କେନ୍ଦୁଝର/ପାଟଣା, ୨୮/୯: ଚଳିତ ୨୦୨୬-୨୭ ଶିକ୍ଷାବର୍ଷର ଜିଲ୍ଲାସ୍ତରୀୟ କ୍ରୀଡ଼ା ପ୍ରତିଯୋଗିତାରେ ସାହାରପଡ଼ା ବ୍ଲକ୍ର ଏମ୍.ଜି.ଏମ୍. ହାଇସ୍କୁଲ, ଖଜୁରୀଡିହାର ଦଶମ ଶ୍ରେଣୀ ଛାତ୍ରୀ ପଙ୍କଜିନି ମହାନ୍ତ ଚମତ୍କାର କୃତିତ୍ୱ ହାସଲ କରିଛନ୍ତି। ୧୫୦୦ ମିଟର ଓ ୩୦୦୦ ମିଟର ଦୌଡ଼ରେ ପ୍ରଥମ ସ୍ଥାନ ଅଧିକାର କରି ସେ ରାଜ୍ୟସ୍ତରୀୟ କ୍ରୀଡ଼ା ପ୍ରତିଯୋଗିତା ପାଇଁ ଯୋଗ୍ୟତା ହାସଲ କରିଛନ୍ତି।ଜିଲ୍ଲାସ୍ତରୀୟ କ୍ରୀଡ଼ା ପ୍ରତିଯୋଗିତାର ଉଦ୍ଘାଟନୀ କାର୍ଯ୍ୟକ୍ରମରେ ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ବରିହା, ଜିଲ୍ଲା କ୍ରୀଡ଼ା ଅଧିକାରୀ ସରୋଜ କୁମାର ମଲ୍ଲିକ, ଜିଲ୍ଲା ଶାରୀରିକ ଶିକ୍ଷା ଅଧିକାରୀ ରାମକୃଷ୍ଣ ବେହେରା ଏବଂ ଯେଆରସିଓ ପ୍ରଶାନ୍ତ କୁମାର ପରିଡ଼ା ଯୋଗଦେଇଥିଲେ।
ପଙ୍କଜିନି ମହାନ୍ତଙ୍କ ଏହି ସଫଳତାରେ ତାଙ୍କ ପରିବାର, ବିଦ୍ୟାଳୟ ଓ ସାହାରପଡ଼ା ବ୍ଲକ୍ରେ ଖୁସିର ମାହୋଲ ସୃଷ୍ଟି ହୋଇଛି। ପଙ୍କଜିନିଙ୍କ ପିତା ତ୍ରିଲୋଚନ ମହାନ୍ତ ଓ ମାତା ସୁରଥି ମହାନ୍ତ।ତାଙ୍କ କ୍ରୀଡ଼ା ସଫଳତା ପଛରେ ଏମ୍.ଜି.ଏମ୍. ହାଇସ୍କୁଲ, ଖଜୁରୀଡିହାର କ୍ରୀଡ଼ା ଶିକ୍ଷକ ରାଧାକାନ୍ତ ସେଠୀଙ୍କ ମାର୍ଗଦର୍ଶନ ରହିଛି। ଏଥିସହ ବୈତରଣୀ ଉଚ୍ଚ ବିଦ୍ୟାଳୟ, ଡାଳପକାର କ୍ରୀଡ଼ା ଶିକ୍ଷକ ନକୁଳଚନ୍ଦ୍ର ମହାନ୍ତ ମଧ୍ୟ ପଙ୍କଜିନିଙ୍କୁ ସହଯୋଗ କରିଥିଲେ।ପଙ୍କଜିନିଙ୍କ ଏହି କୃତିତ୍ୱ ପାଇଁ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ସନ୍ଧ୍ୟାରାଣୀ ସେଠୀଙ୍କ ସମେତ ସମସ୍ତ ଶିକ୍ଷକ-ଶିକ୍ଷୟିତ୍ରୀ, ବ୍ଲକସ୍ତରୀୟ ଶିକ୍ଷା ଅଧିକାରୀ ଏବଂ ସାହାରପଡ଼ା ବ୍ଲକ୍ର ସମସ୍ତ ଶିକ୍ଷକ-ଶିକ୍ଷିକା ତାଙ୍କୁ ଶୁଭେଚ୍ଛା ଜଣାଇଛନ୍ତି।ଏବେ ରାଜ୍ୟସ୍ତରୀୟ କ୍ରୀଡ଼ା ପ୍ରତିଯୋଗିତାରେ ପଙ୍କଜିନି ମହାନ୍ତ ଉତ୍କୃଷ୍ଟ ପ୍ରଦର୍ଶନ କରି ସାହାରପଡ଼ା ବ୍ଲକ୍ ଓ ନିଜ ବିଦ୍ୟାଳୟର ଗୌରବ ବଢ଼ାଇବେ ବୋଲି ଶୁଭେଚ୍ଛୁମାନେ ଆଶା ପ୍ରକାଶ କରିଛନ୍ତି।
