କେନ୍ଦୁଝର/ପାଟଣା, ୧୪/୧୦: କେନ୍ଦୁଝର ଜିଲ୍ଲା ପାଟଣାସ୍ଥିତ ସ୍ୱାମ ପାଟଣା ଆଞ୍ଚଳିକ ମହାବିଦ୍ୟାଳୟର ଛାତ୍ର ସଂସଦ ନିର୍ବାଚନକୁ ନେଇ କ୍ୟାମ୍ପସରେ ରାଜନୈତିକ ଉତ୍ସାହ ବଢ଼ିଛି। ଅକ୍ଟୋବର ୧୫ ତାରିଖରେ ଭୋଟଗ୍ରହଣ ହେବାକୁ ଥିବାବେଳେ ୧୪ ତାରିଖରେ ପ୍ରଚାର ଶେଷ ହୋଇଛି। ଶେଷ ମୁହୂର୍ତ୍ତରେ ପ୍ରାର୍ଥୀମାନେ ଭୋଟରଙ୍କ ସମର୍ଥନ ହାସଲ ପାଇଁ ଘରେ ଘରେ ବୁଲି ପ୍ରଚାର କରୁଛନ୍ତି।
‘ମୁଁ କାହିଁକି ପ୍ରାର୍ଥୀ ହେଲି’ କାର୍ଯ୍ୟକ୍ରମ
ବୁଧବାର ମହାବିଦ୍ୟାଳୟର ସଭାକକ୍ଷରେ ଅଧ୍ୟକ୍ଷ ଜଗନ୍ନାଥ ମହାନ୍ତଙ୍କ ଅଧ୍ୟକ୍ଷତାରେ ‘ମୁଁ କାହିଁକି ପ୍ରାର୍ଥୀ ହେଲି’ କାର୍ଯ୍ୟକ୍ରମ ଆୟୋଜିତ ହୋଇଥିଲା। ନିର୍ବାଚନ ଅଧିକାରୀ ଅଧ୍ୟାପକ ହଳଧର ସାହୁଙ୍କ ସହ ଅଧ୍ୟାପକ ଡ. ହୃଦାନନ୍ଦ ବିଶ୍ୱାଳ ଓ ଗଜେନ୍ଦ୍ର ପତି ଉପସ୍ଥିତ ଥିଲେ।ଏହି କାର୍ଯ୍ୟକ୍ରମରେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଥିବା ଛାତ୍ରଛାତ୍ରୀମାନେ ନିଜ ନିଜର ଉଦ୍ଦେଶ୍ୟ, ଲକ୍ଷ୍ୟ ଓ ପ୍ରାର୍ଥୀ ହେବାର କାରଣ ସମ୍ପର୍କରେ ମତ ରଖିଥିଲେ। ମୋଟ ୧୯ ଜଣ ପ୍ରାର୍ଥୀଙ୍କ ମଧ୍ୟରୁ ୧୮ ଜଣ ଏହି କାର୍ଯ୍ୟକ୍ରମରେ ଯୋଗଦେଇଥିଲେ।
ଏବିଭିପି ଓ ବିସିଜେଡି ମଧ୍ୟରେ କଡ଼ା ଟକ୍କର
ମହାବିଦ୍ୟାଳୟର ପ୍ରମୁଖ ପଦବୀଗୁଡ଼ିକ ପାଇଁ ଏବିଭିପି ଓ ବିସିଜେଡି ସମର୍ଥିତ ପ୍ରାର୍ଥୀଙ୍କ ମଧ୍ୟରେ କଡ଼ା ପ୍ରତିଦ୍ୱନ୍ଦ୍ୱିତା ହେଉଥିବା ଜଣାପଡ଼ିଛି।ସଭାପତି ପଦ ପାଇଁ ସଲୋନୀ ତ୍ରିପାଠୀ, ଶୁଭମ କୁମାର ମହାନ୍ତ, ପୁଣ୍ୟବନ୍ତ ପ୍ରଧାନ ଓ ପୂର୍ଣ୍ଣିମା ବେହେରାଙ୍କ ମଧ୍ୟରେ ଲଢ଼େଇ ହେଉଛି। ସେହିପରି ସାଧାରଣ ସମ୍ପାଦକ ପଦ ପାଇଁ ଆକାଶ ପାତ୍ର ଓ ଅଙ୍କିତା ବାରିକ ପ୍ରତିଦ୍ୱନ୍ଦ୍ୱିତା କରୁଛନ୍ତି।ସହସମ୍ପାଦକ ପଦ ପାଇଁ ବିରେନ୍ଦ୍ର ବେହେରା ଓ ବିମଳା ମହାନ୍ତ, ଡିଏସଏ ପଦ ପାଇଁ ସତ୍ୟଜିତ ସତ୍ୟପ୍ରକାଶ ମହାନ୍ତି ଓ ସରୋଜ କୁମାର ମଇଦାନରେ ଅଛନ୍ତି।
କ୍ରୀଡ଼ା ସମ୍ପାଦକ ପଦ ପାଇଁ ଦିଗନ୍ତ ପ୍ରସାଦ ସେଠୀ ଓ ସମିର କୁମାର ନାଏକଙ୍କ ମଧ୍ୟରେ ଲଢ଼େଇ ହେଉଛି। ଡ୍ରାମାଟିକ ସେକ୍ରେଟାରୀ ପଦ ପାଇଁ ପ୍ରିୟଦର୍ଶୀ ମହାନ୍ତ, ରଞ୍ଜନ କୁମାର ମହାନ୍ତ ଓ ଦିନେଶ ମହାନ୍ତ ପ୍ରତିଦ୍ୱନ୍ଦ୍ୱିତା କରୁଛନ୍ତି।
ସହ ଡ୍ରାମାଟିକ ସମ୍ପାଦକ ପଦ ପାଇଁ ଭାରତୀ ନାୟକ ଓ ଅବିନାଶ ସେଠୀ ଏବଂ ସହ ଡିଏସଏ ପଦ ପାଇଁ ବୈଲୋଚନ ପ୍ରଧାନ ଓ ସନ୍ଦୀପ କୁମାର ମହାନ୍ତଙ୍କ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେଉଛି।
ଦୁଇ ପଦବୀରେ ଜଣେ ଲେଖାଏଁ ପ୍ରାର୍ଥୀ
ଉପସଭାପତି ପଦ ପାଇଁ ଜଣେ ପ୍ରାର୍ଥୀଙ୍କ ନାମାଙ୍କନପତ୍ର ନାକଚ ହେବା ପରେ ତ୍ରିନାଥ ମହାନ୍ତ ଏକମାତ୍ର ପ୍ରାର୍ଥୀ ରହିଛନ୍ତି। ସେହିପରି ଆସିଷ୍ଟାଣ୍ଟ ଆଥଲେଟିକ୍ ସମ୍ପାଦକ ପଦ ପାଇଁ ବର୍ଷା ରାଣୀ ମହାନ୍ତ ଏକମାତ୍ର ପ୍ରାର୍ଥୀ ଥିବାରୁ ଏହି ଦୁଇଟି ପଦବୀରେ ସେମାନଙ୍କ ବିଜୟ ସମ୍ଭାବନା ଦୃଢ଼ ହୋଇଛି।ଅନ୍ୟ ପଦବୀଗୁଡ଼ିକ ପାଇଁ ଏବିଭିପି ଓ ବିସିଜେଡି ମଧ୍ୟରେ କଡ଼ା ମୁକାବିଲା ହେଉଥିବାରୁ ଅକ୍ଟୋବର ୧୫ ତାରିଖ ଭୋଟଗ୍ରହଣକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ଉତ୍ସୁକତା ବଢ଼ିଛି। କେଉଁ ପ୍ରାର୍ଥୀ ବାଜିମାତ କରିବେ, ତାହା ନିର୍ବାଚନ ଫଳାଫଳ ପରେ ସ୍ପଷ୍ଟ ହେବ।
