ଯୌତୁକ ନିର୍ଯାତନା ପରେ ସ୍ତ୍ରୀଙ୍କୁ ହତ୍ୟା ଅଭିଯୋଗ: ସ୍ୱାମୀ ଗିରଫ, ଅହମଦାବାଦରୁ ଧରିଲା ଖଇରା ପୋଲିସ

ବାଲେଶ୍ୱର/ଖଇରା, ୧୩/୧୦: ସ୍ତ୍ରୀଙ୍କୁ ହତ୍ୟା କରିବା ଅଭିଯୋଗରେ ସ୍ୱାମୀ ସଞ୍ଜୀବ ଲେଙ୍କାଙ୍କୁ ଗିରଫ କରିଛି ବାଲେଶ୍ୱର ଜିଲ୍ଲାର ଖଇରା ପୋଲିସ। ଅଭିଯୁକ୍ତଙ୍କୁ ଗୁଜରାଟର ଅହମଦାବାଦରୁ ଗିରଫ କରାଯାଇଥିବା ବେଳେ ଘଟଣାର ତଦନ୍ତ ଜାରି ରହିଛି।ଅଭିଯୋଗ ଅନୁଯାୟୀ, ବାଲେଶ୍ୱର ଜିଲ୍ଲା ସୋର ଥାନା ଅନ୍ତର୍ଗତ କ୍ଷୀରକୋଣି ଗ୍ରାମର ଶିବପ୍ରସାଦ ପାତ୍ରଙ୍କ ବଡ଼ଝିଅ ହରପ୍ରିୟା (୨୩)ଙ୍କ ବିବାହ ଖଇରା ଥାନା ଅନ୍ତର୍ଗତ ଫଗୁଣା ଗ୍ରାମର ହରିହର ଲେଙ୍କାଙ୍କ ପୁଅ ସଞ୍ଜୀବଙ୍କ ସହ ବୈଦିକ ରୀତିନୀତିରେ ହୋଇଥିଲା।ବିବାହ ପରେ ଅଧିକ ଯୌତୁକ ଦାବି କରି ଶାଶୁଘର ଲୋକେ ହରପ୍ରିୟାଙ୍କୁ ଶାରୀରିକ ଓ ମାନସିକ ନିର୍ଯାତନା ଦେଉଥିବା ପରିବାର ପକ୍ଷରୁ ଅଭିଯୋଗ ହୋଇଛି। ତାଙ୍କୁ ହତ୍ୟା କରି ଘଟଣାକୁ ଆତ୍ମହତ୍ୟାର ରୂପ ଦେବାକୁ ଉଦ୍ୟମ କରାଯାଇଥିବା ନେଇ ମଧ୍ୟ ମୃତକଙ୍କ ପରିବାର ଲୋକେ ପୋଲିସରେ ଅଭିଯୋଗ କରିଥିଲେ।ସ୍ତ୍ରୀଙ୍କ ମୃତ୍ୟୁ ପରେ ସଞ୍ଜୀବ ଫେରାର ହୋଇଯାଇଥିଲେ। ଏହି ଘଟଣାରେ ଖଇରା ପୋଲିସ ମାମଲା ନମ୍ବର ୨୬୦/୨୬ ରୁଜୁ କରି ତଦନ୍ତ ଆରମ୍ଭ କରିଥିଲା। ପରେ ପୋଲିସ ତାଙ୍କୁ ଅହମଦାବାଦରୁ ଗିରଫ କରିଛି।ଅନ୍ୟପକ୍ଷରେ, ବିବାହ ସମୟରେ ଦିଆଯାଇଥିବା ଯୌତୁକ ସାମଗ୍ରୀ ମୃତକଙ୍କ ବାପଘର ଲୋକଙ୍କୁ ହସ୍ତାନ୍ତର କରାଯାଇଛି। ଅଭିଯୁକ୍ତ ସଞ୍ଜୀବଙ୍କ ଡାକ୍ତରୀ ପରୀକ୍ଷା ପରେ ତାଙ୍କୁ କୋର୍ଟ ଚାଲାଣ କରାଯିବ ବୋଲି ଖଇରା ପୋଲିସ ସୂଚନା ଦେଇଛି।ଘଟଣାର ଅଧିକ ତଦନ୍ତ ଜାରି ରହିଛି।

ଖଇରାରେ ୭୦ ଲିଟରରୁ ଊର୍ଦ୍ଧ୍ୱ ନକଲି ମହୁଲି ମଦ ଜବତ, ୨ ଗିରଫ

ବାଲେଶ୍ୱର/ଖଇରା, ୧/୧୦: ବାଲେଶ୍ୱର ଜିଲା ଖଇରା ଥାନା ଅଞ୍ଚଳରେ ନକଲି ମହୁଲି ମଦ କାରବାର ବିରୋଧରେ ପୁଲିସର କାର୍ଯ୍ୟାନୁଷ୍ଠାନ। ବଟେଶ୍ୱର ନିକଟରେ ଚଢ଼ାଉ କରି ୭୦ ଲିଟରରୁ ଊର୍ଦ୍ଧ୍ୱ ନକଲି ମହୁଲି ମଦ ଜବତ କରିବା ସହ ୨ ଜଣଙ୍କୁ ଗିରଫ କରିଛି ଖଇରା ପୁଲିସ।ଗିରଫ ଦୁଇଜଣ ହେଲେ ସଞ୍ଜିତ ଗୁପ୍ତା ଓ ଜେ. ପ୍ରକାଶ ଗୁପ୍ତା। ପୁଲିସ ସେମାନଙ୍କ ନିକଟରୁ ୭୦ ଲିଟରରୁ ଅଧିକ ନକଲି ମହୁଲି ମଦ ସହ ଗୋଟିଏ ସ୍କୁଟି ଓ ଗୋଟିଏ ବାଇକ୍‌ ଜବତ କରିଛି।ସୂଚନା ଅନୁସାରେ, ଦୁଇଜଣ ବିହାରୀ ମଦ ବିକ୍ରେତା ଖଇରା ଅଞ୍ଚଳକୁ ମଦ ନେଇ ଆସୁଥିବା ନେଇ ପୁଲିସକୁ ବିଶେଷ ସୂତ୍ରରୁ ଖବର ମିଳିଥିଲା। ଏହାପରେ ଗୁରୁବାର ସକାଳେ ବଟେଶ୍ୱର ନିକଟରେ ପୁଲିସ ଚଢ଼ାଉ କରି ଉଭୟଙ୍କୁ ଧରିଥିଲା।ଏହି ଘଟଣାରେ ଖଇରା ଥାନାରେ ମାମଲା ନଂ-୨୬୧/୨୬ ରୁଜୁ କରାଯାଇଛି। ଗିରଫ ଦୁଇ ଅଭିଯୁକ୍ତଙ୍କୁ ପୁଲିସ କୋର୍ଟ ଚାଲାଣ କରିଛି। ତେବେ ଦୀର୍ଘଦିନ ଧରି ଖଇରା ଅଞ୍ଚଳରେ ମହୁଲି ମଦ କାରବାର କରୁଥିବା ନେଇ ମଧ୍ୟ ପୁଲିସ ସୂଚନା ପାଇଥିବା ଜଣାପଡ଼ିଛି।

ସୋରରେ ୧୨ ଘଣ୍ଟିଆ ଓଡ଼ିଶା ବନ୍ଦ: NH-16ରେ ଅଖଚକ ବନ୍ଦ, ଶହ ଶହ ଗାଡ଼ି ଅଟକିଲା

ବାଲେଶ୍ୱର/ସୋର, ୩୦/୦୯: ବାଲେଶ୍ୱର ଜିଲ୍ଲା ସୋରରେ ୧୨ ଘଣ୍ଟିଆ ଓଡ଼ିଶା ବନ୍ଦ ପାଳନ କରାଯାଉଛି। ନବ ନିର୍ମାଣ ଯୁବ ଛାତ୍ର ସଂଗଠନ ପକ୍ଷରୁ ସକାଳ ୬ଟାରୁ ଏହି ବନ୍ଦ ଡାକରା ଦିଆଯାଇଛି।ବନ୍ଦ ପାଳନ ସମୟରେ ସୋର ଥାନା ଅଞ୍ଚଳର NH-16 ଜାତୀୟ ରାଜପଥରେ ଅଖଚକ ବନ୍ଦ କରାଯାଇଛି। ଆନ୍ଦୋଳନକାରୀମାନେ ଜାତୀୟ ରାଜପଥ ଉପରେ ପ୍ରତିବାଦ କରୁଥିବାରୁ ଉଭୟ ପାର୍ଶ୍ୱରେ ଶହ ଶହ ଗାଡ଼ି ଅଟକି ରହିଛି। ଏହାଫଳରେ ରାଜପଥରେ ଯାତାୟାତ ବାଧାପ୍ରାପ୍ତ ହୋଇଛି।ଗାଡ଼ି ଚଳାଚଳ ବନ୍ଦ ଯୋଗୁଁ ଯାତ୍ରୀ ଏବଂ ଗାଡ଼ି ଚାଳକମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ଦୀର୍ଘ ସମୟ ଧରି ରାଜପଥରେ ଗାଡ଼ି ଅଟକି ରହିବାରୁ ଯାତ୍ରୀମାନଙ୍କ ମଧ୍ୟରେ ଅସୁବିଧା ବଢ଼ିଛି।ତେବେ ଆମ୍ବୁଲାନ୍ସ ଏବଂ ମେଡିକାଲ କାର୍ଯ୍ୟରେ ଯାଉଥିବା ଲୋକଙ୍କୁ ବନ୍ଦରୁ ବାଦ୍ ଦିଆଯାଉଛି ବୋଲି ସଂଗଠନ ପକ୍ଷରୁ କୁହାଯାଇଛି।ସରକାରଙ୍କ ପକ୍ଷରୁ ବହି ବିଭ୍ରାଟକୁ ନେଇ ସଂଗଠନ ପକ୍ଷରୁ ଏହି ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଥିବା ଆନ୍ଦୋଳନକାରୀମାନେ କହିଛନ୍ତି। ଦାବି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ସେମାନେ କହିଛନ୍ତି।ଅନ୍ୟପଟେ, ବନ୍ଦ ଯୋଗୁଁ NH-16ରେ ଯାତାୟାତ ବାଧାପ୍ରାପ୍ତ ହୋଇଥିବାରୁ ଦୂରଦୂରାନ୍ତକୁ ଯାଉଥିବା ଅନେକ ଯାତ୍ରୀ ଏବଂ ଗାଡ଼ି ଚାଳକ ହଇରାଣ ହରକତ ହେଉଛନ୍ତି।

କୁପାରିରେ ୧୧୦ ଗ୍ରାମ ବ୍ରାଉନସୁଗାର ଜବତ, ଜଣେ ଗିରଫ

ବାଲେଶ୍ୱର/ଖଇରା, ୨୯/୯: ବାଲେଶ୍ୱର ଜିଲ୍ଲା ଖଇରା ଥାନା ଅନ୍ତର୍ଗତ କୁପାରି କଲେଜ ଛକ ନିକଟରେ ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇ ୧୧୦ ଗ୍ରାମ ବ୍ରାଉନସୁଗାର ଜବତ କରାଯାଇଛି। ଏହି ଘଟଣାରେ କୁପାରି କମାରସାହି ଗ୍ରାମର ମିତା ବେହେରାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି।ବାଲେଶ୍ୱର ଅବକାରୀ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ଖଇରା ଅବକାରୀ ଥାନା ଭାରପ୍ରାପ୍ତ ଅଧିକାରୀ ପ୍ରହଲ୍ଲାଦ ସାମଲଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ କୁପାରି କଲେଜ ଛକ ନିକଟରେ ଚଢ଼ାଉ କରିଥିଲା। ଚଢ଼ାଉ ସମୟରେ ୧୧୦ ଗ୍ରାମ ବ୍ରାଉନସୁଗାର ଜବତ ହୋଇଥିଲା।ଅବକାରୀ ବିଭାଗର ସୂଚନା ଅନୁଯାୟୀ, ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ୧୧ ଲକ୍ଷ ଟଙ୍କାରୁ ଅଧିକ ହେବ।ଏହି ଚଢ଼ାଉରେ ସୋର ଆଦର୍ଶ ଅବକାରୀ ଥାନା ଭାରପ୍ରାପ୍ତ ଅଧିକାରୀ ଅନିତା ସାହୁ, ସହ ଉପ-ନିରୀକ୍ଷକ ଦୀପିକା ପରିଡ଼ା, କନେଷ୍ଟବଳ ଦେବାଶିଷ ମଲ୍ଲିକ ଓ ଶଶୀକାନ୍ତ ସାହୁଙ୍କ ସମେତ ଅନ୍ୟ କର୍ମଚାରୀମାନେ ସାମିଲ ଥିଲେ।ଏନେଇ ଖଇରା ଅବକାରୀ ଥାନା ପକ୍ଷରୁ କେସ୍ ନଂ-୧୬୯/୨୦୨୬-୨୭ରେ ମାମଲା ରୁଜୁ କରାଯାଇଛି। ପାର୍ବଣ ସମୟରେ ଚୋରାମଦ ଓ ବ୍ରାଉନସୁଗାର ଭଳି ନିଶାଦ୍ରବ୍ୟର ବେଆଇନ କାରବାର ରୋକିବା ପାଇଁ ବାଲେଶ୍ୱର ଅବକାରୀ ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି।

ଖଇରାରେ ଅବକାରୀ ଚଢ଼ାଉ: ୮୦ ଲିଟର ଦେଶୀ ମଦ ଜବତ, ୩ ଗିରଫ

ବାଲେଶ୍ୱର/ଖଇରା,୧୬/୯: ବାଲେଶ୍ୱର ଅବକାରୀ ଅଧିକ୍ଷକଙ୍କ ନିର୍ଦ୍ଦେଶକ୍ରମେ ଖଇରା ଅବକାରୀ ଥାନା ପକ୍ଷରୁ ବେଆଇନ ଦେଶୀ ମଦ କାରବାର ବିରୋଧରେ ଚଢ଼ାଉ କରାଯାଇଛି। ଏହି ଚଢ଼ାଉରେ ୮୦ ଲିଟର ଦେଶୀ ମଦ ଜବତ ହେବା ସହ ୩ ଜଣଙ୍କୁ ଗିରଫ କରାଯାଇଛି।ଖଇରା ଅବକାରୀ ଥାନା ଭାରପ୍ରାପ୍ତ ଅଧିକାରୀ ପ୍ରହଲ୍ଲାଦ ସାମଲଙ୍କ ନେତୃତ୍ୱରେ ଅବକାରୀ ବିଭାଗର ସ୍ୱତନ୍ତ୍ର ଟିମ୍ ଖଇରା ଥାନା ଅନ୍ତର୍ଗତ ଗଣ୍ଡିବେଡ଼ ବଜାର, ଶୁଣ୍ଢୀରା ବଜାର ଓ ବ୍ରାହ୍ମଣପୋଖରୀ ଛକ ନିକଟରେ ଚଢ଼ାଉ କରିଥିଲା।ଏହି ଚଢ଼ାଉ ସମୟରେ ଶୁଣ୍ଢୀରା ଗ୍ରାମର ପୂର୍ଣ୍ଣଚନ୍ଦ୍ର ବାରିକ, ଅଚ୍ୟୁତପୁର ଗ୍ରାମର ରମେଶ ଚନ୍ଦ୍ର ସାହୁ ଓ ଗନ୍ଧାଳୀ ଗ୍ରାମର ମଣ୍ଟୁ ମୁଖୀଙ୍କୁ ଗିରଫ କରାଯାଇଛି। ପରେ ସେମାନଙ୍କୁ କୋର୍ଟ ଚାଲାଣ କରାଯାଇଛି।ଅବକାରୀ ବିଭାଗର ସୂଚନା ଅନୁସାରେ, ଜବତ ହୋଇଥିବା ଦେଶୀ ମଦର ଆନୁମାନିକ ମୂଲ୍ୟ ୨୦ ହଜାର ଟଙ୍କାରୁ ଅଧିକ ହେବ। ଏନେଇ ଖଇରା ଅବକାରୀ ଥାନା ପକ୍ଷରୁ ୩ଟି ମାମଲା ରୁଜୁ କରାଯାଇଛି।ଚଢ଼ାଉରେ ଖଇରା ଅବକାରୀ ଥାନାର ସହ-ଉପନିରୀକ୍ଷକ ଦୀପିକା ପରିଡ଼ା, କନେଷ୍ଟବଳ ଦେବାଶିଷ ମଲ୍ଲିକଙ୍କ ସମେତ ଅନ୍ୟ କର୍ମଚାରୀମାନେ ସାମିଲ ଥିଲେ।

ଓଭରବ୍ରିଜ୍‌ରେ ଭୟଙ୍କର ଦୁର୍ଘଟଣା: ପରିବା ବୋଝେଇ ଟ୍ରକ୍‌ ଚାଳକ ମୃତ

ବାଲେଶ୍ୱର:୧୬/୯,ବାଲେଶ୍ୱର ଜିଲ୍ଲା ସୋର ଥାନା ଅଧୀନ ୧୬ ନମ୍ବର ଜାତୀୟ ରାଜପଥର ଚଡ଼କମରା ଓଭରବ୍ରିଜ୍‌ ଉପରେ ଆଜି ଭୋର ସମୟରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ପରିବା ବୋଝେଇ ଟ୍ରକ୍‌ର ଚାଳକଙ୍କ ମୃତ୍ୟୁ ଘଟିଛି।

ସୂଚନା ଅନୁଯାୟୀ, ଆଜି ଭୋର ପ୍ରାୟ ୪ଟା ସମୟରେ ପଶ୍ଚିମବଙ୍ଗରୁ ଭଦ୍ରକ ଅଭିମୁଖେ ଏକ ପରିବା ବୋଝେଇ ଟ୍ରକ୍‌ ଯାଉଥିଲା। ଚଡ଼କମରା ଓଭରବ୍ରିଜ୍‌ ଉପରେ କୌଣସି ଏକ ଗାଡ଼ିକୁ ଟ୍ରକ୍‌ଟି ପଛରୁ ଧକ୍କା ଦେଇଥିବା ଜଣାପଡ଼ିଛି।ଦୁର୍ଘଟଣା ପରେ ସମ୍ମୁଖରେ ଥିବା ଗାଡ଼ିଟି ଘଟଣାସ୍ଥଳରୁ ଚାଲିଯାଇଥିବା ସୂଚନା ମିଳିଛି। ପ୍ରାଥମିକ ସୂଚନା ଅନୁସାରେ, ଓଭରବ୍ରିଜ୍‌ ଉପରେ କୌଣସି ଏକ ଟ୍ରକ୍‌ ଛିଡ଼ା ହୋଇଥିବା ବେଳେ ପରିବା ବୋଝେଇ ଟ୍ରକ୍‌ଟି ତାହାର ପଛପଟେ ଧକ୍କା ଦେଇଥିବା ସନ୍ଦେହ କରାଯାଉଛି।ଧକ୍କା ଏତେ ଜୋରଦାର ଥିଲା ଯେ ପରିବା ବୋଝେଇ ଟ୍ରକ୍‌ର ସମ୍ମୁଖ ଭାଗ ସମ୍ପୂର୍ଣ୍ଣ କ୍ଷତିଗ୍ରସ୍ତ ହୋଇଯାଇଥିଲା। ଘଟଣାସ୍ଥଳରେ ହିଁ ଟ୍ରକ୍‌ ଚାଳକଙ୍କ ମୃତ୍ୟୁ ଘଟିଥିଲା।ଖବର ପାଇ ସୋର ପୁଲିସ ଘଟଣାସ୍ଥଳରେ ପହଞ୍ଚି ମୃତ ଚାଳକଙ୍କୁ ଆମ୍ବୁଲାନ୍ସ ଯୋଗେ ସୋର ମେଡିକାଲକୁ ପଠାଇଥିଲା। ଦୁର୍ଘଟଣାଗ୍ରସ୍ତ ଟ୍ରକ୍‌ଟିକୁ ମଧ୍ୟ ସୋର ଥାନାକୁ ନିଆଯାଇଛି।

ସୋର ପୁଲିସ ଘଟଣାର ତଦନ୍ତ ଜାରି ରଖିଛି। ମୃତଦେହକୁ ବ୍ୟବଚ୍ଛେଦ ପାଇଁ ସୋର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ରଖାଯାଇଛି। ଦୁର୍ଘଟଣାର ପ୍ରକୃତ କାରଣ ଓ ସମ୍ମୁଖରେ ଥିବା ଗାଡ଼ି ସମ୍ପର୍କରେ ପୁଲିସ ତଦନ୍ତ ପରେ ସ୍ପଷ୍ଟ ହେବ।

ଓରାଙ୍ଗଉଟାନ୍ ଚୋରାଚାଲାଣ ରହସ୍ୟ: STF ସ୍କାନରରେ କଳା SUV, ୩୯ ମିନିଟ୍‌ର CCTV ଲିଙ୍କ୍‌ ଖୋଜୁଛି ତଦନ୍ତକାରୀ ଟିମ୍

ବାଲେଶ୍ୱର:୧୨/୯,

୫ ଶିଶୁ ଓରାଙ୍ଗଉଟାନ୍‌ ଓଡ଼ିଶାକୁ କିପରି ଆସିଲେ, ତାହାକୁ ନେଇ ଚାଲିଥିବା ତଦନ୍ତ ଏବେ ନୂଆ ମୋଡ଼ ନେଇଛି। ଘଟଣାର ତଦନ୍ତ କରୁଥିବା ସ୍ପେଶାଲ ଟାସ୍କ ଫୋର୍ସ (STF) ହାତରେ ନୂଆ CCTV ଫୁଟେଜ୍‌ ଲାଗିଛି। ଦୀଘାର ଏକ ହୋଟେଲ ନିକଟରେ ଦେଖାଯାଇଥିବା କଳା SUV ଏବେ STFର ସ୍କାନରରେ ରହିଛି।CCTV ଫୁଟେଜ୍‌ରେ ଏକ କଳା SUV ହୋଟେଲ ସମ୍ମୁଖରେ ଅଟକିଥିବା ଦେଖାଯାଇଛି। ଗାଡ଼ିରୁ କିଛି ଲୋକ ବାହାରି ପରସ୍ପର ମଧ୍ୟରେ କଥାବାର୍ତ୍ତା କରୁଥିବା ମଧ୍ୟ ନଜରକୁ ଆସିଛି। ତେବେ ସେହି ସମୟରେ ହୋଟେଲଟି ବନ୍ଦ ଥିବା ଜଣାପଡ଼ିଛି। ଏହାକୁ ନେଇ ଗାଡ଼ି ଓ ସେଠାରେ ଥିବା ଲୋକଙ୍କ ଗତିବିଧିକୁ ନେଇ ସନ୍ଦେହ ବଢ଼ିଛି।ହୋଟେଲ ମାଲିକ ଓ ପୁଅଙ୍କୁ ଖୋଜୁଛି STF ଓରାଙ୍ଗଉଟାନ୍‌ ମାମଲାରେ ଦୀଘାର ସମ୍ପୃକ୍ତ ହୋଟେଲ ମାଲିକ ଓ ତାଙ୍କ ପୁଅଙ୍କୁ STF ଖୋଜୁଥିବା ସୂଚନା ମିଳିଛି। ଉଭୟେ ଫେରାର ଥିବା କୁହାଯାଉଛି ହୋଟେଲ ମାଲିକଙ୍କ ଫୋନ୍‌ ସୁଇଚ୍‌ ଅଫ୍‌ ଥିବା ମଧ୍ୟ ଜଣାପଡ଼ିଛି ଅନ୍ୟପଟେ ହୋଟେଲ ମ୍ୟାନେଜରଙ୍କ ସମେତ ଆଉ ୩ ଜଣଙ୍କୁ STF ପଚରାଉଚରା କରୁଛି।୩୯ ମିନିଟ୍‌ର CCTV ଲିଙ୍କ୍‌ ଉପରେ ନଜର ତଦନ୍ତ ବେଳେ ଆଉ ଏକ ଗୁରୁତ୍ୱପୂର୍ଣ୍ଣ CCTV ଫୁଟେଜ୍‌ ସାମ୍ନାକୁ ଆସିଛି। ରାତି ପ୍ରାୟ ୧୦ଟା ୫୬ ମିନିଟ୍‌ରେ ଦୀଘାର ଏକ ହୋଟେଲ ନିକଟ ଦେଇ ଏକ କଳା SUV ଯାଉଥିବା ଦେଖାଯାଇଛି।ଏହାର ପ୍ରାୟ ୩୯ ମିନିଟ୍‌ ପରେ, ଅର୍ଥାତ୍‌ ରାତି ୧୧ଟା ୩୫ ମିନିଟ୍‌ରେ, ବିଚିତ୍ରପୁର ନିକଟର CCTVରେ ମଧ୍ୟ ସମାନ ଧରଣର ଏକ କଳା SUV ଦେଖାଯାଇଛି।ଏହି ଦୁଇଟି CCTV ଫୁଟେଜ୍‌ରେ ଦେଖାଯାଇଥିବା ଗାଡ଼ି ସମାନ କି ନୁହେଁ, ତାହା ଯାଞ୍ଚ କରୁଛି STF। ଏହା ସହିତ ଦୀଘାରୁ ବିଚିତ୍ରପୁର ଯିବା ମଧ୍ୟରେ ୩୯ ମିନିଟ୍‌ ସମୟରେ SUV କେଉଁ ରାସ୍ତା ଦେଇ ଯାଇଥିଲା, ସେନେଇ ମଧ୍ୟ ତଦନ୍ତ ଚାଲିଛି।୧୦୦ରୁ ଅଧିକ CCTV ଫୁଟେଜ୍‌ ଯାଞ୍ଚ ଓରାଙ୍ଗଉଟାନ୍‌ ଚୋରାଚାଲାଣ ମାମଲାରେ ଦୀଘା ଓ ଏହାର ଆଖପାଖ ଅଞ୍ଚଳର ହୋଟେଲ ଏବଂ ବିଭିନ୍ନ ଗୁରୁତ୍ୱପୂର୍ଣ୍ଣ ସ୍ଥାନରେ ଲାଗିଥିବା ୧୦୦ରୁ ଅଧିକ CCTV କ୍ୟାମେରାର ଫୁଟେଜ୍‌ STF ଯାଞ୍ଚ କରିଛି। ଏହି ଯାଞ୍ଚ ସମୟରେ କିଛି ସନ୍ଦେହଜନକ ଗତିବିଧି ସମ୍ପର୍କରେ ତଥ୍ୟ ମିଳିଥିବା କୁହାଯାଉଛି।ଏବେ ତଦନ୍ତକାରୀଙ୍କ ନଜରରେ ରହିଛି କଳା SUV। ଗାଡ଼ିରେ କିଏ ଥିଲେ, SUV କେଉଁଠାରୁ ଆସିଥିଲା, ୩୯ ମିନିଟ୍‌ ମଧ୍ୟରେ କେଉଁଠି ଅଟକିଥିଲା ଏବଂ ଏହାର ଓରାଙ୍ଗଉଟାନ୍‌ ଚୋରାଚାଲାଣ ସହ କୌଣସି ସମ୍ପର୍କ ଅଛି କି ନାହିଁ, ଏହି ସବୁ ଦିଗକୁ ନେଇ STF ତଦନ୍ତ ଜାରି ରଖିଛି।

ବାଲେଶ୍ୱର ଜିଲ୍ଲା ଭୋଗରାଇ ବ୍ଲକରୁ ଉଦ୍ଧାର ହୋଇଥିବା ୫ଟି ବିରଳ ଓରାଙ୍ଗଉଟାନ (Orangutan) ସଫଳତାପୂର୍ବକ ଭୁବନେଶ୍ୱର ସ୍ଥିତ ନନ୍ଦନକାନନ ପ୍ରାଣୀ ଉଦ୍ୟାନରେ ପହଞ୍ଚିଛନ୍ତି।

 

୧୬.୭୧ ଲକ୍ଷ ସରକାରୀ ଟଙ୍କା ହଡ଼ପ ଅଭିଯୋଗ: ୩ ପଞ୍ଚାୟତ ଅଧିକାରୀଙ୍କୁ ବାନ୍ଧିଲା ଭିଜିଲାନ୍ସ

 

ବାଲେଶ୍ୱର:୮/୯,ବୃଦ୍ଧବୃଦ୍ଧାଙ୍କ ପାଇଁ ଉଦ୍ଦିଷ୍ଟ ସାମାଜିକ ସୁରକ୍ଷା ପେନସନ୍ ଟଙ୍କା ହଡ଼ପ ଅଭିଯୋଗରେ ୩ ଜଣ ପଞ୍ଚାୟତସ୍ତରୀୟ ଅଧିକାରୀଙ୍କୁ ଗିରଫ କରିଛି ଓଡ଼ିଶା ଭିଜିଲାନ୍ସ। ଭୋଗରାଇ ବ୍ଲକର ବିଭିନ୍ନ ପଞ୍ଚାୟତରେ ଦାୟିତ୍ୱରେ ଥିବା ଏହି ତିନି ଅଭିଯୁକ୍ତ ମିଳିତ ଭାବେ ୧୬ ଲକ୍ଷ ୭୧ ହଜାର ୪୦୦ ଟଙ୍କା ହଡ଼ପ କରିଥିବା ଭିଜିଲାନ୍ସ ପକ୍ଷରୁ କୁହାଯାଇଛି।ଗିରଫ ଅଭିଯୁକ୍ତମାନେ ହେଲେ କଖରା ଗ୍ରାମ ପଞ୍ଚାୟତର ପୂର୍ବତନ ପିଇଓ ତଥା ବର୍ତ୍ତମାନ କୁସୁଡ଼ା ଗ୍ରାମ ପଞ୍ଚାୟତରେ କାର୍ଯ୍ୟରତ ସୁବ୍ରତ କୁମାର ପତି, କୁମାରମୁଳି ଗ୍ରାମ ପଞ୍ଚାୟତର ପୂର୍ବତନ ପିଇଓ ଚିତ୍ତରଞ୍ଜନ ବାଗସିଂହ ଏବଂ ଜଳେଶ୍ୱରପୁର ଗ୍ରାମ ପଞ୍ଚାୟତର ଆକାଉଣ୍ଟାଣ୍ଟ-କମ୍-ଡାଟା ଏଣ୍ଟ୍ରି ଅପରେଟର ଗୌତମ ଦଲାଇ।ଭିଜିଲାନ୍ସ ତଦନ୍ତ ଅନୁଯାୟୀ, ୨୦୧୨ରୁ ୨୦୨୪ ମଧ୍ୟରେ ବୃଦ୍ଧବୃଦ୍ଧାଙ୍କୁ ମାସିକ ସାମାଜିକ ସୁରକ୍ଷା ପେନସନ୍ ବଣ୍ଟନ ପାଇଁ ଅଭିଯୁକ୍ତମାନେ ଭୋଗରାଇ ବିଡିଓ କାର୍ଯ୍ୟାଳୟରୁ ବିଭିନ୍ନ ସମୟରେ ଅଗ୍ରିମ ଟଙ୍କା ଉଠାଇଥିଲେ।ହିତାଧିକାରୀଙ୍କୁ ପେନସନ୍ ଟଙ୍କା ବଣ୍ଟନ କରିବା ପରେ ବଳକା ଅର୍ଥ ସରକାରୀ ହିସାବରେ ଜମା କରିବା କିମ୍ବା ଏହାର ହିସାବ ଦେବା ପରିବର୍ତ୍ତେ ଅଭିଯୁକ୍ତମାନେ ଟଙ୍କା ଆତ୍ମସାତ୍ କରିଥିବା ତଦନ୍ତରୁ ଜଣାପଡ଼ିଥିବା ଭିଜିଲାନ୍ସ କହିଛି।ଏହି ଘଟଣାକୁ ନେଇ ବାଲେଶ୍ୱର ଭିଜିଲାନ୍ସ ଥାନାରେ ମାମଲା ରୁଜୁ ହୋଇଛି। ଦୁର୍ନୀତି ନିବାରଣ ଆଇନର ଧାରା ୧୩(୨) ସହ ୧୩(୧)(ଏ) ଏବଂ ଆଇପିସି ଧାରା ୪୦୯ ଅନୁଯାୟୀ ମାମଲା ରୁଜୁ କରାଯାଇଛି।ଗିରଫ ହୋଇଥିବା ତିନି ଅଭିଯୁକ୍ତଙ୍କୁ ବାଲେଶ୍ୱର ସ୍ୱତନ୍ତ୍ର ଭିଜିଲାନ୍ସ ଅଦାଲତରେ ହାଜର କରାଯାଇଛି। ମାମଲାରେ ଅଧିକ ତଦନ୍ତ ଜାରି ରହିଛି ବୋଲି ଭିଜିଲାନ୍ସ ପକ୍ଷରୁ ସୂଚନା ମିଳିଛି।

ଭୋଗରାଇ ଜଙ୍ଗଲରୁ ୫ ବିରଳ ଓରାଙ୍ଗଉଟାଙ୍ଗ ଉଦ୍ଧାର, ଆନ୍ତର୍ଜାତୀୟ ସ୍ମଗଲିଂ ସନ୍ଦେହ

ବାଲେଶ୍ୱର: ୮/୯: ବାଲେଶ୍ୱର ଭୋଗରାଇ ଅଞ୍ଚଳରୁ ୫ଟି ବିରଳ ପ୍ରଜାତିର ଓରାଙ୍ଗଉଟାଙ୍ଗ ଉଦ୍ଧାର ହୋଇଛି। ଭୋଗରାଇ ବ୍ଲକ ଅନ୍ତର୍ଗତ ରଣକୋଠା PRFର ବଡ଼ପାହି ନିକଟ ଜଙ୍ଗଲରେ ଏହି ବିରଳ ଜୀବଗୁଡ଼ିକୁ ଠାବ କରାଯାଇଥିଲା। ଏକାଥରେ ୫ଟି ଓରାଙ୍ଗଉଟାଙ୍ଗ ଜଙ୍ଗଲରେ ଦେଖାଯିବା ପରେ ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା।ଖବର ପ୍ରଚାର ପରେ ବିଚିତ୍ରପୁର ଜଙ୍ଗଲ ନିକଟରେ ଏହି ବିରଳ ଜୀବଗୁଡ଼ିକୁ ଦେଖିବା ପାଇଁ ଲୋକଙ୍କ ଭିଡ଼ ଜମିଥିଲା। ପରେ ବନବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ୫ଟି ଓରାଙ୍ଗଉଟାଙ୍ଗକୁ ସୁରକ୍ଷିତ ଭାବେ ଉଦ୍ଧାର କରିଥିଲେ।ଦେଖିବାକୁ ବଣମଣିଷ ଭଳି ଲାଗୁଥିବା ଏହି ଜୀବଗୁଡ଼ିକୁ ଉଦ୍ଧାର ପରେ ସ୍ୱାସ୍ଥ୍ୟ ପରୀକ୍ଷା ପାଇଁ ପଶୁ ଚିକିତ୍ସାଳୟକୁ ନିଆଯାଇଥିଲା। ୫ଟି ଓରାଙ୍ଗଉଟାଙ୍ଗ ମଧ୍ୟରୁ ଗୋଟିଏ ଡିହାଇଡ୍ରେସନରେ ଆକ୍ରାନ୍ତ ଥିବାରୁ ତାକୁ ORS ଦିଆଯାଇଥିବା ସୂଚନା ମିଳିଛି। ଅନ୍ୟ ସମସ୍ତେ ସୁସ୍ଥ ଥିବା କହିଛନ୍ତି PCCF ପ୍ରେମ ଝା।

କେଉଁଠୁ ଆସିଲେ ୫ ଓରାଙ୍ଗଉଟାଙ୍ଗ?

ଭାରତୀୟ ଜଙ୍ଗଲରେ ସାଧାରଣତଃ ଓରାଙ୍ଗଉଟାଙ୍ଗ ଦେଖାଯାଆନ୍ତି ନାହିଁ। ତେଣୁ ବାଲେଶ୍ୱରର ଉଦୟପୁର ଓ ଭୋଗରାଇ ଅଞ୍ଚଳର ଜଙ୍ଗଲକୁ ଏହି ୫ଟି ବିରଳ ଜୀବ କେଉଁଠୁ ଏବଂ କିପରି ଆସିଲେ, ତାହାକୁ ନେଇ ବଡ଼ ପ୍ରଶ୍ନ ଉଠିଛି।କେହି ଏମାନଙ୍କୁ ପୋଷିଥିଲେ କି? କୌଣସି ସ୍ଥାନରୁ ଏମାନଙ୍କୁ ଏଠାକୁ ଅଣାଯାଇଥିଲା କି? ନା ଏହା ପଛରେ ଅନ୍ୟ କୌଣସି କାରଣ ରହିଛି? ଏସବୁ ଦିଗକୁ ନେଇ ବନବିଭାଗ ତଦନ୍ତ ଆରମ୍ଭ କରିଛି।

ଆନ୍ତର୍ଜାତୀୟ ସ୍ମଗଲିଂ ସନ୍ଦେହ

ଘଟଣାକୁ ନେଇ PCCF ପ୍ରେମ ଝା ଏହା ଆନ୍ତର୍ଜାତୀୟ ସ୍ମଗଲିଂ ସହ ଜଡ଼ିତ ହୋଇପାରେ ବୋଲି ସନ୍ଦେହ ପ୍ରକାଶ କରିଛନ୍ତି। ତେଣୁ ଓରାଙ୍ଗଉଟାଙ୍ଗଗୁଡ଼ିକ କେଉଁଠୁ ଆସିଥିଲେ ଏବଂ କିଏ ସେମାନଙ୍କୁ ଏଠାକୁ ଆଣିଥିଲା, ସେନେଇ ତଦନ୍ତ ଜୋରଦାର କରାଯାଉଛି।

ନନ୍ଦନକାନନ ଯିବେ ୫ ଓରାଙ୍ଗଉଟାଙ୍ଗ

ଉଦ୍ଧାର ହୋଇଥିବା ୫ଟି ଓରାଙ୍ଗଉଟାଙ୍ଗକୁ ନନ୍ଦନକାନନ ଅଣାଯିବ। ଏଥିପାଇଁ ନନ୍ଦନକାନନରୁ ଏକ ସ୍ୱତନ୍ତ୍ର ଟିମ୍ ବାଲେଶ୍ୱର ଅଭିମୁଖେ ବାହାରିଥିବା ସୂଚନା ମିଳିଛି। ନନ୍ଦନକାନନରେ ସେମାନଙ୍କର ସମ୍ପୂର୍ଣ୍ଣ ସ୍ୱାସ୍ଥ୍ୟ ପରୀକ୍ଷା କରାଯିବ।ଏହାସହିତ ଏହି ୫ଟି ବିରଳ ଜୀବ କେଉଁଠୁ ଆସିଲେ, କିପରି ବାଲେଶ୍ୱରରେ ପହଞ୍ଚିଲେ ଏବଂ ଏହା ପଛରେ କାହାର ସମ୍ପୃକ୍ତି ରହିଛି, ସେନେଇ ତଦନ୍ତ କରାଯିବ। ତଦନ୍ତ ପରେ ଘଟଣାର ପ୍ରକୃତ ରହସ୍ୟ ସାମ୍ନାକୁ ଆସିବ।