ ଅଭିଯୋଗ ଓ ସମସ୍ୟାର ଶୁଣାଣି କରାଯିବା ସହ ତ୍ୱରିତ ସମାଧାନ ପାଇଁ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ।କାର୍ଯ୍ୟକ୍ରମରେ ପାଟଣା ଗୋଷ୍ଠୀ ଉନ୍ନୟନ ଅଧିକାରୀ ମାନସ କୁମାର ଦଣ୍ଡପାଟ, ଅତିରିକ୍ତ ତହସିଲଦାର ରବିଶଙ୍କର ହେମ୍ବ୍ରମ, ଅଧିକାରୀ ଅମରେଶ କର, ଗ୍ରାମ୍ୟ ଆବାସ ଯୋଜନା ଅଧିକାରୀ ସୁରେନ୍ଦ୍ର ଖଣ୍ଡା, ଯୋଗାଣ ନିରୀକ୍ଷକ ଦିବ୍ୟରାଜ ଭୋଇ, ବ୍ଲକ ସାମାଜିକ ସୁରକ୍ଷା ଅଧିକାରୀ ଅଭୟ ଚରଣ ଦେହୁରୀ, ମଙ୍ଗଳ ସମ୍ପ୍ରସାରଣ ଅଧିକାରିଣୀ ସିପ୍ରା ରାଣୀ ମହାନ୍ତ, ପରିମଳ ବିଭାଗର ଜମାଲୁଦିନ ଖାନ ଏବଂ ଖିରେଇଟାଙ୍ଗିରି ବନପାଳ ପୂର୍ଣ୍ଣଚନ୍ଦ୍ର ମହାନ୍ତଙ୍କ ସମେତ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀ ଯୋଗଦେଇଥିଲେ।
ବିଭିନ୍ନ ବିଭାଗର ସ୍ୱତନ୍ତ୍ର ଷ୍ଟଲ୍
ସେବା ସଂକଳ୍ପ ଶିବିରରେ କୃଷି, ସ୍ୱାସ୍ଥ୍ୟ, ରାଜସ୍ୱ, ଶ୍ରମ ଓ ପଞ୍ଚାୟତିରାଜ ବିଭାଗ ପକ୍ଷରୁ ସ୍ୱତନ୍ତ୍ର ଷ୍ଟଲ୍ ଖୋଲାଯାଇଥିଲା। ଏଠାରେ ଲୋକଙ୍କୁ ବିଭିନ୍ନ ସରକାରୀ ସେବା ଓ ଯୋଜନା ସମ୍ପର୍କରେ ସୂଚନା ଦିଆଯିବା ସହ ଆବେଦନ ଓ ସଂଶୋଧନର ସୁବିଧା ଯୋଗାଇ ଦିଆଯାଇଥିଲା।ଶିବିରରେ ସାମାଜିକ ସୁରକ୍ଷା ଭତ୍ତା, ନୂତନ ରାସନ କାର୍ଡ ଆବେଦନ ଓ ସଂଶୋଧନ, ଆଧାର କାର୍ଡ ପଞ୍ଜୀକରଣ ଓ ସଂଶୋଧନ, ପ୍ରଧାନମନ୍ତ୍ରୀ ଆବାସ ଯୋଜନା ସମ୍ପର୍କିତ ତଥ୍ୟ ଯାଞ୍ଚ, ମାଗଣା ସ୍ୱାସ୍ଥ୍ୟ ପରୀକ୍ଷା ଏବଂ ନିର୍ମାଣ ଶ୍ରମିକ କାର୍ଡ ପଞ୍ଜୀକରଣ ଭଳି ସେବା ପ୍ରଦାନ କରାଯାଇଥିଲା।
ବନ ବିଭାଗ ଓ ଆଧାର ସେବା ମଧ୍ୟ ଉପଲବ୍ଧ
ଶିବିରରେ ବନ ବିଭାଗ ସମ୍ପର୍କିତ ବିଭିନ୍ନ ଦାବି ଓ ଅଭିଯୋଗର ସମାଧାନ ପାଇଁ ବ୍ୟବସ୍ଥା କରାଯାଇଥିଲା। ଏଥିସହ ଆଧାର କେନ୍ଦ୍ର ମାଧ୍ୟମରେ ଆଧାର କାର୍ଡ ସଂଶୋଧନର ସୁବିଧା ମଧ୍ୟ ଲୋକଙ୍କୁ ମିଳିଥିଲା।ତିନୋଟି ପଞ୍ଚାୟତର ପଞ୍ଚାୟତ କର୍ମଚାରୀ, ଲୋକପ୍ରତିନିଧି ଏବଂ ବ୍ଲକସ୍ତରୀୟ ବିଭିନ୍ନ ବିଭାଗର ଅଧିକାରୀମାନେ ଶିବିରରେ ଯୋଗଦେଇଥିଲେ। ସମଗ୍ର କାର୍ଯ୍ୟକ୍ରମକୁ ପ୍ରଶାସନିକ ଅଧିକାରୀମାନେ ତଦାରଖ କରିଥିଲେ।
ଶତାଧିକ ହିତାଧିକାରୀ ଉପକୃତ
ଗୋଟିଏ ସ୍ଥାନରେ ଏକାଧିକ ସରକାରୀ ସେବା ପାଇବା ସହ ନିଜର ସମସ୍ୟା ଓ ଅଭିଯୋଗ ଜଣାଇବାର ସୁଯୋଗ ମିଳିଥିବାରୁ କଣ୍ଟିଆପଡ଼ା, କେନ୍ଦେଇପଶି ଓ ଚାକୁଣ୍ଡାପାଳ ପଞ୍ଚାୟତର ଶତାଧିକ ହିତାଧିକାରୀ ଉପକୃତ ହୋଇଛନ୍ତି।
ଗ୍ରାମାଞ୍ଚଳର ଲୋକଙ୍କ ନିକଟରେ ପ୍ରଶାସନ ଓ ସରକାରୀ ସେବା ପହଞ୍ଚାଇବା ସହ ଯୋଗ୍ୟ ହିତାଧିକାରୀଙ୍କ ସମସ୍ୟାର ତ୍ୱରିତ ସମାଧାନ କରିବା ‘ସେବା ସଂକଳ୍ପ ଅଭିଯାନ’ର ମୁଖ୍ୟ ଉଦ୍ଦେଶ୍ୟ ବୋଲି ପ୍ରଶାସନ ପକ୍ଷରୁ କୁହାଯାଇଛି।
