କେନ୍ଦୁଝର/ପାଟଣା, ୨୭/୧୦: କେନ୍ଦୁଝର ଜିଲ୍ଲା ଘଟଗାଁ ବ୍ଲକ ଅନ୍ତର୍ଗତ ପିପିଳିଆ ଗ୍ରାମରେ ମହା ଆଡ଼ମ୍ବର ଓ ଭକ୍ତିମୟ ପରିବେଶରେ ୪୯ତମ ମା’ ଗଜଲକ୍ଷ୍ମୀ ପୂଜା ପାଳନ କରାଯାଉଛି। ଗଜଲକ୍ଷ୍ମୀ ପୂଜା କମିଟି ପକ୍ଷରୁ ଆୟୋଜିତ ଏହି ପୂଜା ଉତ୍ସବକୁ ନେଇ ଗ୍ରାମରେ ଉତ୍ସାହର ମାହୋଲ ସୃଷ୍ଟି ହୋଇଛି।ପୂଜା ଅବସରରେ ଗ୍ରାମର ରାଜବନ୍ଧ ପୋଖରୀରୁ କଳସ ଯାତ୍ରା ଆୟୋଜନ କରାଯାଇ ମା’ଙ୍କ ଘଟ ସ୍ଥାପନ କରାଯାଇଥିଲା। ପରମ୍ପରା ଅନୁଯାୟୀ ପୂଜାର୍ଚ୍ଚନା କରାଯାଉଥିବା ବେଳେ ରାମଚନ୍ଦ୍ର ଦଣ୍ଡପାଟ ଓ ଭଜହରି ନାୟକ କର୍ତ୍ତା ଭାବେ ଦାୟିତ୍ୱ ତୁଲାଇଛନ୍ତି। ପୂଜକ ଜଗବନ୍ଧୁ ଦାଶ ପୂଜାକାର୍ଯ୍ୟ ସମ୍ପନ୍ନ କରୁଛନ୍ତି।ପୂଜା ଉତ୍ସବକୁ ଅଧିକ ଆକର୍ଷଣୀୟ କରିବା ପାଇଁ କମିଟି ପକ୍ଷରୁ ଦୁଇ ରାତି ଧରି ନାଟକ ପରିବେଷଣର ବ୍ୟବସ୍ଥା କରାଯାଇଛି। ପ୍ରଥମ ରାତିରେ ପାରିବାରିକ କାହାଣୀ ଆଧାରିତ ନାଟକ ‘କେତେ ଦୁଃଖ ଦେବୁ କହ ଦଇବ’ ଏବଂ ଦ୍ୱିତୀୟ ରାତିରେ ‘ଏଠି ତୋର ଦୋଷ ନା ମୋର ଦୋଷ’ ମଞ୍ଚସ୍ଥ ହେବ।ପୂଜା ମଣ୍ଡପରେ ଆକର୍ଷଣୀୟ ଆଲୋକ ସଜ୍ଜା ଓ ସୁନ୍ଦର ମୃଣ୍ମୟ ମୂର୍ତ୍ତି ଶ୍ରଦ୍ଧାଳୁଙ୍କ ମନ ମୋହୁଛି। ପୂଜା ଉତ୍ସବର ସୁପରିଚାଳନା ପାଇଁ କମିଟି ସଭାପତି ପରମେଶ୍ୱର ବାରିକ, ସମ୍ପାଦକ ତପନ କୁମାର ନାୟକ ଓ କୋଷାଧ୍ୟକ୍ଷ କ୍ଷୀରୋଦ କୁମାର ମହାପାତ୍ରଙ୍କ ସହ କମିଟିର ସମସ୍ତ ସଦସ୍ୟ ସହଯୋଗ କରୁଛନ୍ତି।ପିପିଳିଆ ଗ୍ରାମରେ ମା’ ଗଜଲକ୍ଷ୍ମୀଙ୍କ ଏହି ୪୯ତମ ପୂଜା ଉତ୍ସବ ଧାର୍ମିକ ଓ ସାଂସ୍କୃତିକ ପରିବେଶକୁ ଅଧିକ ଉତ୍ସବମୁଖର କରିଛି।
