ଚୋରି ଓ ଡକାୟତି ରୋକିବାକୁ ତୁରୁମୁଙ୍ଗା ପୁଲିସର ଯାନବାହନ ଯାଞ୍ଚ କଡ଼ାକଡ଼ି

କେନ୍ଦୁଝର/ପାଟଣା, ୨୫/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ତୁରୁମୁଙ୍ଗା ଥାନା ଅଞ୍ଚଳରେ ଚୋରି, ଡକାୟତି ଓ ଅନ୍ୟାନ୍ୟ ଅପରାଧ ରୋକିବା ପାଇଁ ପୁଲିସ ପକ୍ଷରୁ ଯାନବାହନ ଯାଞ୍ଚ ଓ ପେଟ୍ରୋଲିଂ କଡ଼ାକଡ଼ି କରାଯାଇଛି। କେନ୍ଦେଇପଶି ପଞ୍ଚାୟତର ଖୁଣ୍ଟାପଡ଼ା ହନୁମାନ ଛକଠାରେ ତୁରୁମୁଙ୍ଗା ପୁଲିସ ପକ୍ଷରୁ ଏହି ଯାଞ୍ଚ ଅଭିଯାନ ଚାଲିଛି।ଅଞ୍ଚଳରେ ଅପରାଧ ନିୟନ୍ତ୍ରଣ, ଆଇନଶୃଙ୍ଖଳା ରକ୍ଷା ଓ ସଡ଼କ ସୁରକ୍ଷାକୁ ଗୁରୁତ୍ୱ ଦେଇ ପୁଲିସ ଏହି ପଦକ୍ଷେପ ଗ୍ରହଣ କରିଛି। ଯାଞ୍ଚ ସମୟରେ ଦୁଇଚକିଆ ଓ ଚାରିଚକିଆ ଯାନର କାଗଜପତ୍ର, ଚାଳକଙ୍କ ଡ୍ରାଇଭିଂ ଲାଇସେନ୍ସ, ଗାଡ଼ିର ଡିକି ଓ ହେଲମେଟ ଯାଞ୍ଚ କରାଯାଉଛି। ଏଥିସହ ବାହାର ରାଜ୍ୟରୁ ଆସୁଥିବା ଚାଳକଙ୍କ ପରିଚୟପତ୍ର ଯାଞ୍ଚ କରାଯାଉଥିବା ବେଳେ ଆବଶ୍ୟକସ୍ଥଳେ ସେମାନଙ୍କୁ ଅଟକ ରଖି ପଚରାଉଚରା ମଧ୍ୟ କରାଯାଉଛି।ରବିବାର ହନୁମାନ ଛକଠାରେ ତୁରୁମୁଙ୍ଗା ଥାନାର ଏସ୍‌ଆଇ ସୁଜାତା ମହାନ୍ତ ଏବଂ ଅପରାହ୍ନରେ ଏସ୍‌ଆଇ ଅନନ୍ତ ନାରାୟଣ ନାୟକଙ୍କ ନେତୃତ୍ୱରେ ପୁଲିସ ଟିମ୍‌ ଯାନବାହନ ଯାଞ୍ଚ କରିଥିଲେ।ବିଶେଷକରି ହନୁମାନ ଛକରୁ ଉଦୟପୁର ରାସ୍ତା, କେନ୍ଦେଇପଶିରୁ ପାଟଣା ରାସ୍ତା ଏବଂ ମୁରୁସୁଆଁରୁ କେନ୍ଦେଇପଶି ରାସ୍ତାରେ ଥିବା ଜଙ୍ଗଲ ଓ ନିଛାଟିଆ ଅଞ୍ଚଳ ଉପରେ ପୁଲିସ ନଜର ରଖିଛି। ଏହି ରାସ୍ତାଗୁଡ଼ିକରେ ପୂର୍ବରୁ ଚୋରି, ଡକାୟତି, ହତ୍ୟା ଓ ସଡ଼କ ଦୁର୍ଘଟଣା ଭଳି ଘଟଣା ଘଟିଥିବାରୁ ସମ୍ଭାବ୍ୟ ଅପରାଧକୁ ରୋକିବା ଏବଂ ଅସାମାଜିକ ବ୍ୟକ୍ତିଙ୍କ ଗତିବିଧି ଉପରେ ନଜର ରଖିବାକୁ ନିୟମିତ ଯାଞ୍ଚ ଓ ପେଟ୍ରୋଲିଂ କରାଯାଉଛି।ତୁରୁମୁଙ୍ଗା ଥାନା ଅଧିକାରୀ ଦୀପ୍ତିରଞ୍ଜନ ସାହୁ ଏହି ସୂଚନା ଦେଇଛନ୍ତି। ପୁଲିସର ଏଭଳି ଯାଞ୍ଚ ଅଭିଯାନ ଦ୍ୱାରା ଅପରାଧ ନିୟନ୍ତ୍ରଣ ହେବା ସହ ଅଞ୍ଚଳବାସୀଙ୍କ ମଧ୍ୟରେ ସୁରକ୍ଷା ଭାବନା ବୃଦ୍ଧି ପାଇବ ବୋଲି ଆଶା କରାଯାଉଛି।