ବଡ଼ବିଲ, ୧୪/୯: ଗଣେଶ ପୂଜା ଦିନ ଗଜରାଜଙ୍କ ଘରେ ଆସିଛି ନୂଆ ଅତିଥି। କେନ୍ଦୁଝର ଜିଲ୍ଲାର ଚମ୍ପୁଆ ରେଞ୍ଜ ବାଲିବନ୍ଧ ସେକ୍ସନ ଜଙ୍ଗଲରେ ଏକ ହାତୀ ଶାବକ ଜନ୍ମ ନେଇଛି। ନବଜାତ ଶାବକର ଆଗମନ ପରେ ଅଞ୍ଚଳରେ ଚଳପ୍ରଚଳ କରୁଥିବା ହାତୀପଲର ସଂଖ୍ୟା ୨୧ରୁ ବଢ଼ି ୨୨ରେ ପହଞ୍ଚିଛି। ଏନେଇ କେନ୍ଦୁଝର ଡିଏଫ୍ଓ ଧନରାଜ ଏଚ୍.ଡି. ସୂଚନା ଦେଇଛନ୍ତି।ବନ ବିଭାଗର ସୂଚନା ଅନୁଯାୟୀ, ଗତ ବିଳମ୍ବିତ ରାତିରେ ହାତୀପଲ ମଧ୍ୟରେ ଏହି ଶାବକର ଜନ୍ମ ହୋଇଥିଲା। ବର୍ତ୍ତମାନ ନବଜାତ ଶାବକଟି ସମ୍ପୂର୍ଣ୍ଣ ସୁସ୍ଥ ଓ ସକ୍ରିୟ ରହିଛି। ମା’ ହାତୀଠାରୁ କ୍ଷୀରପାନ କରି ଶାବକଟି ହାତୀପଲ ସହ ସୁରକ୍ଷିତ ଭାବେ ଚଳପ୍ରଚଳ କରୁଥିବା ଜଣାପଡ଼ିଛି।ଗଣେଶ ପୂଜା ଅବସରରେ ହାତୀପଲରେ ନୂଆ ସଦସ୍ୟଙ୍କ ଆଗମନକୁ ନେଇ ସ୍ଥାନୀୟ ପ୍ରକୃତିପ୍ରେମୀଙ୍କ ମଧ୍ୟରେ ଉତ୍ସାହ ପ୍ରକାଶ ପାଇଛି। ହାତୀ ଶାବକର ଜନ୍ମକୁ ସ୍ଥାନୀୟ ଜୈବ ବିବିଧତା ଓ ହାତୀ ସଂରକ୍ଷଣ ପାଇଁ ଏକ ଶୁଭ ସଙ୍କେତ ବୋଲି କୁହାଯାଉଛି।
ଅନ୍ୟପକ୍ଷରେ, ମା’ ହାତୀ ଓ ନବଜାତ ଶାବକର ସୁରକ୍ଷା ଏବଂ ସ୍ୱାସ୍ଥ୍ୟାବସ୍ଥା ଉପରେ ବନ ବିଭାଗ କଡ଼ା ନଜର ରଖିଛି। ହାତୀପଲର ଗତିବିଧି ନିରୀକ୍ଷଣ କରିବା ସହ ଶାବକ ଓ ମା’ ହାତୀଙ୍କ ସୁରକ୍ଷା ପାଇଁ ବନ କର୍ମଚାରୀଙ୍କ ଏକ ସ୍ୱତନ୍ତ୍ର ଟିମ୍ ମୁତୟନ ରହିଛି।
