କେନ୍ଦୁଝର/ପାଟଣା, ୨୪/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ଭୋଳବେଡ଼ା ସାପ୍ତାହିକ ହାଟରେ ସ୍ୱଚ୍ଛତା ଅଭିଯାନ ଓ ପୋଷଣ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଛି। ପାଟଣା ବ୍ଲକ ଅନ୍ତର୍ଗତ ଏରେଣ୍ଡେଇସ୍ଥିତ ଭାରତ ସଂଗଠନର ସେହାଟ୍ ପ୍ରକଳ୍ପ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ହାଟ ପରିସର ସଫେଇ ସହିତ ସ୍ୱଚ୍ଛତା, ଖାଦ୍ୟ ସୁରକ୍ଷା ଓ ପୁଷ୍ଟିକର ଖାଦ୍ୟ ଗ୍ରହଣ ସମ୍ପର୍କରେ ଜନସଚେତନତା ସୃଷ୍ଟି କରାଯାଇଥିଲା।ପ୍ରକଳ୍ପ ସଂଯୋଜକ ଶିବନାଥ ପ୍ରଧାନଙ୍କ ତତ୍ତ୍ୱାବଧାନରେ ଭାରତ ସଂଗଠନର କର୍ମୀମାନେ ଏହି ଅଭିଯାନ ପରିଚାଳନା କରିଥିଲେ। ହାଟ ପରିସରରେ ଅଳିଆ ଆବର୍ଜନା ନ ପକାଇବା, ଏକକ ବ୍ୟବହାରଯୋଗ୍ୟ ପ୍ଲାଷ୍ଟିକ୍ ଓ ପଲିଥିନ୍ର ବ୍ୟବହାର ହ୍ରାସ କରିବା ଏବଂ ଖାଦ୍ୟ ସାମଗ୍ରୀକୁ ପରିଷ୍କାର ଓ ସୁରକ୍ଷିତ ରଖିବା ଉପରେ ଗୁରୁତ୍ୱ ଦିଆଯାଇଥିଲା।ଏଥିସହିତ ଉନ୍ନତ ପୋଷଣ ପାଇଁ ଭାରତୀୟ ଖାଦ୍ୟ ପ୍ରଣାଳୀ ସମ୍ପର୍କିତ ଗବେଷଣାଭିତ୍ତିକ ପ୍ରକଳ୍ପ ବିଷୟରେ ଲୋକଙ୍କୁ ସଚେତନ କରାଯାଇଥିଲା। ଏହି ଅଧ୍ୟୟନକୁ ଲଣ୍ଡନ ସ୍କୁଲ ଅଫ୍ ହାଇଜିନ୍ ଆଣ୍ଡ୍ ଟ୍ରପିକାଲ୍ ମେଡିସିନ୍ ଏବଂ ସେଫିଲ୍ଡ ବିଶ୍ୱବିଦ୍ୟାଳୟ ସହାୟତା କରୁଥିବାବେଳେ ହାଇଦ୍ରାବାଦସ୍ଥିତ ରାଷ୍ଟ୍ରୀୟ ପୋଷଣ ସଂସ୍ଥା ପରାମର୍ଶ ଓ ତଦାରଖ କରୁଛି ବୋଲି କାର୍ଯ୍ୟକ୍ରମରେ ସୂଚନା ଦିଆଯାଇଥିଲା।ସ୍ଥାନୀୟ ଶସ୍ୟ, ଡାଲି, ଶାଗ, ପନିପରିବା ଓ ଋତୁକାଳୀନ ଫଳମୂଳ ଭଳି ପୁଷ୍ଟିକର ଖାଦ୍ୟ ଗ୍ରହଣ କରିବା ସହିତ ଶିଶୁ ଓ ମହିଳାଙ୍କ ପୋଷଣ ସ୍ଥିତିରେ ଉନ୍ନତି ଆଣିବା ଉପରେ ଆଲୋକପାତ କରାଯାଇଥିଲା। ସ୍ୱଚ୍ଛ ହାଟ, ସୁରକ୍ଷିତ ଖାଦ୍ୟ ଓ ସୁଷମ ପୋଷଣ ଏକ ସୁସ୍ଥ ସମାଜ ଗଠନର ମୂଳ ଆଧାର ହୋଇଥିବାରୁ ଏଥିରେ ହାଟ କମିଟି, ଦୋକାନୀ ଓ ସାଧାରଣ ଲୋକଙ୍କ ସହଯୋଗ ଜରୁରୀ ବୋଲି ମତ ପ୍ରକାଶ ପାଇଥିଲା।ଏହି କାର୍ଯ୍ୟକ୍ରମରେ ଭୋଳବେଡ଼ା ସରପଞ୍ଚ ସନ୍ଧ୍ୟାରାଣୀ ନାୟକ, ହାଟ କମିଟି ସଭାପତି ଭାଗବତ ପ୍ରସାଦ ନାୟକ, ସମ୍ପାଦକ ଭାଗିରଥି ନାୟକ, ଏକଜୁଟ୍ ସଂଗଠନର ନିରାଶ ମହାନ୍ତ ଓ ବିବେକ ବେହେରାଙ୍କ ସମେତ ହାଟ କମିଟିର ସଦସ୍ୟ ଏବଂ ସିଏଲଏଫ୍ ଓ ଜିପିଏଲଏଫ୍ର ମହିଳା ସଦସ୍ୟାମାନେ ଯୋଗଦେଇଥିଲେ।ସମସ୍ତଙ୍କ ମିଳିତ ସହଯୋଗରେ ହାଟର ସ୍ୱଚ୍ଛତା ବଜାୟ ରଖିବା ସହ ପୋଷଣ ଓ ସ୍ୱାସ୍ଥ୍ୟକର ଜୀବନଶୈଳୀ ସମ୍ପର୍କରେ ଜନସଚେତନତା ବୃଦ୍ଧି କରିବାର ବାର୍ତ୍ତା ଦିଆଯାଇଥିଲା।
