କେନ୍ଦୁଝର/ପାଟଣା, ୨୪/୧୦: କେନ୍ଦୁଝର ଜିଲ୍ଲା ଘଟଗାଁ ଥାନା ଅଞ୍ଚଳର ତଣ୍ଡୋ ନିକଟରେ ବାଇକ୍ ଦୁର୍ଘଟଣାରେ ଜଣେ ୪୦ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି। ମୃତକ ହେଉଛନ୍ତି ପାଟଣା ବ୍ଲକ ଅନ୍ତର୍ଗତ ଡୁମୁରିଆ ପଞ୍ଚାୟତର ଡୁମୁରିଆ ଗ୍ରାମ ହାତୀନୋଟା ସାହିର ତ୍ରିନାଥ ଦଳେଇଙ୍କ ପୁଅ ବିଜୟ ଓରଫ ବିଜୁ ଦଳେଇ।ସୂଚନା ଅନୁଯାୟୀ, ବିଜୟ ଗତକାଲି ରାତିରେ ନିଜ ସାଙ୍ଗମାନଙ୍କ ସହ ଭୀମକୁଣ୍ଡରେ ଭୋଜି କରିଥିଲେ। ଏହାପରେ ରାତି ପ୍ରାୟ ୧୧ଟା ପରେ ବାଇକ୍ ଯୋଗେ ନିଜ ଗ୍ରାମ ହାତୀନୋଟା ସାହିକୁ ଫେରୁଥିବା ବେଳେ ତଣ୍ଡୋ ନିକଟରେ ଭାରସାମ୍ୟ ହରାଇ ରାସ୍ତାକଡ଼କୁ ଛିଟିକି ପଡ଼ିଥିଲେ।ରାତି ହୋଇଥିବାରୁ ଦୁର୍ଘଟଣା ସମ୍ପର୍କରେ ତୁରନ୍ତ କାହାରି ନଜର ପଡ଼ିନଥିଲା। ଫଳରେ ଦୁର୍ଘଟଣାସ୍ଥଳରେ ହିଁ ବିଜୟଙ୍କ ମୃତ୍ୟୁ ଘଟିଥିଲା।ଖବର ପାଇ ଢେଙ୍କିକୋଟ ପୁଲିସ ବିଟ୍ର ଏଏସ୍ଆଇ କ୍ଷୀରୋଦିନୀ ନିଆଲ ଏବଂ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ସେମାନେ ମୃତଦେହ ଉଦ୍ଧାର କରି ଶବ ବ୍ୟବଚ୍ଛେଦ ପାଇଁ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ।ଏହି ଘଟଣାକୁ ନେଇ ଘଟଗାଁ ଥାନାରେ କେସ୍ ନମ୍ବର ୫୩୨/୨୦୨୬ରେ ଏକ ଦୁର୍ଘଟଣା ମାମଲା ରୁଜୁ ହୋଇଛି। ପୁଲିସ ଘଟଣାର ଅଧିକ ତଦନ୍ତ କରୁଥିବା ଜଣାପଡ଼ିଛି।
