ରାଉରକେଲା: କ୍ୟାନ୍ସର ବିରୋଧୀ ଔଷଧ ବିକାଶ ଦିଗରେ ଓଡ଼ିଶାରୁ ଆସିଛି ଏକ ନୂଆ ଗବେଷଣାର ଖବର। ଅଫିମ ଗଛର ମଞ୍ଜି ଏବଂ ଏଥିରେ ଥିବା କିଛି ଉପାଦାନକୁ ଆଧାର କରି କ୍ୟାନ୍ସର କୋଷକୁ ଲକ୍ଷ୍ୟ କରିବା ପାଇଁ ନୂଆ ଔଷଧ ବିକାଶ ଉପରେ ଗବେଷଣା ଚାଲିଛି। ଏହି ଗବେଷଣାରେ NIT ରାଉରକେଲା ଏବଂ IISER ବ୍ରହ୍ମପୁରର ଗବେଷକମାନେ ମିଳିତ ଭାବେ କାମ କରୁଛନ୍ତି।ଅଫିମ ଗଛକୁ ସାଧାରଣତଃ ନିଶାଦ୍ରବ୍ୟ ସହ ଯୋଡ଼ି ଦେଖାଯାଏ। ତେବେ ଏହି ଗଛର ମଞ୍ଜି ଓ ଏଥିରେ ଥିବା ନିର୍ଦ୍ଦିଷ୍ଟ ଜୈବିକ ଉପାଦାନକୁ ନେଇ କ୍ୟାନ୍ସର ବିରୋଧୀ ଗବେଷଣା ଏବେ ନୂଆ ଦିଗ ଦେଖାଇଛି।ଗବେଷଣାର ମୁଖ୍ୟ ଲକ୍ଷ୍ୟ ହେଉଛି କ୍ୟାନ୍ସର କୋଷକୁ ଲକ୍ଷ୍ୟ କରି ସେଗୁଡ଼ିକୁ ନଷ୍ଟ କରିବା ସହିତ ସୁସ୍ଥ କୋଷଗୁଡ଼ିକୁ ଯଥାସମ୍ଭବ ସୁରକ୍ଷିତ ରଖିବା। ଏହି ଦିଗରେ NIT ରାଉରକେଲାର ଲାଇଫ୍ ସାଇନ୍ସ ଓ କେମିଷ୍ଟ୍ରୀ ବିଭାଗ ଏବଂ IISER ବ୍ରହ୍ମପୁରର ଗବେଷକମାନେ ମିଳିତ ଭାବେ କାମ କରୁଛନ୍ତି।ଗତ କିଛି ମାସ ଧରି ଏନେଇ ଗବେଷଣା ଚାଲିଥିବାବେଳେ ନୂଆ ଉଦ୍ଭାବନ ପାଇଁ ପେଟେଣ୍ଟ ସ୍ୱୀକୃତି ମିଳିଥିବା ଜଣାପଡ଼ିଛି। ତେବେ ଏହାକୁ ସିଧାସଳଖ କ୍ୟାନ୍ସର ଚିକିତ୍ସାର ଔଷଧ ବୋଲି କହିବା ପୂର୍ବରୁ ଆହୁରି ଅନେକ ପରୀକ୍ଷଣ ଆବଶ୍ୟକ।ଆଗାମୀ ପର୍ଯ୍ୟାୟରେ ପ୍ରଥମେ ପଶୁ ମଡେଲ୍ରେ ଏହି ଔଷଧର ସୁରକ୍ଷା ଓ କାର୍ଯ୍ୟକାରିତା ପରୀକ୍ଷା କରାଯିବ। ଏହି ପରୀକ୍ଷଣର ଫଳାଫଳ ଅନୁକୂଳ ହେଲେ ପରବର୍ତ୍ତୀ ସମୟରେ ମାନବ ଚିକିତ୍ସା ସମ୍ପର୍କିତ ଗବେଷଣା ଦିଗରେ ଆଗକୁ ବଢ଼ିପାରେ।ଏହି ଗବେଷଣା ସଫଳ ହେଲେ କ୍ୟାନ୍ସର ବିରୋଧୀ ଔଷଧ ବିକାଶ କ୍ଷେତ୍ରରେ ଏହା ଏକ ନୂଆ ସମ୍ଭାବନା ସୃଷ୍ଟି କରିପାରେ।
