କେନ୍ଦୁଝର/ଘଟଗାଁ, ୨୬/୯: ବିଶ୍ୱ ଭ୍ରାତୃତ୍ୱ ଦିବ୍ୟାତ୍ମା ପରିଷଦ, କ୍ଷିତିଜ୍ୟୋତିଃ ଆଶ୍ରମ ଘଟଗାଁ ଶାଖା ଆନୁକୂଲ୍ୟରେ ସମାଜ ସଂସ୍କାରକ ଓ ଆଧ୍ୟାତ୍ମିକ ପଥ ପ୍ରଦର୍ଶକ ଠାକୁର କେଶବ ଚନ୍ଦ୍ରଙ୍କ ୭୨ତମ ଜନ୍ମୋତ୍ସବ ଅବସରରେ ଚାଲିଥିବା ସପ୍ତାହବ୍ୟାପୀ ଭାଗବତ ପରାୟଣ ମହାଆଡମ୍ବରରେ ଉଦଯାପିତ ହୋଇଯାଇଛି।ବାବାଜୀ ଚରମାନନ୍ଦ ଦାସ ପ୍ରତାପଙ୍କ ତତ୍ତ୍ୱାବଧାନରେ ଆୟୋଜିତ ଏହି ଆଧ୍ୟାତ୍ମିକ କାର୍ଯ୍ୟକ୍ରମରେ ପ୍ରତ୍ୟେକ ଦିନ ପ୍ରଭାତରୁ ବିଷ୍ଣୁ ସହସ୍ରନାମ, ମଙ୍ଗଳ ଆଳତି, ଗୁରୁ ବନ୍ଦନା, ପ୍ରାର୍ଥନା, ଧ୍ୟାନ, ଚରମ ଶାସ୍ତ୍ର ପାଠ, ମହାମନ୍ତ୍ର ନାମ ସଂକୀର୍ତ୍ତନ ଓ ଭଜନ ସମାରୋହ ଅନୁଷ୍ଠିତ ହୋଇଥିଲା।
ଏଥିସହିତ ଧେନୁ ପୂଜା, ବିଭିନ୍ନ ଦେବଦେବୀଙ୍କ ପୂଜା, ସାଧୁ-ବୈଷ୍ଣବ ସେବା, ଶ୍ରୀପାଦୁକା ମହାସ୍ନାନ, ଷୋଡ଼ଶ ଉପଚାର ପୂଜା, ହୋମଯଜ୍ଞ, ଅନ୍ନଦାନ ଓ ବସ୍ତ୍ରଦାନ କାର୍ଯ୍ୟକ୍ରମ ମଧ୍ୟ ଆୟୋଜିତ ହୋଇଥିଲା। ଦିବସବ୍ୟାପୀ ଅଖଣ୍ଡ ଭାଗବତ ପାଠରେ ଭକ୍ତମାନେ ଯୋଗଦେଇଥିଲେ।
ସାଧୁସନ୍ଥଙ୍କ ଆଧ୍ୟାତ୍ମିକ ପ୍ରବଚନ
ଏକ ସପ୍ତାହ ଧରି ଚାଲିଥିବା ଏହି ଭାଗବତ କାର୍ଯ୍ୟକ୍ରମରେ ରାଜ୍ୟର ବିଭିନ୍ନ ପ୍ରାନ୍ତରୁ ବହୁ ସାଧୁସନ୍ଥ ଯୋଗଦେଇଥିଲେ। ସେମାନେ ଆଗନ୍ତୁକ ଭକ୍ତମାନଙ୍କୁ ଆଧ୍ୟାତ୍ମିକ ଭାବଧାରା ଓ ଧାର୍ମିକ ଚେତନା ସମ୍ପର୍କରେ ଉଦ୍ବୁଦ୍ଧ କରିଥିଲେ।
ଆଶ୍ରମ ପରିସରରେ ଏକ ସର୍ବଧର୍ମ ସମ୍ମିଳନୀ ମଧ୍ୟ ଅନୁଷ୍ଠିତ ହୋଇଥିଲା। ପ୍ରତ୍ୟହ ଶତାଧିକ ଭକ୍ତଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଥିଲା।
ଆୟୋଜନରେ ସହଯୋଗ
ବାବା ଉମାକାନ୍ତ ଦାସ ଓ ଶତ୍ରୁଘ୍ନ ଦାସଙ୍କ ନେତୃତ୍ୱରେ ଆଶ୍ରମ ପରିଚାଳକ ଅର୍ଜୁନ ଚରଣ ମହାନ୍ତ, ବରିଷ୍ଠ ସଦସ୍ୟ ନରେନ୍ଦ୍ର କୁମାର ସାହୁ, ବିଶ୍ୱନାଥ ପଣ୍ଡା, ରବୀନ୍ଦ୍ର ପାଢ଼ୀ, ରୁଦ୍ର ନାରାୟଣ ଶର୍ମା, ଗୁରୁଚରଣ ମହାନ୍ତ, ରାଜକିଶୋର ବେହେରା, ସହଦେବ ମହାନ୍ତ, ଭଗବାନ ବେହେରା, ଅନିରୁଦ୍ଧ ଘଡେଇ, ବୁଦ୍ଧଦେବ ଘଡେଇ, ବୁଦ୍ଧଦେବ ମହାନ୍ତ, ଶକୁନ୍ତଳା ମହାନ୍ତ, ମିନା ମହାନ୍ତ, ସନ୍ଧ୍ୟା ମହାନ୍ତ ଓ ସତ୍ୟଭାମା ମହାନ୍ତ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
