କେନ୍ଦୁଝର/ପାଟଣା, ୩/୧୦: ପାଟଣା ବ୍ଲକ ଅନ୍ତର୍ଗତ ମୂଷାଖୋରୀ ପଞ୍ଚାୟତର ମୂଷାଖୋରୀ ଗ୍ରାମରେ ଆସନ୍ତା ଗଜଲକ୍ଷ୍ମୀ ପୂଜା ପାଇଁ ପାରମ୍ପରିକ ରୀତିନୀତି ଅନୁଯାୟୀ ମାଟି ଅନୁକୂଳ କାର୍ଯ୍ୟ ସମ୍ପନ୍ନ ହୋଇଛି। ଏହାକୁ ନେଇ ଗ୍ରାମରେ ଭକ୍ତିମୟ ଓ ଉତ୍ସବମୁଖର ପରିବେଶ ସୃଷ୍ଟି ହୋଇଛି।
ଏହି ଅବସରରେ ଗ୍ରାମବାସୀ, ଶ୍ରଦ୍ଧାଳୁ ଓ ପୂଜା କମିଟିର କର୍ମକର୍ତ୍ତାମାନେ ଏକତ୍ରିତ ହୋଇ ହରିବୋଲ, ହୁଳହୁଳି ଓ ସଂକୀର୍ତ୍ତନ ଧ୍ୱନିରେ ଏକ ଭବ୍ୟ ଶୋଭାଯାତ୍ରାରେ ଗ୍ରାମ ନିକଟସ୍ଥ ଐତିହାସିକ ଆହାର ବନ୍ଧ ନିକଟକୁ ଯାଇଥିଲେ।
ସେଠାରେ ପୂଜକଙ୍କ ବେଦମନ୍ତ୍ର ଉଚ୍ଚାରଣ ମଧ୍ୟରେ ଜଳାଶୟ ତଟରେ ବିଧିବଦ୍ଧ ଭାବେ ପୂଜାର୍ଚ୍ଚନା କରାଯାଇଥିଲା। ପୂଜା ପରେ ଧନଦାତ୍ରୀ ମା’ ଗଜଲକ୍ଷ୍ମୀଙ୍କ ମୃଣ୍ମୟୀ ପ୍ରତିମା ନିର୍ମାଣ ପାଇଁ ପବିତ୍ର ଶୁଭ ମାଟି ସଂଗ୍ରହ କରାଯାଇଥିଲା।ମାଟି ସଂଗ୍ରହ ପରେ ଶ୍ରଦ୍ଧାଳୁମାନେ ସଂକୀର୍ତ୍ତନର ତାଳେ ତାଳେ ଗ୍ରାମ ପରିକ୍ରମା କରି ପୂଜା ମଣ୍ଡପରେ ପହଞ୍ଚିଥିଲେ। ସେଠାରେ ଗ୍ରାମର ମହିଳାମାନେ ଝୋଟି, ଦୀପ ଓ ଚନ୍ଦନ ଦେଇ ପାରମ୍ପରିକ ରୀତିରେ ବନ୍ଦାପନା କରି ଶୁଭ ମାଟିକୁ ସ୍ୱାଗତ କରିଥିଲେ।ମାଟି ଅନୁକୂଳ କାର୍ଯ୍ୟକ୍ରମକୁ ନେଇ ମୂଷାଖୋରୀ ଗ୍ରାମ ସମେତ ଆଖପାଖ ଅଞ୍ଚଳରେ ଭକ୍ତି ଓ ଉତ୍ସାହର ପରିବେଶ ସୃଷ୍ଟି ହୋଇଛି। ଗଜଲକ୍ଷ୍ମୀ ପୂଜାକୁ ନେଇ ଗ୍ରାମବାସୀଙ୍କ ମଧ୍ୟରେ ଏବେଠାରୁ ଉତ୍ସାହ ପ୍ରକାଶ ପାଇଛି।
