କେନ୍ଦୁଝର/ପାଟଣା, ୨୮/୯ (ନିପ୍ର): କେନ୍ଦୁଝର ଜିଲ୍ଲା ପାଟଣା ବ୍ଲକ ଟାଙ୍ଗରପଡା ପଞ୍ଚାୟତ ଅନ୍ତର୍ଗତ ଅଙ୍କୁରା ଗ୍ରାମରେ ଲଗାଣ ବର୍ଷା ଯୋଗୁଁ ଜୟନ୍ତ କୁମାର ପାତ୍ରଙ୍କ ଘର ଭାଙ୍ଗିଯାଇଛି। ଦୀର୍ଘ ସମୟ ଧରି ଜାରି ରହିଥିବା ବର୍ଷାରେ ଘରର କାନ୍ଥ ସମେତ ଅନ୍ୟାନ୍ୟ ଅଂଶ କ୍ଷତିଗ୍ରସ୍ତ ହୋଇଥିବା ଜଣାପଡ଼ିଛି।ଘର ଭାଙ୍ଗିଯିବା ପରେ ଜୟନ୍ତ କୁମାର ପାତ୍ରଙ୍କ ପରିବାର ଅସୁବିଧାରେ ପଡ଼ିଛନ୍ତି। ବର୍ଷା ଋତୁରେ ଘରର ଏଭଳି କ୍ଷତି ହୋଇଥିବାରୁ ପରିବାରର ସୁରକ୍ଷାକୁ ନେଇ ଚିନ୍ତା ବଢ଼ିଛି। ଘର ଭାଙ୍ଗିଯିବା ଯୋଗୁଁ ପରିବାରକୁ ରହିବା ନେଇ ମଧ୍ୟ ସମସ୍ୟା ଦେଖାଦେଇଛି।ଏହି ଘଟଣା ପରେ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହିତ ସରକାରୀ ନିୟମ ଅନୁଯାୟୀ ଯଥାଶୀଘ୍ର ସହାୟତା ଯୋଗାଇ ଦେବାକୁ ପରିବାର ପକ୍ଷରୁ ଦାବି କରାଯାଇଛି। ଲଗାଣ ବର୍ଷାରେ ଘର ଭାଙ୍ଗିଥିବା ପରିବାରକୁ ପ୍ରଶାସନ ପକ୍ଷରୁ ଆବଶ୍ୟକ ସହାୟତା ମିଳିବ ବୋଲି ପରିବାର ଆଶା ପ୍ରକାଶ କରିଛନ୍ତି।
