କେନ୍ଦୁଝର/ପାଟଣା, ୧/୧୧: କେନ୍ଦୁଝର ଜିଲ୍ଲା ପାଟଣା ବ୍ଲକ ଏରେଣ୍ଡେଇ ପଞ୍ଚାୟତ ଅନ୍ତର୍ଗତ ତାଟିହୁଡ଼ି ନିକଟରେ ଏକ ମର୍ମନ୍ତୁଦ ଟ୍ରାକ୍ଟର ଦୁର୍ଘଟଣାରେ ଚାଳକଙ୍କ ମୃତ୍ୟୁ ଘଟିଛି। ଚଳନ୍ତା ଟ୍ରାକ୍ଟରରୁ ଭାରସାମ୍ୟ ହରାଇ ତଳକୁ ଖସିପଡ଼ିବା ପରେ ଚକ ତଳେ ଚାପି ହୋଇ ଚାଳକଙ୍କ ଜୀବନ ଯାଇଛି।ମୃତକ ହେଲେ ଏରେଣ୍ଡେଇ ତାଟିହୁଡ଼ି ସାହିର ତ୍ରିଲୋଚନ ମହାନ୍ତଙ୍କ ପୁଅ ରଞ୍ଜନ ମହାନ୍ତ (୩୬)। ସୂଚନା ଅନୁଯାୟୀ, ରଞ୍ଜନ ଧାନ ବୋହିବା କାମ ଶେଷ କରି ଟ୍ରାକ୍ଟର ନେଇ ଘରକୁ ଫେରୁଥିବା ସମୟରେ ବିଳମ୍ବିତ ରାତିରେ ତାଟିହୁଡ଼ି ନିକଟରେ ଏହି ଦୁର୍ଘଟଣା ଘଟିଥିଲା। ଚଳନ୍ତା ଟ୍ରାକ୍ଟରରୁ ସେ ଭାରସାମ୍ୟ ହରାଇ ତଳକୁ ଖସିପଡ଼ିବାରୁ ଟ୍ରାକ୍ଟରର ବଡ଼ ଚକ ତଳେ ଚାପି ହୋଇଯାଇଥିଲେ। ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା।ଖବର ପାଇ ପାଟଣା ପୁଲିସର ଏଏସ୍ଆଇ ଧନେଶ୍ୱର ପାତ୍ର ଘଟଣାସ୍ଥଳରେ ପହଞ୍ଚି ଟ୍ରାକ୍ଟରକୁ ଜବତ କରିବା ସହ ମୃତଦେହ ଉଦ୍ଧାର କରିଥିଲେ। ପରେ ମୃତଦେହକୁ ବ୍ୟବଚ୍ଛେଦ ପାଇଁ ପାଟଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ଅଣାଯାଇଥିଲା।ଏହି ଘଟଣାକୁ ନେଇ ପାଟଣା ଥାନାରେ କେସ୍ ନଂ ୩୪୧/୨୦୨୬ରେ ଏକ ଦୁର୍ଘଟଣା ମାମଲା ରୁଜୁ ହୋଇଛି। ପୁଲିସ ଘଟଣାର ତଦନ୍ତ କରୁଥିବା ବେଳେ ବ୍ୟବଚ୍ଛେଦ ପରେ ମୃତଦେହକୁ ପରିବାରବର୍ଗଙ୍କ ହସ୍ତାନ୍ତର କରାଯାଇଛି।
