କେନ୍ଦୁଝର/ପାଟଣା, ୧୮/୧୦: କେନ୍ଦୁଝର ଜିଲ୍ଲା ପାଟଣା ବ୍ଲକ ମୁଖ୍ୟାଳୟସ୍ଥିତ ପାଟଣା ବଜାରରେ ଦୁର୍ଗାପୂଜା କମିଟି ପକ୍ଷରୁ ଶାରଦୀୟ ଦୁର୍ଗାପୂଜା ଧୁମ୍ଧାମରେ ଆରମ୍ଭ ହୋଇଛି। ମା’ ଦୁର୍ଗାଙ୍କ ସୁନ୍ଦର ମୃଣ୍ମୟୀ ପ୍ରତିମା, ଆକର୍ଷଣୀୟ ମେଢ଼, ସୁସଜ୍ଜିତ ତୋରଣ ଓ ଆଲୋକମାଳାରେ ପୂଜା ମଣ୍ଡପ ଝଲସି ଉଠୁଛି। ଶନିବାର ମହାସପ୍ତମୀ ପୂଜା ଅବସରରେ ମଣ୍ଡପରେ ଭକ୍ତିମୟ ପରିବେଶ ସୃଷ୍ଟି ହୋଇଥିଲା।ପୂଜାରେ କର୍ତ୍ତା ଭାବେ ପ୍ରଦୀପ କୁମାର ଦାଶ ଦାୟିତ୍ୱ ତୁଲାଇଥିବା ବେଳେ ମୁଖ୍ୟ ପୂଜକ ପଣ୍ଡିତ ପଞ୍ଚାନନ ପଣ୍ଡାଙ୍କ ସହ ପଣ୍ଡିତ ବୃନ୍ଦାବନ ଷଡ଼ଙ୍ଗୀ, ପଣ୍ଡିତ ଶୁକଦେବ ମିଶ୍ର, ପଣ୍ଡିତ ନନ୍ଦକିଶୋର ଦାଶ ଓ ରବିନାରାୟଣ ଦାଶ ପୂଜାର୍ଚ୍ଚନା ଏବଂ ଚଣ୍ଡୀପାଠ ପରିଚାଳନା କରିଥିଲେ।
ପ୍ଲାଷ୍ଟିକ ମୁକ୍ତ ହେବ ପୂଜା ମଣ୍ଡପ
ଚଳିତ ବର୍ଷ ପାଟଣା ଦୁର୍ଗାପୂଜାର ଏକ ଉଲ୍ଲେଖନୀୟ ପଦକ୍ଷେପ ହେଉଛି ପୂଜା ମଣ୍ଡପକୁ ପ୍ଲାଷ୍ଟିକ ଓ ପଲିଥିନ୍ମୁକ୍ତ ଅଞ୍ଚଳ ଭାବେ ଘୋଷଣା କରାଯିବା। ଦୁର୍ଗାପୂଜା କମିଟି ଓ ବଡ଼ପାଟଣା ପଞ୍ଚାୟତ ପକ୍ଷରୁ ଶ୍ରଦ୍ଧାଳୁଙ୍କୁ ପ୍ଲାଷ୍ଟିକରେ ପୂଜା ସାମଗ୍ରୀ ନ ଆଣିବାକୁ ନିବେଦନ କରାଯାଇଛି। ଏହି ପଦକ୍ଷେପ ମାଧ୍ୟମରେ ପରିବେଶ ସୁରକ୍ଷା ସହିତ ସ୍ୱଚ୍ଛତା ବଜାୟ ରଖିବାକୁ ଗୁରୁତ୍ୱ ଦିଆଯାଇଛି।ପୂଜା ମଣ୍ଡପରେ ବଡ଼ପାଟଣା ସରପଞ୍ଚ ବିନତି ବାନରା ଉପସ୍ଥିତ ରହି ମା’ଙ୍କ ପୂଜାର୍ଚ୍ଚନା କରିଥିଲେ। ଦୁର୍ଗାପୂଜା କମିଟିର ସଭାପତି ମାଧବାନନ୍ଦ ପୃଷ୍ଟି ଓ ସମ୍ପାଦକ ଯୁଗଳ କିଶୋର ଦାଶଙ୍କ ସମେତ କମଳାକାନ୍ତ ପତି, ରଣଜିତ ଚକ୍ର, ସହଦେବ ବେହେରା, ଶିବନାରାୟଣ ମିଶ୍ର, ବିବେକାନନ୍ଦ ଦାଶ, ନୁନ୍ଦୁ ଭଞ୍ଜ, ରମାକାନ୍ତ ଶତପଥୀ, ପ୍ରଦୀପ ମିଶ୍ର, ସନ୍ତୋଷ କର, ସୁଦାମ ଦାଶ, ବିଭୁପ୍ରସାଦ ବେହେରା, ଅଜୟ ବେହେରା, ସୁବୁଦ୍ଧି ବାରିକ ଓ ଭକ୍ତବନ୍ଧୁ ନାଏକ ପ୍ରମୁଖ ପୂଜା କାର୍ଯ୍ୟ ପରିଚାଳନାରେ ସହଯୋଗ କରୁଛନ୍ତି।ସୋମବାର ମହାଷ୍ଟମୀ ପୂଜା ଅବସରରେ ବ୍ରତଧାରୀ ଓ ଶ୍ରଦ୍ଧାଳୁଙ୍କ ଅଧିକ ଭିଡ଼ ହେବାର ସମ୍ଭାବନା ଥିବାରୁ ଦୁର୍ଗାପୂଜା କମିଟି ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି।
