କେନ୍ଦୁଝର/ପାଟଣା, ୫/୧୦: ରାଷ୍ଟ୍ରୀୟ ପୋଷଣ ମାସ ଅବସରରେ କେନ୍ଦୁଝର ଜିଲ୍ଲା ପାଟଣା ବ୍ଲକରେ ପାରମ୍ପରିକ ଓ ସ୍ଥାନୀୟ ପୌଷ୍ଟିକ ଖାଦ୍ୟକୁ ନେଇ ଏକ ଖାଦ୍ୟମେଳା ଆୟୋଜିତ ହୋଇଯାଇଛି। ରାଜ୍ୟର ଅନ୍ୟତମ ଅଗ୍ରଣୀ ସ୍ୱେଚ୍ଛାସେବୀ ସଂଗଠନ ପିପୁଲସ୍ କଲ୍ଚରାଲ୍ ସେଣ୍ଟର (ପିକକ୍) ପକ୍ଷରୁ ପାଟଣା ବ୍ଲକ ଆଇସିଡିଏସ୍ ହତା ପରିସରରେ ଏହି ପାରମ୍ପରିକ ଖାଦ୍ୟମେଳା ଆୟୋଜନ କରାଯାଇଥିଲା।
ଏହି ଖାଦ୍ୟମେଳାରେ ୫୦ରୁ ଅଧିକ ମହିଳା ଅଂଶଗ୍ରହଣ କରି ପ୍ରାୟ ୬୦ ପ୍ରକାରର ପାରମ୍ପରିକ, ପୌଷ୍ଟିକ ଓ ସ୍ଥାନୀୟ ଖାଦ୍ୟ ପ୍ରଦର୍ଶନ କରିଥିଲେ। ସ୍ଥାନୀୟ ଖାଦ୍ୟ ପରମ୍ପରା, ପୋଷଣ ଓ ସ୍ୱାସ୍ଥ୍ୟକର ଖାଦ୍ୟ ସମ୍ପର୍କରେ ଲୋକଙ୍କୁ ସଚେତନ କରିବା ଏହି ମେଳାର ମୁଖ୍ୟ ଉଦ୍ଦେଶ୍ୟ ଥିଲା।କାର୍ଯ୍ୟକ୍ରମରେ ବଡ଼ପାଟଣା ସରପଞ୍ଚ ବିନତି ବାନରା, ପାଟଣା ବ୍ଲକର ବ୍ଲକ ଶିକ୍ଷାଧିକାରୀ ସଚ୍ଚିଦାନନ୍ଦ ସେଠୀ, ପ୍ରକାଶ କୁମାର ରାୟ ଓ ଜଗଦୀଶ ଚନ୍ଦ୍ର ନାୟକ, ସିଡିପିଓ କଳ୍ପନା ଦୋରା, ପିଇଓ ଅଶୋକ କୁମାର ମହାନ୍ତ, ସାମ୍ବାଦିକ ନୃସିଂହ ନାଥ ସିଂହଙ୍କ ସମେତ ଆଇସିଡିଏସ୍ ପରିଦର୍ଶିକାମାନେ ଯୋଗଦେଇଥିଲେ।ଏହି ଅବସରରେ ପିକକ୍ର ସମ୍ପାଦକ ରଞ୍ଜନ କୁମାର ମହାନ୍ତି ଯୋଗଦେଇ ପାରମ୍ପରିକ ଖାଦ୍ୟର ଗୁରୁତ୍ୱ ଓ ଖାଦ୍ୟମେଳା ଆୟୋଜନର ଉଦ୍ଦେଶ୍ୟ ସମ୍ପର୍କରେ ମତ ରଖିଥିଲେ। ସେ କହିଥିଲେ, ପାରମ୍ପରିକ ଖାଦ୍ୟମେଳା ମାଧ୍ୟମରେ ଆମର ସମୃଦ୍ଧ ଖାଦ୍ୟ ପରମ୍ପରା ଓ ସ୍ଥାନୀୟ ଖାଦ୍ୟ ସଂସ୍କୃତିର ସୁରକ୍ଷା ସହ ପୌଷ୍ଟିକ ଓ ସ୍ୱାସ୍ଥ୍ୟକର ଖାଦ୍ୟ ପ୍ରତି ଲୋକଙ୍କ ସଚେତନତା ବୃଦ୍ଧି କରାଯାଇପାରିବ।ବିଶେଷକରି ଜଙ୍ଗଲରୁ ମିଳୁଥିବା ବିଭିନ୍ନ ଖାଦ୍ୟର ସୁରକ୍ଷିତ ବ୍ୟବହାର ଦ୍ୱାରା ସ୍ଥାନୀୟ ଖାଦ୍ୟର ବିବିଧତା ବଢ଼ିବା ସହ ପୋଷଣ ସୁରକ୍ଷା ମଧ୍ୟ ସୁଦୃଢ଼ ହୋଇପାରିବ। ପାରମ୍ପରିକ ଖାଦ୍ୟର ନିୟମିତ ବ୍ୟବହାର ମହିଳା ଓ ଶିଶୁମାନଙ୍କୁ ଆବଶ୍ୟକ ପୋଷକତତ୍ତ୍ୱ ଯୋଗାଇବା ସହ ଅପପୁଷ୍ଟି ହ୍ରାସରେ ସହାୟକ ହେବ ବୋଲି ସେ ମତ ପ୍ରକାଶ କରିଥିଲେ।
ମେଳା ପରିଦର୍ଶନ କରି ଅତିଥିମାନେ ବିଭିନ୍ନ ପାରମ୍ପରିକ ଓ ସ୍ଥାନୀୟ ଖାଦ୍ୟର ଗୁଣବତ୍ତା, ପୌଷ୍ଟିକ ମୂଲ୍ୟ ଓ ମାନବ ସ୍ୱାସ୍ଥ୍ୟ ଉପରେ ଏହାର ସକାରାତ୍ମକ ପ୍ରଭାବ ସମ୍ପର୍କରେ ମତ ରଖିବା ସହ ପିକକ୍ର ଏହି ଉଦ୍ୟମକୁ ପ୍ରଶଂସା କରିଥିଲେ।
ଏହି ଖାଦ୍ୟମେଳାରେ ୧୦୦ରୁ ଅଧିକ ଲୋକ ଯୋଗଦେଇଥିଲେ। ପିକକ୍ର ସତ୍ୟନାରାୟଣ ମହାନ୍ତ, ପୂଜା ପଣ୍ଡା, ଦ୍ରୌପଦୀ ବେଜ, ସୁଚିତ୍ରା, ମେଘମାଳା, ଲକ୍ଷ୍ମୀକାନ୍ତ ଓ ମିଲିୟନ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
