ଯାଜପୁର:୨୫/୯, ଜମି କିଣିବା ପାଇଁ ଆବଶ୍ୟକ ଅନୁମତିପତ୍ର କରାଇଦେବାକୁ ଲାଞ୍ଚ ନେବାବେଳେ ଭିଜିଲାନ୍ସ ହାତରେ ଧରାପଡ଼ିଲେ ଯାଜପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟର କନିଷ୍ଠ ରାଜସ୍ୱ ସହାୟକ (JRA) ପ୍ରସନ୍ନ କୁମାର ସାହାଣୀ। ୪୦ ହଜାର ଟଙ୍କା ଲାଞ୍ଚ ନେବା ସମୟରେ ତାଙ୍କୁ ଭିଜିଲାନ୍ସ ଧରିଥିବା ସୂଚନା ମିଳିଛି।ଭିଜିଲାନ୍ସର ସୂଚନା ଅନୁସାରେ, ଜଣେ ଅନୁସୂଚିତ ଜାତିର ବ୍ୟକ୍ତିଙ୍କଠାରୁ ୧୬ ଡିସିମିଲ୍ ଜମି କିଣିବା ପାଇଁ ଆବେଦନକାରୀ ତାଙ୍କ ମାଆଙ୍କ ନାମରେ ଆବଶ୍ୟକ ଅନୁମତି ପାଇଁ ୨୦୨୫ ନଭେମ୍ବର ୨୯ରେ ଯାଜପୁର ଉପଜିଲ୍ଲାପାଳଙ୍କ ନିକଟରେ ଆବେଦନ କରିଥିଲେ।
ଅଭିଯୋଗ ଅନୁସାରେ, ଅନୁମତିପତ୍ର ପ୍ରକ୍ରିୟା ଆଗକୁ ବଢ଼ାଇବା ପାଇଁ JRA ପ୍ରସନ୍ନ କୁମାର ସାହାଣୀ ୪୮ ହଜାର ଟଙ୍କା ଲାଞ୍ଚ ଦାବି କରିଥିଲେ। ଆବେଦନକାରୀ ଏତେ ଟଙ୍କା ଦେଇପାରିବେ ନାହିଁ କହିବା ପରେ ଲାଞ୍ଚ ଟଙ୍କା ୪୦ ହଜାରକୁ କମାଇଥିବା ଅଭିଯୋଗ ହୋଇଛି।ଡିସିମିଲ୍ ପିଛା ୩ ହଜାର ଟଙ୍କା ଲାଞ୍ଚ ଦାବି ଅଭିଯୋଗ ୧୬ ଡିସିମିଲ୍ ଜମି ପାଇଁ ୪୮ ହଜାର ଟଙ୍କା ଦାବି କରାଯାଇଥିବାରୁ ଡିସିମିଲ୍ ପିଛା ୩ ହଜାର ଟଙ୍କା ଲାଞ୍ଚ ଦାବି ହୋଇଥିବା ଅଭିଯୋଗ ରହିଛି। ପରେ ଏହି ଟଙ୍କା ୪୦ ହଜାରକୁ କମାଯାଇଥିବା ଅଭିଯୋଗକାରୀ ଭିଜିଲାନ୍ସକୁ ଜଣାଇଥିଲେ।ଏହାପରେ ଆବେଦନକାରୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ପୂର୍ବ ଯୋଜନା ଅନୁସାରେ ୪୦ ହଜାର ଟଙ୍କା ଲାଞ୍ଚ ନେଉଥିବା ସମୟରେ JRA ପ୍ରସନ୍ନ କୁମାର ସାହାଣୀଙ୍କୁ ଭିଜିଲାନ୍ସ ଧରିଥିବା ସୂଚନା ମିଳିଛି।JRA ଧରାପଡ଼ିବା ପରେ ତାଙ୍କ ସହ ସମ୍ପର୍କିତ ଆୟ ବହିର୍ଭୂତ ସମ୍ପତ୍ତି ନେଇ ମଧ୍ୟ ଭିଜିଲାନ୍ସ ଯାଞ୍ଚ ଆରମ୍ଭ କରିଛି। ପ୍ରସନ୍ନ କୁମାର ସାହାଣୀଙ୍କ ଦୁଇଟି ସ୍ଥାନରେ ଏକକାଳୀନ ଚଢ଼ାଉ କରାଯାଇଥିବା ଜଣାପଡ଼ିଛି।
ଏନେଇ କଟକ ଭିଜିଲାନ୍ସ ପକ୍ଷରୁ କେସ୍ ନମ୍ବର ୩୭/୨୦୨୬ରେ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି।
