କେନ୍ଦୁଝର/ପାଟଣା, ୨୫/୧୦: କେନ୍ଦୁଝର ଜିଲ୍ଲା ପାଟଣାରେ ପାଟଣା କୁମାରୋତ୍ସବ କମିଟି ପକ୍ଷରୁ ୫୬ତମ କୁମାରୋତ୍ସବ ଆରମ୍ଭ ହୋଇଛି। ଏହି ଅବସରରେ ଆନନ୍ଦେଶ୍ୱର ମହାଦେବ ମନ୍ଦିର ପ୍ରାଙ୍ଗଣସ୍ଥିତ ପଡ଼ିଆରେ ମା’ ଲକ୍ଷ୍ମୀଙ୍କ ମୃଣ୍ମୟୀ ପ୍ରତିମା ସ୍ଥାପନ କରାଯାଇଛି। ରବିବାର ସନ୍ଧ୍ୟାରେ ବିଧିବିଧାନ ଅନୁଯାୟୀ ମା’ଙ୍କ ପୂଜାର୍ଚ୍ଚନା ଆରମ୍ଭ ହେବା ସହ ଅଞ୍ଚଳରେ ଭକ୍ତିମୟ ପରିବେଶ ସୃଷ୍ଟି ହୋଇଛି।କୁମାରୋତ୍ସବ କମିଟିର ସଭାପତି ବିବେକାନନ୍ଦ ଦାଶ ଓ ସମ୍ପାଦକ ଲିପକ କୁମାର ସାହୁଙ୍କ ଉପସ୍ଥିତିରେ କର୍ତ୍ତା ଭାବେ ତାପସ କୁମାର ମିଶ୍ର ପୂଜାର୍ଚ୍ଚନାରେ ସାମିଲ ହୋଇଛନ୍ତି। ପୂଜକ ରାମଚନ୍ଦ୍ର ଦାଶ, ଜ୍ଞାନେନ୍ଦ୍ର ପଣ୍ଡା ଓ ନବକିଶୋର ଦାଶ ପୂଜାବିଧି ସମ୍ପନ୍ନ କରୁଛନ୍ତି।କମିଟି ପକ୍ଷରୁ ପ୍ରିୟବ୍ରତ ମିଶ୍ର, ଅଭିଷେକ ଦାଶ, କମଳାକାନ୍ତ ପତି, ପ୍ରୀତମ ପଣ୍ଡା, ସୁଜିତ ମିଶ୍ର ଓ ସୌମ୍ୟରଞ୍ଜନ ଦାଶଙ୍କ ସମେତ ଅନ୍ୟ ସଦସ୍ୟମାନେ ଉତ୍ସବର ବିଭିନ୍ନ କାର୍ଯ୍ୟକ୍ରମ ପରିଚାଳନା କରୁଛନ୍ତି।ଚଳିତ ବର୍ଷ କୁମାରୋତ୍ସବ ଅବସରରେ ଉଭୟ ବାଳକ ଓ ବାଳିକା ବର୍ଗର କନିଷ୍ଠ ଓ ବରିଷ୍ଠ ପ୍ରତିଯୋଗୀଙ୍କୁ ନେଇ ବିଭିନ୍ନ ଖେଳକୁଦ ଓ କୌତୁକ କ୍ରୀଡ଼ା ପ୍ରତିଯୋଗିତା ଆୟୋଜନ କରାଯିବ। ଏଥିସହ ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ହେବ। ଉଦ୍ଯାପନୀ ଉତ୍ସବରେ ବିଭିନ୍ନ ପ୍ରତିଯୋଗିତାର ବିଜେତାମାନଙ୍କୁ ପୁରସ୍କୃତ କରାଯିବ ବୋଲି କମିଟି ପକ୍ଷରୁ ସୂଚନା ମିଳିଛି।ଅନ୍ୟପକ୍ଷରେ ପାଟଣା ଅଞ୍ଚଳ ସମେତ ତୁରୁମୁଙ୍ଗା, ଖିରେଇଟାଙ୍ଗିରି, କେନ୍ଦେଇପଶି, ସାଧୁପଡ଼ା, ସଅଁରାପଶି, ପୁଟୁଳିଆ, କୁଆପଶି, କୁଣ୍ଡୁଳା, ମୁରୁସୁଆଁ ଓ ଡେଣୁଆ ଆଦି ବିଭିନ୍ନ ଗ୍ରାମରେ ମଧ୍ୟ ମା’ ଲକ୍ଷ୍ମୀଙ୍କ ପୂଜା ଧୁମ୍ଧାମରେ ଆରମ୍ଭ ହୋଇଛି। ପୂଜା ଓ ଉତ୍ସବକୁ ନେଇ ସମଗ୍ର ଅଞ୍ଚଳରେ ଉତ୍ସାହ ଦେଖିବାକୁ ମିଳୁଛି।
