କେନ୍ଦୁଝର/ପାଟଣା, ୨୫/୧୦: କେନ୍ଦୁଝର ଜିଲ୍ଲାର ପାଟଣା ଓ ଢେଙ୍କିକୋଟ ଅଞ୍ଚଳରେ ଗାଁ ଗାଁରେ ଆନନ୍ଦ ଓ ଉତ୍ସାହର ସହ କୁମାର ପୂର୍ଣ୍ଣିମା ପର୍ବ ପାଳିତ ହୋଇଛି। ଏହି ଅବସରରେ କୁମାରୀ କନ୍ୟା ଓ ନବବଧୂମାନେ ପାରମ୍ପରିକ ରୀତିନୀତି ଅନୁସାରେ ଚାନ୍ଦ ପୂଜା କରିବା ସହ ଚନ୍ଦ୍ରଙ୍କୁ ଅର୍ଘ୍ୟ ଅର୍ପଣ କରିଥିଲେ।ସନ୍ଧ୍ୟା ସମୟରେ କୁମାରୀ କନ୍ୟାମାନେ ନିଜ ନିଜ ଘର ଅଗଣାରେ ଥିବା ଚଉଁରା ମୂଳରେ ପୂଜାର୍ଚ୍ଚନା କରିଥିଲେ। କେତେକ ସ୍ଥାନରେ ମଣ୍ଡା ପିଠା ଓ ବିଭିନ୍ନ ମିଠା ସହ ପାରମ୍ପରିକ ଭୋଗ ପ୍ରସ୍ତୁତ କରାଯାଇଥିବା ବେଳେ ଅନ୍ୟ ସ୍ଥାନରେ ଖଇ, ନଡ଼ିଆ, କଦଳୀ, କାକୁଡ଼ି, କନ୍ଦମୂଳ, ସେଓ, ଅଙ୍ଗୁର ଓ ଖଜୁରୀ କୋଳି ଆଦି ଫଳମୂଳ ଭୋଗ ଲଗାଯାଇଥିଲା।ଏହି ପାରମ୍ପରିକ ପର୍ବକୁ ନେଇ କୁମାରୀ କନ୍ୟାମାନଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଥିଲା। କୁମାରୀ ଓ ନବବଧୂମାନେ ନୂତନ ବସ୍ତ୍ର ପରିଧାନ କରି ଚଉଁରା ମୂଳରେ ପୂଜା କରିବା ସହ କୁମାର ପୂର୍ଣ୍ଣିମା ବହି ଓ ଜହ୍ନି ଓଷା ବହି ପାଠ କରିଥିଲେ।ପାଟଣା ଓ ଢେଙ୍କିକୋଟ ସମେତ ଆଖପାଖ ଅଞ୍ଚଳରେ କୁମାର ପୂର୍ଣ୍ଣିମା ପର୍ବ ପାରମ୍ପରିକ ରୀତିନୀତି ଓ ଭକ୍ତିମୟ ପରିବେଶରେ ପାଳିତ ହୋଇଥିବା ବେଳେ ଗାଁ ଗାଁରେ ପର୍ବର ଆନନ୍ଦମୟ ପରିବେଶ ଦେଖିବାକୁ ମିଳିଥିଲା।
