କେନ୍ଦୁଝର/ପାଟଣା, ୮/୧୦: କେନ୍ଦୁଝର ଜିଲ୍ଲା ପାଟଣା ବନାଞ୍ଚଳ ଅନ୍ତର୍ଗତ ବଣମହୁଲଡିହା ଗ୍ରାମରେ ବନ ବିଭାଗ ଚଢ଼ାଉ କରି ୭୦୮ ଗ୍ରାମ ବାରହା ମାଂସ ସହ ୯ଟି ଜୀବନ୍ତ ବୋମା ଜବତ କରିଛି। ବୁଧବାର ସନ୍ଧ୍ୟାରେ ହୋଇଥିବା ଏହି ଚଢ଼ାଉ ସମୟରେ ଦୁଇ ଜଣ ସନ୍ଦିଗ୍ଧ ଶିକାରୀ ଫେରାର ହୋଇଯାଇଥିବା ଜଣାପଡ଼ିଛି।ସୂଚନା ଅନୁଯାୟୀ, ବାରହା ଶିକାର ହୋଇଥିବା ନେଇ ଖବର ପାଇବା ପରେ ପାଟଣା ବନ ବିଭାଗ ପକ୍ଷରୁ ବଣମହୁଲଡିହା ଗ୍ରାମର ସୁନିଆ ମୁଣ୍ଡାଙ୍କ ଘରେ ଚଢ଼ାଉ କରାଯାଇଥିଲା। ଏହି ସମୟରେ ଘର ପରିସରରୁ ରନ୍ଧା ଓ କଞ୍ଚା ବାରହା ମାଂସ ସହ ଶିକାରରେ ବ୍ୟବହୃତ ୯ଟି ଜୀବନ୍ତ ବୋମା ଜବତ କରାଯାଇଥିଲା।ଚଢ଼ାଉ ପୂର୍ବରୁ ଦୁଇ ଜଣ ସନ୍ଦିଗ୍ଧ ଶିକାରୀ ଘଟଣାସ୍ଥଳରୁ ଫେରାର ହୋଇଯାଇଥିଲେ। ସେମାନଙ୍କୁ ଧରିବା ପାଇଁ ବନ ବିଭାଗ ପକ୍ଷରୁ ଚଢ଼ାଉ ଜାରି ରହିଛି।ଏହି ଚଢ଼ାଉରେ ପାଟଣା ବନାଞ୍ଚଳ ଅଧିକାରୀ ଆର୍ତ୍ତତ୍ରାଣ ମିର୍ଦ୍ଧା, ପାଟଣା ବନପାଳ ନିରଞ୍ଜନ ସେଠୀ, ତଣ୍ଡୋ ବିଟ୍ ବନରକ୍ଷୀ ରଞ୍ଜିତା ମହାନ୍ତ, ମଲ୍ଲୀପଶି ବିଟ୍ ବନରକ୍ଷୀ ଲକ୍ଷ୍ମୀକାନ୍ତ ରାଉତଙ୍କ ସମେତ ପାରା କର୍ମଚାରୀମାନେ ସାମିଲ ଥିଲେ।
