ତଣ୍ଡୋ ଗ୍ରାମରୁ ଛେଳି ଚୋରି ଉଦ୍ୟମ ଅଭିଯୋଗରେ ୨ ଗିରଫ

କେନ୍ଦୁଝର/ପାଟଣା, ୧୮/୯: କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ଡୁମୁରିଆ ପଞ୍ଚାୟତର ତଣ୍ଡୋ ଗ୍ରାମରେ ଛେଳି ଚୋରି ଉଦ୍ୟମ ଅଭିଯୋଗରେ ଦୁଇଜଣଙ୍କୁ ଘଟଗାଁ ପୁଲିସ ଗିରଫ କରିଛି। ଗିରଫ ଦୁଇଜଣ ହେଲେ ତଣ୍ଡୋ ଗ୍ରାମର ବିଜୟ ନାଏକ (୪୬) ଓ ଅଶ୍ୱିନୀ ନାଏକ (୪୨)।ସୂଚନା ଅନୁଯାୟୀ, ତଣ୍ଡୋ ଗ୍ରାମର ଗୋଲାପି ନାୟକଙ୍କ ଘରୁ ଗତରାତି ଛେଳି ଚୋରି ଉଦ୍ୟମ ହୋଇଥିଲା। ଗୋଲାପ ଘର ଜଗିଥିବା ବେଳେ ଛେଳିମାନଙ୍କ ବୋବାଳି ଶୁଣି ଉଠିଥିଲେ। ଏହି ସମୟରେ ଜଣେ ବ୍ୟକ୍ତି ଦୌଡ଼ି ପଳାଇ ଯାଇଥିବା ବେଳେ ଟର୍ଚ୍ଚ ଆଲୋକରେ ଅନ୍ୟ ଜଣଙ୍କୁ ଗୋଲାପ ଚିହ୍ନଟ କରିଥିବା ଅଭିଯୋଗ ହୋଇଛି।ଘଟଣା ସମ୍ପର୍କରେ ଘଟଗାଁ ଥାନାରେ ଅଭିଯୋଗ ପରେ ଏଏସ୍‌ଆଇ ବ୍ୟାସଦେବ ମିର୍ଦ୍ଧା ପୁଲିସ ଟିମ୍‌ ସହ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ତଦନ୍ତ ସମୟରେ ଗୋଲାପଙ୍କ ଘର ବାଡ଼ି ପଟେ ଜଣେ ବ୍ୟକ୍ତି ଚପଲ ଛାଡ଼ି ଯାଇଥିବା ଜଣାପଡ଼ିଥିଲା। ପରେ ସେହି ବ୍ୟକ୍ତି ଚପଲ ନେବାକୁ ଆସିଥିବା ବେଳେ ପୁଲିସ ହାତରେ ଧରାପଡ଼ିଥିବା ପୁଲିସ ସୂତ୍ରରୁ ଜଣାପଡ଼ିଛି।ଏହି ଘଟଣାରେ ଘଟଗାଁ ଥାନା ପୁଲିସ ମାମଲା ରୁଜୁ କରି ବିଜୟ ନାଏକ ଓ ଅଶ୍ୱିନୀ ନାଏକଙ୍କୁ ଗିରଫ କରିଛି। ଏନେଇ ଘଟଗାଁ ଥାନାରେ ମାମଲା ନଂ-୪୬୮/୨୦୨୬ ରୁଜୁ ହୋଇଥିବା ଜଣାପଡ଼ିଛି।ଅଭିଯୋଗ ଅନୁସାରେ, ଗୋଲାପି ନାୟକଙ୍କ ପୁଅ ଗାଁ ଛକରେ ଥିବା ଏକ ଦୋକାନରେ ରାତିରେ ଥିବା ସମୟରେ ପଡ଼ୋଶୀ ଦୁଇଜଣ ଛେଳି ଚୋରି ଉଦ୍ୟମ କରିଥିଲେ। ଘଟଣାକୁ ନେଇ ଘଟଗାଁ ପୁଲିସ ଅଧିକ ତଦନ୍ତ ଜାରି ରଖିଛି।