କେନ୍ଦୁଝର/ପାଟଣା, ୮/୧୦: କେନ୍ଦୁଝର ଜିଲ୍ଲା ପାଟଣା ସରକାରୀ ବସଷ୍ଟାଣ୍ଡ ନିକଟରେ ବିଦେଶୀ ମଦ ଦୋକାନ ଖୋଲାଯିବାକୁ ନେଇ ତୀବ୍ର ବିରୋଧ କରିଛି ପାଟଣା ବିକାଶ ମଞ୍ଚ। ଉକ୍ତ ମଦ ଦୋକାନକୁ ସେଠାରୁ ବନ୍ଦ କରିବା ଦାବିରେ ଅତିରିକ୍ତ ଜିଲ୍ଲାପାଳଙ୍କ ଉଦ୍ଦେଶ୍ୟରେ ବଡ଼ପାଟଣା ସରପଞ୍ଚ ବିନତି ବାନରାଙ୍କ ଜରିଆରେ ଏକ ଦାବିପତ୍ର ପ୍ରଦାନ କରାଯାଇଛି।ମଞ୍ଚ ପକ୍ଷରୁ କୁହାଯାଇଛି ଯେ, ପାଟଣା ସରକାରୀ ବସଷ୍ଟାଣ୍ଡ ନିକଟରେ ଷ୍ଟେଟ୍ ବ୍ୟାଙ୍କ ଓ ସମବାୟ ବ୍ୟାଙ୍କ ଭଳି ଅନୁଷ୍ଠାନ ରହିଛି। ଏହି ରାସ୍ତା ଦେଇ ପ୍ରତିଦିନ ବହୁ ଛାତ୍ରଛାତ୍ରୀଙ୍କ ସମେତ ହଜାର ହଜାର ଲୋକ ଯାତାୟାତ କରୁଛନ୍ତି। ଏଭଳି ଜନଗହଳିପୂର୍ଣ୍ଣ ବଜାର ଅଞ୍ଚଳରେ ମଦ ଦୋକାନ ଖୋଲାଯିବା ଦ୍ୱାରା ବିଶୃଙ୍ଖଳା ଓ ଅପରାଧିକ କାର୍ଯ୍ୟକଳାପ ବୃଦ୍ଧି ପାଇବାର ଆଶଙ୍କା ରହିଛି ବୋଲି ମଞ୍ଚ ଉଦ୍ବେଗ ପ୍ରକାଶ କରିଛି।ଏହି ଦୃଷ୍ଟିରୁ ଜନସାଧାରଣଙ୍କ ସୁରକ୍ଷା ଓ ଅଞ୍ଚଳରେ ଶାନ୍ତିଶୃଙ୍ଖଳା ବଜାୟ ରଖିବା ପାଇଁ ମଦ ଦୋକାନକୁ ତୁରନ୍ତ ବନ୍ଦ କରିବାକୁ ଦାବି କରାଯାଇଛି। ଦାବି ପୂରଣ ନହେଲେ ପାଟଣାବାସୀ ଧାରଣା ଦେବା ସହ ଆନ୍ଦୋଳନକୁ ଓହ୍ଲାଇବେ ବୋଲି ମଞ୍ଚ ପକ୍ଷରୁ ଚେତାବନୀ ଦିଆଯାଇଛି।ଏହି ଦାବିପତ୍ର ପ୍ରଦାନ ସମୟରେ ପୂର୍ବତନ ବ୍ଲକ ଅଧ୍ୟକ୍ଷ ତଥା ସମାଜସେବୀ ଇଂ. ବିଦ୍ୟାଧର ଦାଶ, ବିଜୟ ରତ୍ନ ପତି, ଲକ୍ଷ୍ମୀଧର ପତି, ରବୀନ୍ଦ୍ର କୁମାର ଲୋହାର, ଅଜୟ ପରିଡ଼ା, ପ୍ରକାଶ କୁମାର ସେଠୀ, ଦୀପକ କୁମାର ରାମଙ୍କ ସମେତ ବହୁ ବୁଦ୍ଧିଜୀବୀ ଉପସ୍ଥିତ ଥିଲେ।
